.png)
இந்தியர்களின் வெளிநாட்டுப் பயண ஆர்வம் முன்பை விட தற்போது பன்மடங்கு அதிகரித்துள்ளது என்பதை அண்மையில் வெளியாகியுள்ள சுற்றுலாத் துறை தரவுகள் உறுதிப்படுத்தியுள்ளன. கடந்த 2025-ஆம் ஆண்டில் மட்டும் சுமார் 3.3 கோடி இந்தியர்கள் சுற்றுலா மற்றும் இதர தேவைகளுக்காக வெளிநாடுகளுக்குப் பயணம் மேற்கொண்டு புதிய வரலாற்றுச் சாதனையைப் படைத்துள்ளனர். இது கடந்த 2024-ஆம் ஆண்டின் புள்ளிவிவரங்களுடன் ஒப்பிடும்போது சுமார் 6.6 சதவீத வளர்ச்சியைப் பதிவு செய்துள்ளது. பெருகி வரும் தனிநபர் வருமானம், எளிதான விமானப் போக்குவரத்து வசதிகள் மற்றும் உலக நாடுகளைச் சுற்றிப் பார்க்க வேண்டும் என்ற ஆர்வம் ஆகியவை இந்த அதீத வளர்ச்சிக்கு முக்கியக் காரணங்களாகப் பார்க்கப்படுகின்றன.
சுற்றுலாப் பயணிகளின் விருப்பமான நாடுகளின் பட்டியலில் ஐக்கிய அரபு அமீரகம் முதலிடத்தைப் பிடித்துள்ளது. கடந்த ஆண்டில் மட்டும் சுமார் 78 லட்சம் இந்தியர்கள் இந்த நாட்டுக்குச் சென்றுள்ளனர். குறிப்பாக துபாய் போன்ற நகரங்களில் உள்ள நவீனக் கட்டமைப்பு, உலகத்தரம் வாய்ந்த வணிக வளாகங்கள் மற்றும் குடும்பத்துடன் பொழுதுபோக்க ஏற்ற இடங்கள் ஆகியவை இந்தியர்களை வெகுவாகக் கவர்ந்துள்ளன. மேலும் இந்தியாவில் இருந்து மிகக் குறைந்த நேரத்தில் சென்றடையக்கூடிய தூரத்தில் இருப்பதும், அடிக்கடி இயக்கப்படும் விமானச் சேவைகளும் ஐக்கிய அரபு அமீரகத்தை இந்தியர்களின் முதல் விருப்பமாக மாற்றியுள்ளன.
இந்தப் பட்டியலில் சவுதி அரேபியா இரண்டாவது இடத்தைப் பிடித்துள்ளது. ஆன்மீகப் பயணங்கள் மற்றும் புனித யாத்திரை மேற்கொள்பவர்களின் எண்ணிக்கை அதிகரித்துள்ளதே இதற்குக் காரணமாகும். அதே நேரத்தில் சவுதி அரேபியா தற்போது தனது நாட்டின் சுற்றுலாத் துறையை மேம்படுத்த பல்வேறு நவீன மாற்றங்களைக் கொண்டு வந்துள்ளது. இது புனிதப் பயணங்களைத் தாண்டி சாதாரண சுற்றுலாப் பயணிகளையும் ஈர்க்கத் தொடங்கியுள்ளது. இதனைத் தொடர்ந்து மூன்றாவது இடத்தில் தாய்லாந்து உள்ளது. பட்ஜெட்டுக்கு ஏற்ற சுற்றுலாத் தலங்கள் மற்றும் அழகான கடற்கரைகள் இருப்பதால் நடுத்தர வர்க்கத்தைச் சேர்ந்த இந்தியர்கள் தாய்லாந்தைத் தங்களது விருப்பமான இடமாகத் தேர்வு செய்துள்ளனர்.
இந்தியர்கள் வெளிநாடுகளை நோக்கிப் படை எடுப்பதற்குப் பின்னால் ஒரு முக்கியமான பொருளாதாரக் காரணியும் ஒளிந்துள்ளதாக நிபுணர்கள் கருதுகின்றனர். இந்தியாவில் உள்ள முக்கிய சுற்றுலாத் தலங்களான கோவா மற்றும் கேரளா போன்ற இடங்களில் தங்கும் விடுதிச் செலவுகள் மற்றும் இதர கட்டணங்கள் கணிசமாக உயர்ந்துள்ளன. இதனால் உள்நாட்டிலேயே அதிகப் பணம் செலவழிப்பதற்குப் பதிலாக, அதே செலவில் தாய்லாந்து அல்லது வியட்நாம் போன்ற நாடுகளுக்குச் சென்று வருவது லாபகரமானது என்ற எண்ணம் மக்களிடையே ஏற்பட்டுள்ளது. ஒரு நாள் விடுதி வாடகை வெளிநாடுகளில் குறைவாகக் கிடைப்பது சுற்றுலாப் பயணிகளை உலக நாடுகளுக்குப் பயணிக்கத் தூண்டுகிறது.
மேலும் 2025-ஆம் ஆண்டு பயணங்களில் இளைஞர்களின் பங்களிப்பு வியக்கத்தக்க வகையில் இருந்துள்ளது. குறிப்பாக மில்லினியல்கள் மற்றும் ஜென்-இசட் தலைமுறையினர் தங்களது பயணங்களைச் சமூக வலைதளங்களின் தாக்கத்தால் அதிக அளவில் திட்டமிட்டுள்ளனர். தனிப் பயணம் மேற்கொள்வது மற்றும் குறுகிய கால வெளிநாட்டுச் சுற்றுப்பயணங்கள் செய்வது போன்ற புதிய போக்குகள் இவர்களிடையே பிரபலமாகியுள்ளன. அதோடு இந்தியக் கடவுச்சீட்டின் மதிப்பு உயர்ந்து வருவதும், பல நாடுகள் இந்தியர்களுக்கு விசா இல்லா நுழைவு அல்லது எளிதான விசா முறைகளை அறிமுகப்படுத்தி வருவதும் இந்தச் சுற்றுலாப் புரட்சிக்கு வலு சேர்த்துள்ளன.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
