உயிருக்கு உலை வைக்கும் போலி தடுப்பூசி! இந்தியாவில் பரவும் மரண பயம் - நீங்கள் போட்ட மருந்து உண்மையா?

இந்தியாவில் தற்போது 'அபய்ராப்' (Abhayrab) எனப்படும் ரேபிஸ் தடுப்பூசியின் போலி தொகுப்புகள் புழக்கத்தில் இருப்பதாக ஆஸ்திரேலியா மற்றும் இங்கிலாந்து போன்ற நாடுகள் விடுத்துள்ள எச்சரிக்கை சர்வதேச அளவில் பெரும் பரபரப்பை ஏற்படுத்தியுள்ளது. நவம்பர் 1, 2023 முதல் இந்தியாவில் ரேபிஸ் தடுப்பூசி போட்டுக் கொண்டவர்கள் மீண்டும் ஒருமுறை மருத்துவரைக் கலந்தாலோசிக்க வேண்டும் என ஆஸ்திரேலிய அரசு தனது நாட்டு மக்களுக்கு அறிவுறுத்தியுள்ளது. ரேபிஸ் என்பது அறிகுறிகள் தெரிந்த பிறகு 100 சதவீதம் மரணத்தை விளைவிக்கக்கூடிய நோய் என்பதால், மருந்து போலியாக இருப்பது ஒருவரின் உயிருக்கே நேரடி அச்சுறுத்தலாகும்.

இந்தச் சர்ச்சைக்குக் காரணமான 'அபய்ராப்' தடுப்பூசியைத் தயாரிக்கும் இந்தியன் இம்யூனோலாஜிக்கல்ஸ் லிமிடெட் (IIL) நிறுவனம் இது குறித்து விளக்கம் அளித்துள்ளது. கடந்த ஜனவரி 2025-ல் 'KA24014' என்ற பேட்ச் எண்ணைக் கொண்ட ஒரு குறிப்பிட்ட தொகுப்பில் மட்டும் போலித்தன்மை கண்டறியப்பட்டதாக அந்நிறுவனம் ஒப்புக்கொண்டுள்ளது. ஆனால், அந்த மருந்தின் உள்ளடக்கத்தில் (Composition) தவறு இல்லை என்றும், அரசு விநியோகத்திற்காகத் தயாரிக்கப்பட்ட மருந்துகளைத் தனியார் சந்தைக்குக் கடத்தி விற்பனை செய்வதற்காக அதன் வெளிக்கட்டமைப்பில் (Packaging) மாற்றங்கள் செய்யப்பட்டிருப்பதாகச் சோதனைகளில் தெரியவந்துள்ளது. இருப்பினும், பாதுகாப்பு கருதி சர்வதேச நாடுகள் எச்சரிக்கையைத் தொடர்ந்து வருகின்றன.

டெல்லி, மும்பை, ஆக்ரா, லக்னோ போன்ற நகரங்களில் இத்தகைய போலி தடுப்பூசிகள் புழக்கத்தில் இருந்தது கண்டறியப்பட்டு, அந்தப் பகுதிகளில் அதிரடி சோதனைகளும் நடத்தப்பட்டுள்ளன. இந்தியாவில் ஒவ்வொரு ஆண்டும் வெறிநாய்க்கடியால் ஆயிரக்கணக்கான மரணங்கள் நிகழும் சூழலில், தடுப்பூசியின் நம்பகத்தன்மை கேள்விக்குறியாவது மிகப்பெரிய சுகாதாரப் பிரச்சனையாக உருவெடுத்துள்ளது. குறிப்பாக, கேரளாவில் 2022-ல் தடுப்பூசி போட்டுக் கொண்ட பிறகும் சிலர் ரேபிஸ் நோயால் உயிரிழந்தது இத்தகைய போலி மருந்துகள் மீதான சந்தேகத்தை உறுதிப்படுத்தும் விதமாக அமைந்தது.

நீங்கள் ஒருவேளை நாய் அல்லது பூனை கடித்ததற்காகத் தடுப்பூசி போட்டுக் கொண்டிருந்தால், அது சரியான பிராண்ட்தானா என்பதை உறுதிப்படுத்திக் கொள்ளுங்கள். தடுப்பூசி அட்டையில் உள்ள பேட்ச் எண் மற்றும் தயாரிப்பு தேதியைச் சரிபார்ப்பது அவசியம். உலக சுகாதார அமைப்பின் (WHO) விதிமுறைப்படி, ரேபிஸ் தடுப்பூசி என்பது ஐந்து தவணைகளாகப் போடப்பட வேண்டும். ஒருவேளை நீங்கள் போட்ட ஒரு டோஸ் போலியாக இருந்தாலும், மற்ற டோஸ்கள் உங்கள் உடலில் நோய் எதிர்ப்புச் சக்தியை உருவாக்கியிருக்க வாய்ப்புள்ளது. இருப்பினும், சந்தேகம் இருப்பவர்கள் 'ஆன்டிபாடி' (Antibody) பரிசோதனை செய்து கொள்வது அல்லது மாற்றுத் தடுப்பூசியைப் போட்டுக் கொள்வது பாதுகாப்பானது என நிபுணர்கள் பரிந்துரைக்கின்றனர்.

இந்த விவகாரம் குறித்து இந்திய மருந்துக் கட்டுப்பாட்டு வாரியம் (CDSCO) தற்போது தீவிர விசாரணை நடத்தி வருகிறது. போலி மருந்துகளைத் தயாரிப்பவர்கள் மற்றும் அவற்றை விற்பனை செய்பவர்கள் மீது கடும் நடவடிக்கை எடுக்கப்படும் என அரசு அறிவித்துள்ளது. பொதுமக்கள் தாங்கள் வாங்கும் மருந்துகளை உரிமம் பெற்ற மருந்தகங்களில் மட்டுமே வாங்க வேண்டும் என்றும், மருந்துக்கான ரசீதைப் பெற்றுக்கொள்வது கட்டாயம் என்றும் அறிவுறுத்தப்பட்டுள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.