iPhone, Samsung ஆதிக்கத்துக்கு மத்தியில் உருவாகும் புதிய ‘இந்திய Brand’ திட்டம்! CMF-ன் அடுத்த பெரிய நகர்வு என்ன?

இந்தியாவில் செல்போன் பயன்படுத்துபவர்களின் எண்ணிக்கை தொடர்ந்து அதிகரித்து வருகிறது. ஒவ்வொரு ஆண்டும் கோடிக்கணக்கான smartphones இந்தியாவில் விற்பனையாகின்றன. அதே நேரத்தில், வெளிநாட்டு நிறுவனங்களுக்காக செல்போன்களை இந்தியாவிலேயே தயாரிக்கும் தொழிற்சாலைகளும் அதிகரித்துள்ளன.

ஆனால், இவ்வளவு பெரிய சந்தையும் உற்பத்தி வசதியும் இருந்தும், உலக அளவில் தனக்கென ஒரு பெரிய இந்திய செல்போன் நிறுவனம் உருவாகவில்லை என்பது நீண்டகால கேள்வியாக இருந்து வருகிறது. இந்த நிலையில், இந்தியாவை அடிப்படையாகக் கொண்டு புதிய செல்போன் நிறுவனத்தை உருவாக்கும் முயற்சி ஒன்று கவனம் பெற்றுள்ளது.

பிரபல தொழில்நுட்ப நிறுவனமான Nothing-ன் கீழ் செயல்பட்டு வந்த CMF, இனி இந்தியாவை தலைமையிடமாகக் கொண்டு தனி நிறுவனமாக செயல்பட உள்ளது. இந்த புதிய நிறுவனத்தில் இந்தியர்களின் பங்கு பெரும்பான்மையாக இருக்கும் என்றும், Nothing தொடர்ந்து அதனுடன் இணைந்து செயல்படும் என்றும் தெரிவிக்கப்பட்டுள்ளது.

இதன் பின்னணியில் ஒரு முக்கியமான நோக்கம் இருக்கிறது. இந்தியாவில் செல்போன்களை தயாரிப்பது மட்டுமல்லாமல், அவற்றை உருவாக்கும் தொழில்நுட்ப அறிவும் நாட்டிலேயே வளர வேண்டும் என்பதே அந்த நோக்கம். ஒரு செல்போனின் வடிவமைப்பு முதல் அதன் செயல்பாடு வரை பல்வேறு கட்டங்களில் இந்திய திறமைகளை பயன்படுத்த வேண்டும் என்பதற்கும் முக்கியத்துவம் அளிக்கப்படுகிறது.

தற்போது இந்தியாவில் விற்பனை செய்யப்படும் செல்போன்களில் பெரும்பாலானவை நாட்டிலேயே தயாரிக்கப்படுகின்றன. இது கடந்த சில ஆண்டுகளில் ஏற்பட்ட மிகப்பெரிய மாற்றமாக பார்க்கப்படுகிறது. முன்பு வெளிநாடுகளில் இருந்து அதிக அளவில் செல்போன்கள் இறக்குமதி செய்யப்பட்ட நிலையில், தற்போது இந்தியாவில் உள்ள தொழிற்சாலைகளில் அவற்றை தயாரிக்கும் நிலை உருவாகியுள்ளது.

ஆனால் இங்கு ஒரு முக்கியமான வித்தியாசம் உள்ளது. ஒரு வெளிநாட்டு நிறுவனத்தின் செல்போனை இந்தியாவில் தயாரிப்பது ஒரு விஷயம். இந்தியாவிலேயே ஒரு செல்போன் நிறுவனத்தை உருவாக்கி, அதன் தயாரிப்பை உலக நாடுகளுக்கு விற்பது என்பது முற்றிலும் வேறுபட்ட விஷயம். இதைத்தான் அடுத்த கட்டமாக மாற்ற வேண்டும் என்ற நோக்கம் தற்போது உருவாகியுள்ளது.

இதற்கு காரணம் இந்தியாவின் மிகப்பெரிய செல்போன் சந்தை. ஆண்டுக்கு 15 கோடிக்கும் அதிகமான smartphones இந்தியாவில் விற்பனையாகும் அளவுக்கு சந்தை வளர்ந்துள்ளது. இவ்வளவு பெரிய வாடிக்கையாளர் சந்தை இருக்கும் நிலையில், இந்திய நிறுவனங்களால் ஏன் உலக அளவில் போட்டியிடக்கூடிய செல்போன் நிறுவனத்தை உருவாக்க முடியவில்லை என்ற கேள்வியும் எழுகிறது.

ஒரு காலத்தில் இந்திய நிறுவனங்களான Micromax, Lava, Karbonn போன்ற பெயர்கள் செல்போன் சந்தையில் பரவலாக அறியப்பட்டிருந்தன. குறைந்த விலையில் பல்வேறு அம்சங்களுடன் செல்போன்களை வழங்கியதால், இந்திய நிறுவனங்களுக்கு நல்ல வரவேற்பும் கிடைத்தது. சில ஆண்டுகளில் இந்திய நிறுவனங்கள் சந்தையில் குறிப்பிடத்தக்க இடத்தையும் பிடித்திருந்தன.

ஆனால் காலப்போக்கில் Samsung, Apple, Xiaomi, Vivo, Oppo உள்ளிட்ட சர்வதேச நிறுவனங்கள் தங்களது தயாரிப்புகளில் தொடர்ந்து புதிய தொழில்நுட்பங்களை கொண்டு வந்தன. குறிப்பாக கேமரா, மென்பொருள், பேட்டரி, வேகம், வடிவமைப்பு போன்ற விஷயங்களில் போட்டி அதிகரித்தது. இதற்கு ஏற்ப இந்திய நிறுவனங்களால் தொடர்ந்து முதலீடு செய்ய முடியாததால், அவற்றின் சந்தைப் பங்கு படிப்படியாக குறைந்தது.

