தங்கம் வாங்க வேண்டாம் என்ற வேண்டுகோளுக்கு மக்கள் ஆதரவு! விலை குறைந்ததால் மகிழ்ச்சி... பிரதமர் மோடி பாராட்டு!

உத்தரப் பிரதேச மாநிலம் லக்னோவில் நடைபெற்ற ஐந்தாவது தேசிய திறன் பட்டமளிப்பு விழாவில் பிரதமர் மோடி பங்கேற்றுப் பேசினார்.
PM Modi gold buying appeal
PM Modi gold buying appeal
Published on: 
Updated on: 
2 min read

இந்திய மக்கள் தேவையற்ற செலவுகளைக் குறைத்து நாட்டின் பொருளாதார நலனுக்காகச் செயல்பட வேண்டும் என்று பிரதமர் நரேந்திர மோடி விடுத்த வேண்டுகோளுக்கு மக்கள் நல்ல வரவேற்பு அளித்துள்ளதாக அவர் தெரிவித்துள்ளார். குறிப்பாக, அத்தியாவசியத் தேவை இல்லாமல் ஓராண்டுக்கு தங்கம் வாங்குவதைத் தவிர்க்க வேண்டும் என்ற தனது கோரிக்கையை மக்கள் ஏற்றுக்கொண்டதாகவும், இதனால் தங்கத்தின் விலை குறைந்துள்ளதாகவும் அவர் மகிழ்ச்சி தெரிவித்துள்ளார். உத்தரப் பிரதேச மாநிலம் லக்னோவில் நடைபெற்ற ஐந்தாவது தேசிய திறன் பட்டமளிப்பு விழாவில் பிரதமர் மோடி பங்கேற்றுப் பேசினார். அப்போது, நாட்டின் பொருளாதார நிலை, மக்களின் ஒத்துழைப்பு மற்றும் இளைஞர்களுக்கான திறன் பயிற்சியின் முக்கியத்துவம் குறித்து அவர் கருத்துகளைப் பகிர்ந்துகொண்டார்.

கடந்த ஓராண்டுக்கு முன்பு, அத்தியாவசியத் தேவை இல்லாதவர்கள் தங்கம் வாங்குவதை ஒரு ஆண்டுக்குத் தவிர்க்க வேண்டும் என்று நாட்டு மக்களிடம் கேட்டுக்கொண்டதாக அவர் நினைவுகூர்ந்தார். தற்போது அந்த வேண்டுகோளை மக்கள் ஏற்றுக்கொண்டு தங்கம் வாங்குவதைக் குறைத்துள்ளதாகவும் அவர் குறிப்பிட்டார். இதுகுறித்துப் பேசிய பிரதமர், முன்பு நாட்டின் முன்னாள் பிரதமர் லால் பகதூர் சாஸ்திரி, மக்கள் வாரத்தில் ஒரு நாள் ஒரு வேளை உணவைத் தவிர்க்க வேண்டும் என்று வேண்டுகோள் விடுத்தபோது, மக்கள் அதற்கு ஒத்துழைப்பு அளித்தனர். அதேபோன்ற தேச உணர்வும் ஒத்துழைப்பும் இன்றும் மக்களிடம் தொடர்வதாகத் தெரிவித்தார். ஒரு சாதாரண மனிதரான தனது வேண்டுகோளையும் மக்கள் மதித்து ஏற்றுக்கொண்டது மகிழ்ச்சி அளிப்பதாக அவர் கூறினார்.

தங்கம் வாங்குவதைக் குறைத்ததால் தங்களது பணத்தைச் சேமிக்க முடிந்ததாகப் பலரும் தன்னிடம் தெரிவிப்பதாகவும் மோடி குறிப்பிட்டார். தேவையற்ற செலவுகளைக் கட்டுப்படுத்துவது தனிநபர் சேமிப்புக்கு மட்டுமின்றி நாட்டின் பொருளாதாரத்துக்கும் உதவக்கூடும் என்பதையே இந்த வேண்டுகோள் வலியுறுத்துவதாக அவரது பேச்சு அமைந்தது. தற்போதைய சர்வதேச சூழலும் இந்த வேண்டுகோளுக்குப் பின்னணியாக உள்ளது. அமெரிக்கா மற்றும் ஈரான் இடையிலான போர் பதற்றம் காரணமாக உலக அளவில் எரிசக்தி விலைகள் அதிகரிக்கும் கவலை ஏற்பட்டுள்ளது. இதனால் எரிபொருள் பயன்பாட்டைக் குறைக்கவும், தேவையற்ற தங்கக் கொள்முதலைத் தவிர்க்கவும் பிரதமர் பொதுக்கூட்டங்களில் மக்களிடம் கேட்டுக்கொண்டிருந்தார்.

இந்தியாவில் தங்கம் என்பது வெறும் ஆபரணமாக மட்டும் பார்க்கப்படுவதில்லை. திருமணம், குடும்ப விழாக்கள், பண்டிகைகள் எனப் பல நிகழ்வுகளிலும் தங்கத்துக்கு முக்கிய இடம் உண்டு. அதேபோல், பல குடும்பங்கள் தங்களது சேமிப்பின் ஒரு பகுதியாகவும் தங்கத்தை வாங்குகின்றன. இத்தகைய சூழலில் தங்கம் வாங்குவதைக் குறைக்க வேண்டும் என்ற வேண்டுகோள் மக்களிடையே விவாதத்தை ஏற்படுத்தியது. லக்னோவில் நடைபெற்ற விழாவில் இளைஞர்களின் வேலைவாய்ப்பு குறித்தும் பிரதமர் முக்கியமான கருத்தைத் தெரிவித்தார். எதிர்காலத்தில் கல்விச் சான்றிதழ்களை விட நடைமுறைத் திறன்களுக்கு அதிக மதிப்பு கிடைக்கும் என்று அவர் கூறினார். வெறும் பட்டப்படிப்பை முடித்திருப்பது மட்டுமே வேலைவாய்ப்பைப் பெற்றுத்தராது என்றும், ஒரு பணியைச் சிறப்பாகச் செய்யத் தேவையான திறன்களை வளர்த்துக்கொள்வது அவசியம் என்றும் அவரது பேச்சு உணர்த்தியது.

தொழில்நுட்பம் வேகமாக வளர்ந்து வரும் காலத்தில், நிறுவனங்கள் பணியாளர்களின் உண்மையான திறமைகளுக்கு முக்கியத்துவம் அளிக்கத் தொடங்கியுள்ளன. எனவே, இளைஞர்கள் தங்களது கல்வியுடன் சேர்த்து தொழில்நுட்பம், தொழில் பயிற்சி மற்றும் நடைமுறை அனுபவத்தையும் வளர்த்துக்கொள்ள வேண்டும் என்ற கருத்தையும் அவர் முன்வைத்தார். ஒருபுறம் நாட்டின் பொருளாதார நலனுக்காக மக்கள் செலவுகளைக் கட்டுப்படுத்த வேண்டும் என்றும், மறுபுறம் இளைஞர்கள் தங்களது திறன்களை மேம்படுத்திக்கொள்ள வேண்டும் என்றும் பிரதமர் வலியுறுத்தியுள்ளார். மக்களின் ஒத்துழைப்பும் இளைஞர்களின் திறன் வளர்ச்சியும் நாட்டின் எதிர்கால முன்னேற்றத்தில் முக்கியப் பங்கு வகிக்கும் என்பதே அவரது உரையின் முக்கிய அம்சமாக இருந்தது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.