தமிழ்நாடு கண்ணுக்கு தெரியலையா சுந்தர் பிச்சை ஜி? அக்கட தேசத்துக்கு தாவிய கூகுள் - பிரம்மாண்ட முதல் AI மையம்!

கூகுள் நிறுவனத்தின் தலைமைச் செயல் அதிகாரியான சுந்தர் பிச்சை, பிரதமர் நரேந்திர மோடியைச் சந்தித்துப் பேசியதோடு, ஆந்திரப் பிரதேசத்தின் விசாகப்பட்டினத்தில் கூகுள் நிறுவவிருக்கும் தனது முதலாவது செயற்கை நுண்ணறிவு (AI) மையம் குறித்த திட்டங்களையும் விளக்கியுள்ளார்.

விசாகப்பட்டினம் மையத்தின் முக்கிய அம்சங்கள்

இந்த மையம் கூகுளின் அமெரிக்காவுக்கு வெளியே அமையவிருக்கும் மிகப்பெரிய AI மையமாக இருக்கும் என்பது மற்றொரு சிறப்பம்சம்.

முதலீடும் காலக்கெடுவும்: கூகுள் நிறுவனம் அடுத்த ஐந்து ஆண்டுகளில் இந்தியாவில் $15 பில்லியன் (சுமார் ₹1.25 லட்சம் கோடி) முதலீடு செய்யவுள்ளது. இது கூகுள் இந்தியாவில் மேற்கொள்ளும் மிகப்பெரிய முதலீடாகும்.

இந்த AI மையமானது, 'ஜிகா வாட்' (Gigawatt-scale compute capacity) திறன் கொண்ட கம்ப்யூட்டிங் வளாகம், புதிய சர்வதேச நீருக்கடி இணைய வழி நுழைவாயில் (subsea gateway), மற்றும் பெரிய அளவிலான எரிசக்தி உள்கட்டமைப்பு ஆகியவற்றை ஒருங்கிணைக்கும் என்று இந்திய வம்சாவளியைச் சேர்ந்த சுந்தர் பிச்சை குறிப்பிட்டார். இந்த AI தரவு மைய வளாகத்திற்காக கூகுள், அதானி குழுமத்துடன் (Adani Group) கூட்டு வைத்துள்ளது.

சுந்தர் பிச்சை, ஆந்திரப் பிரதேச அரசுடன் ஒப்பந்தம் கையெழுத்தானதைத் தொடர்ந்து 'X' தளத்தில் இத்திட்டத்தை "ஒரு மைல்கல் வளர்ச்சி" என்று குறிப்பிட்டுள்ளார். (அப்போ தமிழ்நாடு!?). இதன் மூலம், நாங்கள் எங்கள் துறையில் முன்னணியில் உள்ள தொழில்நுட்பத்தை இந்திய நிறுவனங்கள் மற்றும் பயனர்களிடம் கொண்டு வருவோம், AI புதுமைகளை விரைவுபடுத்துவோம் மற்றும் நாடு முழுவதும் வளர்ச்சியைத் தூண்டுவோம்" என்றும் அவர் பதிவிட்டுள்ளார்.

இந்தியாவின் வளர்ச்சிப் பார்வை

இந்த முதலீடு குறித்து கூகுள் வெளியிட்ட அதிகாரப்பூர்வ அறிக்கையில், இது இந்திய அரசாங்கத்தின் 'விக்சித் பாரத் 2047' (Viksit Bharat 2047) இலக்குடன் ஒத்துப்போகிறது என்றும், AI மூலம் இயக்கப்படும் சேவைகளை விரைவுபடுத்தும் என்றும் தெரிவிக்கப்பட்டுள்ளது.

"இந்த முயற்சி, AI திறன்களில் ஒரு தலைமுறைக்கான மாற்றத்தைக் கொண்டுவருவதோடு மட்டுமல்லாமல், இந்தியாவிற்கும் அமெரிக்காவிற்கும் கணிசமான பொருளாதார மற்றும் சமூக வாய்ப்புகளை உருவாக்குகிறது," என்றும் அந்த அறிக்கையில் குறிப்பிடப்பட்டுள்ளது.