இப்போது அந்த நிலையை மாற்றுவதற்கான வாய்ப்பாக புதிய முயற்சிகள் பார்க்கப்படுகின்றன. இந்திய அரசு சமீபத்தில் செல்போன் உற்பத்தியை மேலும் அதிகரிக்க ரூ.62,500 கோடி மதிப்பிலான திட்டத்தை கொண்டு வந்துள்ளது. இதில் இந்திய நிறுவனங்கள் உருவாகவும், நாட்டிலேயே தயாரிப்பு மற்றும் தொழில்நுட்ப திறனை வளர்க்கவும் ஊக்கமளிக்கும் நடவடிக்கைகள் இடம்பெற்றுள்ளன.

இதுபோன்ற சூழலில் CMF தனி நிறுவனமாக உருவாவது முக்கியத்துவம் பெறுகிறது. செல்போன்களை தயாரிப்பதில் மட்டும் கவனம் செலுத்தாமல், அவற்றின் வடிவமைப்பு, தொழில்நுட்ப மேம்பாடு மற்றும் புதிய தயாரிப்புகளை உருவாக்குவதற்கான ஆராய்ச்சியிலும் இந்தியாவில் முதலீடு செய்ய திட்டமிடப்பட்டுள்ளது.

ஒரு செல்போனை உருவாக்குவதில் அதன் வெளிப்புற தோற்றம் மட்டும் முக்கியமல்ல. கேமரா எப்படி செயல்பட வேண்டும், பேட்டரி எவ்வளவு நேரம் நீடிக்க வேண்டும், செல்போன் அதிகமாக சூடாகாமல் இருப்பது எப்படி, இணைய இணைப்பு சிறப்பாக கிடைப்பது எப்படி, மென்பொருள் எவ்வாறு தொடர்ந்து மேம்படுத்தப்பட வேண்டும் என பல விஷயங்கள் உள்ளன.

இவற்றுக்கான தீர்வுகளை இந்தியாவிலேயே உருவாக்கும் திறன் வளர வேண்டும் என்பதே நீண்டகால இலக்காக பார்க்கப்படுகிறது. இதற்காக இந்தியாவில் தனியான பொறியியல் மற்றும் ஆராய்ச்சிக் குழுவை உருவாக்கும் திட்டமும் CMF-க்கு உள்ளது. ஏற்கனவே Nothing நிறுவனத்திடம் இருக்கும் தொழில்நுட்ப அறிவு, உற்பத்தி தொடர்புகள் மற்றும் உலக சந்தை அனுபவம் ஆகியவற்றை புதிய நிறுவனத்துடன் இணைக்கும் முயற்சியும் மேற்கொள்ளப்பட உள்ளது.

இதன் இலக்கு சிறியதாகவும் இல்லை. ஆண்டுக்கு 10 கோடி smartphones வரை தயாரித்து விற்பனை செய்யக்கூடிய அளவுக்கு CMF நிறுவனத்தை வளர்க்க வேண்டும் என்று அதன் தலைமை நிர்வாகி Carl Pei தெரிவித்துள்ளார். இத்தகைய பெரிய அளவில் உற்பத்தி செய்யும் திறன் உருவானால், செல்போன் தயாரிப்புக்கு தேவையான பல்வேறு உதிரிபாகங்களை இந்திய நிறுவனங்களிடமிருந்தே பெறுவதற்கும் புதிய வாய்ப்புகள் உருவாகலாம்.

இந்த மாற்றம் CMF நிறுவனத்துக்கு மட்டுமல்லாமல், இந்திய செல்போன் தொழில்துறைக்கும் முக்கியமானதாக இருக்கலாம். ஏனெனில் இந்தியா ஏற்கனவே உலகின் மிகப்பெரிய செல்போன் சந்தைகளில் ஒன்றாகவும், முக்கியமான உற்பத்தி மையமாகவும் வளர்ந்து வருகிறது. அடுத்த கட்டமாக, இந்தியாவிலேயே செல்போன்களை வடிவமைத்து, தொழில்நுட்பத்தை உருவாக்கி, உலக நாடுகளில் விற்பனை செய்யக்கூடிய நிறுவனங்கள் உருவாக வேண்டும் என்பதே எதிர்பார்ப்பாக உள்ளது.

ஒரு காலத்தில் “இந்தியாவில் தயாரிக்கப்பட்ட செல்போன்” என்றால் குறைந்த விலை தயாரிப்பு என்ற எண்ணம் இருந்தது. ஆனால் அடுத்த சில ஆண்டுகளில் அந்த பார்வை மாறுவதற்கான வாய்ப்பு உள்ளது. இந்தியாவின் பெரிய சந்தை, வளர்ந்து வரும் தொழில்நுட்ப திறன், உற்பத்தி கட்டமைப்பு ஆகியவை ஒன்றாக இணைந்தால், உலக சந்தையில் இந்திய பெயருடன் போட்டியிடும் செல்போன் நிறுவனங்கள் உருவாகலாம்.

CMF எடுத்துள்ள இந்த புதிய பாதை அந்த மாற்றத்தின் தொடக்கமாக அமையுமா என்பதுதான் இனி கவனிக்க வேண்டிய விஷயம். இந்தியாவில் செல்போன்களை தயாரிப்பதில் இருந்து, இந்தியாவிலேயே ஒரு செல்போன் நிறுவனத்தை உருவாக்கி உலக சந்தையை நோக்கி செல்வது வரை இந்தப் பயணம் வெற்றி பெற்றால், நாட்டின் மின்னணு சாதனத் துறையில் அது ஒரு முக்கியமான மாற்றமாக இருக்கும்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.