.png)
நண்பர் ஒருவருடன் வாட்ஸ்அப்பில் பேச வேண்டும். ஆனால், அவரிடம் வாட்ஸ்அப் கணக்கே இல்லை என்றால் என்ன செய்வது? இதற்காக வேறு செயலியைப் பதிவிறக்கம் செய்யச் சொல்ல வேண்டியிருக்கும். இனி அந்தச் சிரமம் தேவையில்லை. வாட்ஸ்அப் கணக்கு இல்லாதவர்களும் இணைய இணைப்பு மூலம் அழைப்பில் பங்கேற்கும் புதிய வசதியை மெட்டா நிறுவனம் அறிமுகப்படுத்தத் தொடங்கியுள்ளது. அழைப்புக்கான லிங்கை அனுப்பினால் போதும்; அதைத் திறந்து கணினி வழியாகவே உரையாடலில் இணைய முடியும்.
இந்த வசதி குறிப்பாக அலுவலகக் கூட்டங்கள், ஆன்லைன் ஆலோசனைகள், நண்பர்கள் மற்றும் குடும்பத்தினருடனான உரையாடல்களுக்கு உதவியாக இருக்கும். உதாரணமாக, அலுவலகத்தில் ஒரு கூட்டத்தை நடத்தும்போது, அதில் கலந்துகொள்ள வேண்டிய நபரிடம் வாட்ஸ்அப் இல்லாமல் இருக்கலாம். இதற்காக அவர் புதிதாகக் கணக்கு தொடங்க வேண்டிய அவசியமில்லை. கூட்டத்தை ஏற்பாடு செய்பவர் வாட்ஸ்அப்பில் ஓர் அழைப்பு இணைப்பை உருவாக்கி அனுப்பினால் போதும். அந்த இணைப்பைத் திறந்து, தனது பெயரை உள்ளிட்டு, அழைப்பில் இணையக் கோரிக்கை விடுக்கலாம்.
இந்த வசதிக்கு ‘Guest Calling’ என்று பெயரிடப்பட்டுள்ளது. வழக்கமாக வாட்ஸ்அப்பில் அழைப்பைத் தொடங்குவதற்கு அந்தச் செயலியில் கணக்கு இருக்க வேண்டும். புதிய முறையிலும் அழைப்பை உருவாக்குபவருக்கு வாட்ஸ்அப் கணக்கு அவசியம். ஆனால், அழைப்பில் கலந்துகொள்ளும் மற்றவர்களுக்கு அது தேவையில்லை. அதாவது, வாட்ஸ்அப் பயன்படுத்துபவர் அழைப்பை ஏற்பாடு செய்து, கணக்கு இல்லாதவர்களையும் அதில் சேர்த்துக்கொள்ள முடியும். இதன் மூலம் ஒரே செயலியை அனைவரும் பயன்படுத்த வேண்டும் என்ற கட்டாயம் ஓரளவுக்குக் குறைகிறது.
அழைப்பை உருவாக்குவதும் சிக்கலான வேலை இல்லை. வாட்ஸ்அப்பில் உள்ள ‘Calls’ பகுதிக்குச் சென்று, புதிய அழைப்புக்கான ‘+’ குறியீட்டைத் தேர்வு செய்ய வேண்டும். பின்னர் அழைப்புக்கான இணைப்பை உருவாக்கி, அதில் பங்கேற்க வேண்டியவர்களுடன் பகிரலாம். இந்தச் செயலை மொபைல் செயலி மூலமாகவோ, கணினியில் உள்ள வாட்ஸ்அப் இணைய வசதி மூலமாகவோ செய்யலாம். இணைப்பைப் பெறுபவர் அதைத் தனது கணினியின் இணைய உலாவியில் திறந்து பெயரை உள்ளிட்டு உள்ளே வரக் கோரிக்கை விடுக்கலாம்.
ஆனால், இங்கே ஒரு முக்கியமான விஷயத்தைக் கவனிக்க வேண்டும். வாட்ஸ்அப் கணக்கு இல்லாதவர்கள் தற்போது மொபைல் இணைய உலாவி வழியாக இந்த அழைப்புகளில் இணைய முடியாது. கணினி இணைய உலாவி மூலமாகத்தான் விருந்தினர்கள் பங்கேற்க முடியும் என்று தெரிவிக்கப்பட்டுள்ளது. எனவே, மொபைல் போனில் மட்டுமே இணைய வசதி உள்ளவர்கள் இந்தப் புதிய வசதியைப் பயன்படுத்துவதில் சிரமம் இருக்கலாம்.
