.png)
அமெரிக்கா, ஈரான் மற்றும் இஸ்ரேல் நாடுகளுக்கு இடையே நடந்து வரும் போர் பதற்றம் காரணமாக, கடந்த சில மாதங்களாகவே இந்தியா முழுவதும் பெட்ரோல், டீசல், காஸ் சிலிண்டர் மற்றும் அத்தியாவசிய உணவுப் பொருட்களின் விலைவாசி ஜெட் வேகத்தில் உயர்ந்து வருகிறது. இந்த சர்வதேசப் பணவீக்கத்திற்கு நடுவே, இந்தியாவின் உள்ளூர்ச் சேவைகளின் கட்டணங்கள் நகரத்திற்கு நகரம் எவ்வளவு மாறுபடுகின்றன என்பதைப் பற்றிய ஒரு சுவாரசியமான விவாதம் தற்போது சமூக வலைதளங்களில் காட்டுத்தீ போலப் பரவி வருகிறது. பெங்களூருவைச் சேர்ந்த தொழிலதிபரான சஜித் பை என்பவர், தான் சமீபத்தில் நொய்டாவில் இருந்து பெங்களூருவின் இந்திரா நகர் பகுதிக்குக் குடிபெயர்ந்த பிறகு, அங்குள்ள இஸ்திரி (Ironing) கட்டணங்களைப் பார்த்துப் பெரும் அதிர்ச்சியடைந்ததாக எக்ஸ் தளத்தில் பதிவிட்டதே இந்த விவாதத்திற்குக் காரணமாகும்.
தான் இதற்கு முன்னால் வசித்த நொய்டா நகரில் ஒரு துணியை அயர்ன் செய்வதற்கு வெறும் 5 ரூபாய் மட்டுமே வாங்கியதாகக் குறிப்பிட்டுள்ள சஜித் பை, பெங்களூருவில் விலைவாசி கொஞ்சம் அதிகமாக இருக்கும் என்று தான் எதிர்பார்த்ததாகக் கூறியுள்ளார். ஆனால், அவர் தற்போதைய இந்திரா நகர் பகுதியில் ஒரு சட்டை அல்லது துணியை அயர்ன் செய்யக் குறைந்தது 12 ரூபாய் முதல் 20 ரூபாய் வரை கட்டணம் வசூலிப்பதைப் பார்த்து வாயடைத்துப் போயுள்ளார். இந்தியாவின் மிக விலையுயர்ந்த நகரமாகக் கருதப்படும் மும்பையில் இருந்து பெங்களூருவுக்குக் குடிபெயர்ந்தவர்கள் கூட, இங்குள்ள அதிகப்படியான இஸ்திரி கட்டணத்தைக் கண்டு ஆச்சரியப்படுவதாக அவர் தனது பதிவில் சுட்டிக்காட்டியுள்ளார்.
பெங்களூருவில் இந்த அளவுக்குக் கட்டணம் அதிகமாக இருப்பதற்குப் பின்னால் இருக்கும் ஒரு முக்கியமான தொழில்முறை காரணத்தையும் சஜித் பை விளக்கியுள்ளார். டெல்லி மற்றும் நொய்டா போன்ற வட இந்திய நகரங்களில் பாரம்பரியமாகக் கரிக்கட்டைகளைப் பயன்படுத்தி இஸ்திரி பெட்டிகளைச் சூடாக்குகிறார்கள். ஆனால், பெங்களூருவில் உள்ள இஸ்திரி கடைக்காரர்கள் பெரும்பாலானோர் எல்பிஜி (LPG) காஸ் சிலிண்டர் மூலம் இயங்கும் நவீன அயர்ன் பாக்ஸ்களைப் பயன்படுத்துகிறார்கள். வட இந்தியாவில் தந்தூரி உணவகங்கள் அதிகம் இருப்பதால் அங்கு அயர்ன் பாக்ஸிற்குத் தேவைப்படும் கரிக்கட்டைகளின் விலை குறைவாக இருக்கிறதோ? என்ற தனது புதிய சந்தேகத்தையும் அவர் நெட்டிசன்களிடம் கேள்வியாக முன்வைத்துள்ளார்.
இந்தத் தகவல் இணையத்தில் வைரலானதைத் தொடர்ந்து, இந்தியாவின் பல்வேறு நகரங்களைச் சேர்ந்த நெட்டிசன்கள் தங்களது பகுதியில் இருக்கும் அயர்ன் கட்டணங்களை கமெண்ட்டுகளில் பகிர்ந்து வருகின்றனர். சூரத் நகரில் சாதாரண அயர்ன் செய்ய 10 ரூபாயும், ஸ்டீம் அயர்ன் செய்ய 25 ரூபாயும் வாங்குவதாகவும், வாரத்தில் மூன்று நாட்கள் வீட்டிற்கே வந்து துணிகளை எடுத்துச் சென்று டெலிவரி செய்யும் வசதி இலவசமாக வழங்கப்படுவதாகவும் ஒரு பயனர் பதிவிட்டுள்ளார். அதேபோல், தானே பகுதியைச் சேர்ந்த மற்றொரு பயனர், தங்களது பகுதியில் சாதாரண அயர்னுக்கு 7 ரூபாயும், ஸ்டீம் அயர்னுக்கு 20 ரூபாயும் வாங்குவதாகக் குறிப்பிட்டு, மும்பையை விடப் பெங்களூருவில் இவ்வளவு கட்டணமா என்று ஆச்சரியம் தெரிவித்துள்ளார்.
இருப்பினும், இந்த விவாதத்தில் இஸ்திரி தொழிலாளர்களுக்கு ஆதரவாகப் பல நெட்டிசன்கள் தங்களின் கருத்துக்களைத் தெரிவித்து வருகின்றனர். துணிகளை அயர்ன் செய்வது என்பது நாள் முழுவதும் நின்றுகொண்டே, அதிக உடல் உழைப்பைத் தந்து செய்ய வேண்டிய ஒரு கடினமான வேலையாகும். இதில் ஏற்படும் உடல் ரீதியான பாதிப்புகள் மற்றும் ஆபத்துக்களைக் கணக்கிடும் போது, பெங்களூரு வியாபாரிகள் வாங்கும் 15 முதல் 20 ரூபாய் என்பது எவ்விதத்திலும் கூடுதல் கட்டணம் இல்லை என்று அவர்கள் வாதிட்டுள்ளனர். மேலும், கார் கிளீனிங், வீட்டு வேலை செய்பவர்கள், சமையல்காரர்கள் மற்றும் இஸ்திரி போன்ற மனித உழைப்பு அதிகம் தேவைப்படும் அனைத்து உள்ளூர்ச் சேவைகளும், தென்னிந்திய மெட்ரோ நகரங்களுடன் ஒப்பிடும்போது வட இந்தியப் பகுதிகளில் எப்போதுமே கொஞ்சம் விலை குறைவாகத்தான் இருக்கும் என்று மற்றொரு பயனர் இந்த விவாதத்திற்கு முற்றுப்புள்ளி வைத்துள்ளார்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்
