.png)
புற்றுநோய் என்ற வார்த்தையைக் கேட்டாலே பலரும் பயப்படுகிறார்கள். ஆனால், புற்றுநோயை ஆரம்ப நிலையிலேயே கண்டறிந்தால், குணப்படுத்துவதற்கான வாய்ப்புகள் மிக அதிகம். நம் உடல் எப்போதும் ஆரோக்கியமாக இருக்கும்போது ஒரு சீரான செயல்பாட்டில் இருக்கும். ஆனால், புற்றுநோய் செல்கள் உடலில் வளரத் தொடங்கும்போது, உடல் பல்வேறு மாற்றங்களைக் காட்டத் தொடங்கும். புற்றுநோயின் ஆரம்ப அறிகுறிகள் புற்றுநோயின் வகையைப் பொறுத்து மாறுபடும். இருப்பினும், பொதுவாக சில அறிகுறிகளை நாம் அலட்சியம் செய்யக் கூடாது. மிக முக்கியமான அறிகுறி, நீண்ட நாட்களாக ஆறாத புண்கள் அல்லது உடலில் எந்த விதமான வலியும் இல்லாமல் தோன்றும் கட்டிகள். உடலில் எங்காவது ஒரு கட்டி போலவோ அல்லது தடித்த தோல் பகுதியாகவோ மாறினால் அதை உடனடியாக மருத்துவரிடம் காட்ட வேண்டும்.
அதேபோல், காரணமே இல்லாமல் உடல் எடை வேகமாகப் குறைவது ஒரு முக்கியமான எச்சரிக்கை. நீங்கள் எந்த டயட்டும் மேற்கொள்ளாமல், தானாகவே எடை குறையத் தொடங்கினால், அது புற்றுநோயின் அறிகுறியாக இருக்கலாம். கடுமையான சோர்வு, எவ்வளவு ஓய்வு எடுத்தாலும் குறையாத சோர்வு மற்றும் தொடர்ச்சியான காய்ச்சல் போன்றவை ரத்தப் புற்றுநோயின் அறிகுறிகளாக இருக்க வாய்ப்புள்ளது. தொண்டை கரகரப்பு, தொடர்ச்சியான இருமல் அல்லது குரலில் மாற்றம் நீண்ட காலம் நீடித்தால், அது குரல்வளை அல்லது நுரையீரல் புற்றுநோயைக் குறிக்கலாம். பெண்களுக்கு, மார்பகங்களில் ஏற்படும் மாற்றங்கள் அல்லது கட்டிகளைத் தாங்களாகவே சோதித்துக்கொள்வது அவசியம்.
செரிமானப் பிரச்சனைகள், மலம் கழிப்பதில் மாற்றம், சிறுநீரில் ரத்தம் வெளியேறுவது அல்லது மாதவிடாய்க்குப் பிறகான அசாதாரண ரத்தப்போக்கு போன்றவை இருந்தால் உடனடியாக மருத்துவ ஆலோசனை பெற வேண்டும். சில நேரங்களில், காரணமே தெரியாமல் உடலில் வலி இருப்பது, தசைப் பிடிப்பு அல்லது எலும்பு வலி போன்றவை புற்றுநோயின் அறிகுறியாக இருக்கலாம். புற்றுநோய் என்பது ஒரே நாளில் ஏற்படுவதல்ல, இது பல காரணங்களால் செல்கள் மாற்றமடைந்து உருவாகிறது. மரபணு மாற்றங்கள், சுற்றுச்சூழல் மாசுபாடு, புகையிலை பயன்பாடு, முறையற்ற உணவுப் பழக்கம் ஆகியவை முக்கியக் காரணங்களாக இருக்கின்றன.
வருடத்திற்கு ஒருமுறை முழு உடல் பரிசோதனை செய்துகொள்வது மிகவும் அவசியம். 40 வயதிற்கு மேற்பட்டவர்கள் ஸ்கிரீனிங் (Screening) டெஸ்ட் செய்துகொள்வது புத்திசாலித்தனம். அறிகுறிகள் இருப்பவர்கள் மட்டும் மருத்துவரை அணுகுவது தவறான அணுகுமுறை. அறிகுறிகள் இல்லாதபோதே, ஒரு பரிசோதனைக்குச் சென்று பார்ப்பது உங்களை ஒரு பெரிய ஆபத்திலிருந்து காக்கும். புற்றுநோய் சிகிச்சையில் கீமோதெரபி, ரேடியேஷன் மற்றும் அறுவை சிகிச்சை எனப் பல நவீன முறைகள் இப்போது உள்ளன. முன்கூட்டியே கண்டறிந்தால், பலரும் சாதாரண வாழ்க்கைக்குத் திரும்ப முடியும். உங்கள் உடல் என்ன சொல்கிறது என்பதை கவனியுங்கள்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
