.png)
சொந்தமாக பிசினஸ் செய்து வாழ்க்கையில் பெரிய ஆளாக வேண்டும் என்ற கனவோடு களமிறங்கிய ஒரு இளைஞன், இன்று 1 கோடி ரூபாய் கடனில் மூழ்கி, சிபில் (CIBIL) ஸ்கோரும் மொத்தமாகப் பாதிக்கப்பட்டு, தற்கொலை விளிம்பிற்குச் சென்றுள்ள அதிர்ச்சிகரமான கதை சமூக வலைத்தளமான ரெடிட்டில் (Reddit) வெளியாகி பெரும் விவாதத்தை ஏற்படுத்தியுள்ளது. இன்றைய காலகட்டத்தில் ஆன்லைன் உணவு டெலிவரி தளங்களான ஸ்விக்கி, சொமாட்டோ போன்றவற்றின் பெருக்கத்தால் 'கிளவுட் கிச்சன்' (Cloud Kitchen) எனப்படும் உணவக பிசினஸ் மிகவும் பிரபலமாகி வருகிறது. பெரிய அளவில் கடை தேவையில்லை, சமையல் கூடம் மட்டும் இருந்தால் போதும் என்ற விளம்பரங்களை நம்பி, முறையான திட்டமிடல் இல்லாமல் பிசினஸ் தொடங்கினால் என்ன நடக்கும் என்பதற்கு இந்த 26 வயது இளைஞனின் வாழ்க்கை ஒரு மிகச்சிறந்த உதாரணம்.
இந்த இளைஞன் கடந்த இரண்டு ஆண்டுகளுக்கு முன்பு மிகவும் பிரம்மாண்டமான முறையில் ஒரு கிளவுட் கிச்சனைத் தொடங்கினார். ஆரம்பத்தில் கையில் இருந்த சேமிப்பை முதலீடு செய்தவர், பிசினஸை அடுத்த கட்டத்திற்குக் கொண்டு செல்கிறேன் என்ற பெயரில் வங்கிகள் மற்றும் தனியார் நிதி நிறுவனங்களிடம் இருந்து வரிசையாகப் பல கடன்களைப் பெற்றார். ஆனால், ஆன்லைன் உணவு சந்தையில் இருக்கும் கடுமையான போட்டி, பிராண்டிங் செய்வதற்கான அதிகப்படியான செலவுகள், கமிஷன் தொகைகள் மற்றும் ஊழியர்களுக்கான சம்பளம் போன்ற மாதாந்திர செலவுகளை பிசினஸ் மூலம் வந்த வருமானத்தை வைத்துச் சமாளிக்க முடியவில்லை. இதனால், வாங்கிய கடனுக்கான வட்டியைக் கட்டுவதற்கே மீண்டும் மீண்டும் புதிய கடன்களை வாங்கும் ஒரு சுழலுக்குள் அவர் சிக்கிக்கொண்டார்.
தற்போது அவரது மொத்தக் கடன் சுமை 1 கோடி ரூபாயைத் தாண்டியுள்ளது. கடனைத் திருப்பிச் செலுத்த முடியாததால், வங்கிகள் அவரது கணக்குகளை முடக்கியுள்ளன; இதனால் அவரது சிபில் ஸ்கோர் 500-க்கும் கீழே குறைந்து முற்றிலும் சேதமடைந்துள்ளது. சிபில் ஸ்கோர் குறைந்ததால் இனிமேல் எந்தவொரு வங்கியிலும் அவசரத்திற்குக் கூட புதிய கடன் பெற முடியாத சூழ்நிலை ஏற்பட்டுள்ளது. தினமும் கடன் கொடுத்தவர்கள் போன் செய்து மிரட்டுவதாகவும், வீட்டின் வாசலில் வந்து நிற்பதால் தனது குடும்பத்தினரை எதிர்கொள்ள முடியாமல் நிம்மதி இழந்து தவிப்பதாகவும் அவர் அந்தப் பதிவில் உருக்கமாகக் குறிப்பிட்டுள்ளார். இந்த இக்கட்டான சூழ்நிலையிலிருந்து தப்பிக்க ஏதேனும் சட்டப்பூர்வமான வழிகள் அல்லது கடன் மறுசீரமைப்பு (Debt Restructuring) ஆலோசனைகள் இருந்தால் கூறுமாறு அவர் நெட்டிசன்களிடம் உதவி கேட்டுள்ளார்.
இந்த விவகாரம் குறித்துப் பேசிய நிதி ஆலோசகர்கள், இளைஞர்கள் பிசினஸ் தொடங்குவதற்கு முன்பு சந்தையின் தேவையைப் புரிந்து கொள்ள வேண்டும் என்றும், கடன் வாங்கி மட்டுமே பிசினஸை நடத்தலாம் என்று நினைப்பது பேராபத்து என்றும் எச்சரிக்கின்றனர். மேலும், இந்த இளைஞருக்கு இருக்கும் ஒரே வழி 'திவால் நிலை' (Bankruptcy) அறிவிப்பது அல்லது கடன் கொடுத்தவர்களுடன் பேசி வட்டி தள்ளுபடி மற்றும் தவணைக் காலத்தை நீட்டிப்பது (One Time Settlement) மட்டுமே. சொந்த காலில் நிற்க நினைத்த ஒரு இளைஞன், தவறான நிதி மேலாண்மையால் 1 கோடி ரூபாய் கடனாளியாக மாறியுள்ள இந்தச் சம்பவம், தற்போது புதிய ஸ்டார்ட்-அப் தொடங்க நினைக்கும் பலருக்கும் ஒரு மிகப்பெரிய எச்சரிக்கை மணியாக அமைந்துள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