ஒரே அழைப்பில் அதிகபட்சம் 32 பேர் வரை பங்கேற்க முடியும். தனிநபர் அழைப்புகளுக்கும் குழு அழைப்புகளுக்கும் இந்த வசதி பயன்படும். அழைப்புக்குக் குறிப்பிட்ட நேர வரம்பு கிடையாது. நீண்ட நேரம் பேச வேண்டியிருந்தாலும், நேரம் முடிந்துவிடும் என்ற கவலை இல்லாமல் உரையாடலாம். மேலும், இந்த அழைப்புகள் இலவசமாக வழங்கப்படுகின்றன. இணைய இணைப்பு மற்றும் அதற்கான டேட்டா பயன்பாடு மட்டும் தேவைப்படும். அழைப்பில் பேசுவதோடு மட்டுமல்லாமல், கணினித் திரையையும் மற்றவர்களுடன் பகிர்ந்துகொள்ள முடியும்.
அலுவலகக் கூட்டத்தில் ஒரு ஆவணத்தை விளக்க வேண்டியிருந்தாலோ, கணினியில் உள்ள தகவலை மற்றவர்களுக்குக் காட்ட வேண்டியிருந்தாலோ இது உதவும். பேசுவதற்கான வாய்ப்பைக் கோர கையை உயர்த்தும் வசதியும் உள்ளது. கட்டைவிரலை உயர்த்துவது, இதயக் குறியீட்டை அனுப்புவது போன்ற எளிய எதிர்வினைகளையும் தெரிவிக்கலாம். இதனால், நேரில் சந்திக்காமல் நடைபெறும் கூட்டங்களிலும் கருத்துகளை வெளிப்படுத்துவது சுலபமாகும்.
விருந்தினர்கள் அழைப்பில் நுழைவதற்கும் சில விதிமுறைகள் உள்ளன. லிங்கைத் திறந்தவுடன் அவர்கள் தானாகவே உரையாடலில் சேர முடியாது. முதலில் காத்திருப்புப் பகுதியில் இருக்க வேண்டும். அழைப்பை ஏற்பாடு செய்தவர் அனுமதி அளித்த பிறகுதான் பேச முடியும். தேவையெனில், அழைப்பில் இருந்து ஒருவரை வெளியேற்றவும் ஏற்பாட்டாளருக்கு அதிகாரம் உள்ளது. விருந்தினர்களால் அழைப்பில் உள்ள மற்றவர்களின் தொலைபேசி எண்களைப் பார்க்க முடியாது. அவர்களால் அழைப்புக்குள் குறுஞ்செய்திகளை அனுப்பவோ, தாங்களாகவே வேறு நபர்களைச் சேர்க்கவோ முடியாது.
தனியுரிமையைப் பொறுத்தவரை, விருந்தினர்கள் பங்கேற்கும் அழைப்புகளும் தொடக்கம் முதல் முடிவு வரை குறியாக்கம் செய்யப்பட்டிருக்கும். அதாவது, உரையாடலின் உள்ளடக்கத்தைப் பாதுகாக்கும் தொழில்நுட்பம் பயன்படுத்தப்படுகிறது. இருந்தாலும், அழைப்புக்கான இணைப்பைப் பகிரும்போது கவனமாக இருக்க வேண்டும். தெரிந்தவர்களுக்கு மட்டுமே அனுப்புவதும், அழைப்பில் இணையக் கோரிக்கை விடுக்கும் நபரைச் சரிபார்த்த பிறகு அனுமதிப்பதும் நல்லது.
இத்துடன், கூகுள் காலண்டர் மற்றும் மைக்ரோசாஃப்ட் அவுட்லுக் காலண்டர் வழியாகவும் வாட்ஸ்அப் அழைப்புகளை ஏற்பாடு செய்யும் வசதியை இந்த ஆண்டின் பிற்பகுதியில் அறிமுகப்படுத்தத் திட்டமிடப்பட்டுள்ளது. இதன் மூலம் கூட்டத்துக்கான அழைப்பிதழிலேயே வாட்ஸ்அப் அழைப்பு இணைப்பைச் சேர்க்க முடியும். அழைப்பிதழைப் பெறுபவரிடம் வாட்ஸ்அப் கணக்கு இல்லாவிட்டாலும், அவர் அதில் இணைய முடியும்.
வாட்ஸ்அப் கணக்கு இல்லாதவர்களையும் அழைப்பில் சேர்க்கும் இந்த வசதி, குறிப்பாகக் கணினி வழியாகக் கூட்டங்களில் பங்கேற்பவர்களுக்கு உதவியாக இருக்கும். இருப்பினும், தற்போது கணினி உலாவி வழியாக மட்டுமே விருந்தினர்கள் இணைய முடியும் என்ற கட்டுப்பாடு உள்ளது. இந்த வசதி அனைவருக்கும் படிப்படியாகக் கிடைக்கத் தொடங்கியுள்ள நிலையில், தங்கள் கணக்கில் இது வந்துள்ளதா என்பதை வாட்ஸ்அப் பயனர்கள் செயலியின் அழைப்புப் பகுதியில் சரிபார்த்துக்கொள்ளலாம்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்
