.png)
மலேரியா என்பது உலகில் நீண்ட காலமாகவே மனிதர்களுக்குப் பெரும் அச்சுறுத்தலாக இருக்கும் ஒரு நோயாகும். பெண் அனோபிலிஸ் கொசுக்கள் கடிப்பதன் மூலம் இந்த நோய் பரவுகிறது. நம் நாட்டில் மழைக்காலங்களிலும், தண்ணீர் தேங்கி நிற்கும் இடங்களிலும் இந்த வகை கொசுக்கள் அதிகம் உருவாகின்றன. மலேரியா கிருமிகள் ரத்தத்தில் கலந்த பிறகு, கல்லீரலைத் தாக்கி அங்கிருந்து ரத்த சிவப்பு அணுக்களைப் பாதிக்கிறது. இதனால் உடலின் நோய் எதிர்ப்பு சக்தி வெகுவாகக் குறைகிறது. மலேரியாவின் அறிகுறிகள் பொதுவாகக் கொசு கடித்த 10 முதல் 15 நாட்களுக்குப் பிறகுதான் தெரிய ஆரம்பிக்கும். ஒருவருக்கு மலேரியா பாதிப்பு இருந்தால், அவருக்குக் கடுமையான காய்ச்சல் மற்றும் குளிருடன் கூடிய நடுக்கம் ஏற்படும். இது மலேரியாவின் அடையாளச் சின்னமாகப் பார்க்கப்படுகிறது. காய்ச்சல் வந்தவுடன், உடல் வெப்பநிலை வேகமாக உயர்ந்து, சிறிது நேரத்தில் குளிரால் உடல் நடுங்கும். பின்னர் சில மணி நேரங்கள் கழித்து உடல் வியர்த்து, காய்ச்சல் குறையும். மீண்டும் அடுத்த நாளில் இதே போன்ற சுழற்சி ஏற்படும்.
இதனுடன் கடுமையான தலைவலி, சோர்வு மற்றும் குமட்டல் போன்ற உணர்வுகள் இருக்கும். பலருக்கு வாந்தி எடுக்கும் உணர்வும் ஏற்படும். தீவிரமான மலேரியா பாதிப்பு ஏற்படும்போது, மூளைக் காய்ச்சல், ரத்த சோகை மற்றும் உறுப்புச் செயலிழப்பு போன்ற ஆபத்தான நிலைகள் ஏற்படலாம். எனவே, காய்ச்சல் தொடர்ச்சியாக இருந்தாலோ அல்லது குளிரும் நடுக்கமும் அடிக்கடி ஏற்பட்டாலோ, அதை சாதாரண வைரஸ் காய்ச்சல் என்று விட்டுவிடக் கூடாது. உடனடியாக ரத்தப் பரிசோதனை செய்துகொள்வது அவசியம். ஆய்வகத்தில் 'பெரிஃபெரல் ஸ்மியர்' (Peripheral smear) பரிசோதனை மூலம் மலேரியா கிருமி இருப்பதை எளிதாகக் கண்டறியலாம். மலேரியாவை ஆரம்ப நிலையிலேயே கண்டறிந்தால், மருத்துவர்கள் பரிந்துரைக்கும் மாத்திரைகள் மூலமே குணப்படுத்திவிட முடியும்.
இந்த நோயைத் தடுப்பதற்கு மிகச் சிறந்த வழி கொசுக்கள் உற்பத்தியாவதைத் தடுப்பதுதான். வீட்டைச் சுற்றித் தண்ணீர் தேங்காமல் பார்த்துக் கொள்வது, கொசு வலைகளைப் பயன்படுத்துவது மற்றும் கொசு விரட்டி கிரீம்களைப் பயன்படுத்துவது போன்றவற்றின் மூலம் மலேரியா கிருமிப் பரவலைத் தடுக்கலாம். மலேரியாவால் பாதிக்கப்பட்டவர்கள், தகுந்த ஓய்வு மற்றும் சத்தான உணவுகளை எடுத்துக்கொள்வது அவசியம். திரவ உணவுகளை (ORS, பழச்சாறுகள்) அதிகம் பருக வேண்டும். அரசு மருத்துவமனைகளில் மலேரியாவுக்கான பரிசோதனைகளும் சிகிச்சைகளும் இலவசமாக வழங்கப்படுகின்றன. காய்ச்சல் என்பது சாதாரணமானது என்று நினைக்காமல், உங்கள் உடலில் ஏற்படும் ஒவ்வொரு மாற்றத்தையும் கவனமாகக் கண்காணித்து, தகுந்த நேரத்தில் மருத்துவரை அணுகினால் எந்த உயிரிழப்பையும் தவிர்க்கலாம்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
