.png)
வஞ்சரம் மீன் குழம்பு செஞ்சு சாப்பிட்டு பார்த்திருக்கீங்களா? ஒருமுறை இந்த பக்குவத்துல செஞ்சு பாருங்க, அப்புறம் வேற எந்த ஸ்டைலையும் ட்ரை பண்ண மனசு வராது! வஞ்சரம் மீனோட மணமும், மசாலாவோட சமநிலையும், குழம்புல வர்ற அந்த புளிப்பு-கார சுவையும் சும்மா அள்ளும்.
முதல்ல, தேவையான பொருட்களை பார்க்கலாம். 500 கிராம் வஞ்சரம் மீன், நல்லா சுத்தம் செஞ்சு வெட்டி வைங்க. புளியை ஒரு சின்ன எலுமிச்சை அளவு எடுத்து, வெந்நீர்ல ஊற வைங்க. 2 பெரிய வெங்காயம், 2 தக்காளி – இதெல்லாம் நைசா பொடியாக நறுக்கி வைங்க. பச்சை மிளகாய் 2, கறிவேப்பிலை ஒரு கொத்து, கொத்தமல்லி இலை கொஞ்சம். மசாலாவுக்கு, 2 டீஸ்பூன் மிளகாய்த்தூள், 1 டீஸ்பூன் மல்லித்தூள், 1/2 டீஸ்பூன் மஞ்சள்தூள், 1 டீஸ்பூன் சீரகத்தூள், உப்பு தேவையான அளவு. இதோட, 1 டேபிள்ஸ்பூன் இஞ்சி-பூண்டு விழுது, 1/2 கப் தேங்காய் பால், 3 டேபிள்ஸ்பூன் நல்லெண்ணெய், 1 டீஸ்பூன் வெந்தயம், 1 டீஸ்பூன் கடுகு.
இப்போ குழம்பு தயாரிக்க ஆரம்பிக்கலாம். ஒரு கனமான பாத்திரத்துல நல்லெண்ணெயை ஊத்தி, காய்ந்ததும் கடுகு, வெந்தயம் போட்டு தாளிக்கணும். கடுகு பொரிஞ்சதும், வெங்காயத்தை போட்டு பொன்னிறமாக வதக்கணும். இதுல இஞ்சி-பூண்டு விழுது, பச்சை மிளகாய், கறிவேப்பிலை சேர்த்து ஒரு மணம் வர்ற வரை வதக்குங்க. இப்போ தக்காளியை போட்டு, நல்லா மசியற வரை கிளறுங்க.
அடுத்து, மிளகாய்த்தூள், மல்லித்தூள், மஞ்சள்தூள், சீரகத்தூள் எல்லாத்தையும் சேர்த்து, ஒரு நிமிஷம் குறைந்த தீயில வதக்கணும். மசாலா பச்சை வாசனை போய், எண்ணெய் பிரிஞ்சு வரும்போது, ஊற வச்ச புளியை பிழிஞ்சு, அதோட நீரை ஊத்துங்க. தேவையான அளவு உப்பு, 2 கப் தண்ணீர் சேர்த்து, குழம்பு கொதிக்க விடுங்க. இப்போ மீனை ஒவ்வொரு துண்டா கவனமா போட்டு, மெதுவா கிளறி, 7-8 நிமிஷம் மிதமான தீயில வேக விடுங்க. மீன் வெந்ததும், தேங்காய் பாலை ஊத்தி, ஒரு கொதி வந்ததும் இறக்கிடுங்க.
இந்த குழம்பு சூடான சாதத்தோட சாப்பிடும்போது, அப்படியே நாக்குல ஒட்டிக்கும். குறிப்பா, மறுநாளுக்கு என்று கொஞ்சம் குழம்பை எடுத்து தனியா வச்சிடுங்க. ஏன்னா.. மறுநாள் மீன் குழம்பு டேஸ்ட்டுக்கு அடிமையாகாதவங்க யாருமே இருக்க முடியாது. அப்போ தொட்டுக்க, ஜஸ்ட் ஒரு ஆம்லேட் போதும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