டெல்லியில் இந்த அதிகாரபூர்வ ஒப்பந்தத்தில் கையெழுத்திடும் நிகழ்வில், மத்திய அமைச்சர்கள் நிர்மலா சீதாராமன், அஷ்வினி வைஷ்ணவ், ஆந்திரப் பிரதேச முதலமைச்சர் என்.சந்திரபாபு நாயுடு மற்றும் மாநில தகவல் தொழில்நுட்பத் துறை அமைச்சர் நாரா லோகேஷ் ஆகியோர் கலந்துகொண்டனர்.

விசாகப்பட்டினத்தில் அமையவிருக்கும் AI மையம், "இந்தியாவின் டிஜிட்டல் எதிர்காலத்தில் செய்யப்படும் ஒரு மைல்கல் முதலீடு" என்று விவரித்தார். அத்துடன், "அளவிடக்கூடிய AI உள்கட்டமைப்பை வழங்குவதன் மூலம், வணிகங்கள் விரைவாகப் புதுமை காணவும், உள்ளடக்கிய வளர்ச்சிக்கான அர்த்தமுள்ள வாய்ப்புகளை உருவாக்கவும் நாங்கள் உதவுகிறோம். இந்த ஒப்பந்தம், AI-ஐப் பொறுப்புடன் பயன்படுத்துவதற்கும், சமூகத்தில் மாற்றத்தக்கத் தாக்கத்தை ஏற்படுத்துவதற்கும் இந்திய மற்றும் அமெரிக்க அரசாங்கங்களுடனான எங்கள் பகிரப்பட்ட உறுதிப்பாட்டைப் பிரதிபலிக்கிறது," என்று கூறினார்.

கூகுளின் முதலீட்டிற்கு நன்றி தெரிவித்த மத்திய அமைச்சர் அஷ்வினி வைஷ்ணவ், "இந்த டிஜிட்டல் உள்கட்டமைப்பு, எங்களின் 'இந்தியா AI தொலைநோக்கு' இலக்குகளை அடைவதற்குப் பெரிதும் உதவும்," என்றார். மேலும், "AI சேவைகள் நமது டிஜிட்டல் பொருளாதாரத்தில் ஒரு முற்றிலும் புதிய பிரிவாக வெளிவருகிறது, மேலும் இந்த புதிய வசதி, AI சேவைகளுக்காக நமது இளைஞர்களை மேம்படுத்தப் பயன்படுத்தப்படும் என்று நம்புகிறோம்," என்றும் கூறினார்.

ஆந்திர முதல்வர் என். சந்திரபாபு நாயுடு பேசுகையில், “ஆந்திரப் பிரதேசத்தில் செய்யப்படும் இந்த முதலீடு, இந்தியாவின் டிஜிட்டல் மாற்றப் பயணத்தில் "ஒரு புதிய அத்தியாயத்தைக்" குறிக்கிறது என்று கூறினார். "இந்தியாவின் முதல் உண்மையான ஜிகா-வாட் திறன் கொண்ட தரவு மையத்தையும், கூகுளின் முதல் AI மையத்தையும் நடத்துவதில் நாங்கள் பெருமை கொள்கிறோம்" என்று குறிப்பிட்டார்.

மைக்ரோசாஃப்ட் மற்றும் அமேசான் போன்ற இதர தொழில்நுட்ப நிறுவனங்கள் ஏற்கெனவே இந்தியாவில் தரவு மையங்களை உருவாக்கப் பல பில்லியன் டாலர்களை முதலீடு செய்துள்ள நிலையில், AI சேவைகளுக்கான தேவை அதிகரித்து வரும் சூழலில் கூகுளின் இந்த அறிவிப்பு வந்துள்ளது. இந்த ஆண்டின் இறுதிக்குள் இந்தியாவில் 900 மில்லியனுக்கும் அதிகமான இணையப் பயனர்கள் இருப்பார்கள் என்று எதிர்பார்க்கப்படுகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.