ஆப்பிளின் முன்னாள் ஊழியர் மீது பாய்ந்த வழக்கு.. ஓப்போ நிறுவனத்துக்கு சிக்கலா?

ஐபோன் தயாரிப்பாளரான ஆப்பிள் நிறுவனம், ஒரு முன்னாள் ஊழியர் மற்றும் சீன நிறுவனமான ஒப்போவுக்கு எதிராகப் பரபரப்பான வழக்குப் பதிவு செய்துள்ளது. ஆப்பிள் வாட்ச் பற்றிய ரகசியத் தகவல்களையும், தொழில் ரகசியங்களையும் திருடி, அவற்றைக் கொண்டு ஒப்போ நிறுவனத்திற்கு ஒரு போட்டியான தயாரிப்பை உருவாக்க உதவுவதாக ஆப்பிள் குற்றம் சாட்டியுள்ளது.

வழக்கின் பின்னணி என்ன?

ஆப்பிள் நிறுவனம், டாக்டர் சென் ஷி (Dr. Chen Shi) என்ற முன்னாள் ஊழியர் மீது வழக்குத் தொடுத்துள்ளது. இவர் ஜனவரி 2020 முதல் ஜூன் 2025 வரை ஆப்பிள் நிறுவனத்தில் 'சென்சார் சிஸ்டம் ஆர்கிடெக்ட்' (Sensor System Architect) ஆகப் பணிபுரிந்து வந்துள்ளார். இந்த உயர் பதவியின் காரணமாக, சென் ஷி-க்கு ஆப்பிள் வாட்ச் தொடர்பான பல முக்கியமான மற்றும் ரகசியத் தகவல்கள், தொழில்நுட்ப வடிவமைப்பு, உற்பத்தித் திட்டங்கள், மற்றும் எதிர்கால தயாரிப்புகளின் வரைபடங்கள் (product roadmaps) ஆகியவற்றை அணுகும் வாய்ப்பு இருந்துள்ளது.

ஆப்பிள் நிறுவனம் தனது புகாரில், சென் ஷி, நிறுவனத்தை விட்டு விலகுவதற்கு முன்னரே, ஒரு நேரடிப் போட்டியாளரிடம் வேலைக்குச் சேர திட்டமிட்டிருந்தார் என்றும், அதைத் தனது சக ஊழியர்களிடமிருந்து மறைத்து, ஒரு இரகசியத் திட்டத்துடன் செயல்பட்டதாகவும் குற்றம் சாட்டியுள்ளது.

ரகசியங்களை எப்படித் திருடினார்?

ஆப்பிள் நிறுவனத்தின் கூற்றுப்படி, சென் ஷி, ஒப்போவில் சேரப்போவதை அறிந்தும், தனது கடைசி நாட்களில் ஆப்பிள் வாட்ச் குழுவின் தொழில்நுட்ப உறுப்பினர்களுடன் பல தனிப்பட்ட சந்திப்புகளை (one-on-one meetings) நடத்தியுள்ளார். இதன்மூலம் அவர்களின் ஆராய்ச்சி மற்றும் மேம்பாட்டு முயற்சிகள் குறித்து முடிந்தவரை தகவல்களைச் சேகரிக்க முயன்றார் என்று கூறப்படுகிறது.

மிகவும் அதிர்ச்சியூட்டும் வகையில், நிறுவனம் வெளியிட்டுள்ள தகவல்களின்படி, சென் ஷி, ஆப்பிளை விட்டு விலகுவதற்கு மூன்று நாட்களுக்கு முன்பு, இரவில், பாதுகாக்கப்பட்ட 'Box folder' என்ற கோப்புப் பெட்டியிலிருந்து 63 முக்கிய ஆவணங்களைப் பதிவிறக்கம் செய்துள்ளார். இந்த ஆவணங்களை, தனது பதவிக்காலத்தின் கடைசி நாளுக்கு ஒரு நாள் முன்பு, ஒரு USB டிரைவில் மாற்றி, திருடியுள்ளார். இந்த நடவடிக்கையை மறைக்க, அவர் தனது ஆப்பிள் மேக்புக்கில், "மேக்புக்கை எப்படி அழிப்பது?" மற்றும் "நான் ஒரு ஷேர் செய்த File Folder-ல் இருந்து ஒரு File-ஐ திறந்தால் அதைக் கண்டறிய முடியுமா?" போன்றவற்றைத் தேடியுள்ளார் என்பதும் வழக்கில் குறிப்பிடப்பட்டுள்ளது.

ரகசிய தகவல்கள் என்னென்ன?

திருடப்பட்டதாகக் கூறப்படும் கோப்புகளில், ஆப்பிள் வாட்ச்சின் சுகாதார சென்சார் தொழில்நுட்பங்கள், இதயத் துடிப்பைக் கண்டறியும் ஒளிக்கற்றை தொழில்நுட்பம் (photoplethysmography- PPG), எலக்ட்ரோகார்டியோகிராம் (ECG) அம்சங்கள் மற்றும் வெப்பநிலையைக் கண்டறியும் முறைகள் போன்ற பல முக்கியமான தகவல்கள் அடங்கும். இவை அனைத்தும் ஆப்பிள் நிறுவனம் பல ஆண்டுகள் செலவிட்டு, கோடிக்கணக்கான டாலர்களை முதலீடு செய்து உருவாக்கியவை.

ஆப்பிளின் புகாரில், சென் ஷி சீன மொழியில் ஒப்போவின் சுகாதார துணைத் தலைவருக்கு ஒரு குறுஞ்செய்தி அனுப்பியதாகவும் குறிப்பிடப்பட்டுள்ளது. அதில், "நான் முடிந்தவரை நிறைய தகவல்களைச் சேகரிக்க முயற்சி செய்து கொண்டிருக்கிறேன், பின்னர் அனைத்தையும் உங்களுடன் பகிர்ந்து கொள்கிறேன்" என்று அவர் கூறியதாக ஆப்பிள் தெரிவித்துள்ளது. அந்தச் செய்திக்கு ஒப்போ அதிகாரி "சரி" என்று பதிலளித்ததாகவும் கூறப்படுகிறது.

ஒப்போவின் பங்கு மற்றும் விளைவுகள்

சென் ஷி, ஆப்பிளை விட்டு வெளியேறிய பின்னர், தனது வயதான பெற்றோரைப் பார்த்துக்கொள்ள சீனாவுக்குத் திரும்புவதாகக் கூறியுள்ளார். ஆனால், அவர் ஒப்போ நிறுவனத்தின் சிலிக்கான் வேலி ஆராய்ச்சி மையத்தில் ஒரு சென்சார் தொழில்நுட்பக் குழுவுக்குத் தலைமைப் பொறுப்பேற்றது பின்னர் கண்டுபிடிக்கப்பட்டது.

ஆப்பிள் நிறுவனம், ஒப்போவும் இந்தத் திருட்டுக்கு உடந்தையாக இருந்து, அதை ஊக்குவித்துள்ளது என்று குற்றம் சாட்டுகிறது. இந்த வழக்கு, அமெரிக்க நிறுவனங்களுக்கும் சீனப் போட்டியாளர்களுக்கும் இடையே உள்ள தொழில்நுட்பப் போர் மற்றும் அறிவுசார் சொத்துரிமை (intellectual property) பாதுகாப்பு குறித்த ஒரு முக்கிய விவாதத்தைத் தொடங்கியுள்ளது.

இந்த வழக்கு வெற்றி பெற்றால், ஒப்போவுக்கு பெரிய அளவில் அபராதம் விதிக்கப்படலாம் அல்லது அந்தத் திருடப்பட்ட தொழில்நுட்பத்தைப் பயன்படுத்துவதிலிருந்து தடுக்கப்படலாம். ஒரு நிறுவனத்தின் புதுமை மற்றும் ஆராய்ச்சிக்கு இது ஒரு பெரிய அச்சுறுத்தலாகப் பார்க்கப்படுகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.