‘வெளிநாட்டவர்களுக்கான புதிய சட்டம்..’ நாம் தெரிந்து கொள்ள வேண்டியவை என்னென்ன!?

இந்தியாவில் வெளிநாட்டவர்களின் நுழைவு, தங்குதல் மற்றும் வெளியேறுதல் ஆகியவற்றை ஒழுங்குபடுத்தும் சட்டத்தில் ஒரு பெரிய மாற்றம் ஏற்பட்டுள்ளது. இதற்கான விதிகள் மற்றும் ஆணைகள் வெளியிடப்பட்டுள்ளன. சில சிறுபான்மை மதக்குழுக்களுக்கு விலக்கு அளிக்கும் வகையில், புதிய சட்டமான 'குடிவரவு மற்றும் வெளிநாட்டவர்கள் சட்டம் - 2025' செப்டம்பர் 1 முதல் நடைமுறைக்கு வந்துள்ளது.

புதிய சட்டத்தின் முக்கியத்துவம்

புதிய சட்டமானது, இந்தியாவின் வெளிநாட்டு வாழ் மக்களைக் கட்டுப்படுத்தும் அமைப்பில் ஒரு முழுமையான மாற்றத்தைக் கொண்டு வந்துள்ளது. இது சில வகை வெளிநாட்டவர்களுக்குக் கிடைக்கக்கூடிய விலக்குகளையும் தெளிவாக வரையறுக்கிறது. 

பழைய சட்ட அமைப்பானது, சுதந்திரத்திற்கு முந்தைய காலத்து சட்டங்கள் மற்றும் ஆங்காங்கே வெளியிடப்பட்ட அறிவிப்புகளின் அடிப்படையில் அமைந்திருந்தது. இது தெளிவற்றதாகவும், புரிந்துகொள்வதற்குக் கடினமாகவும் இருந்தது. உதாரணமாக, திபெத்திய அகதிகள், இலங்கைத் தமிழ் அகதிகள், நேபாளம் மற்றும் பூடான் குடிமக்கள் போன்றோருக்கு வழங்கப்பட்ட விலக்குகள் பற்றிய தகவல்கள் சரிவர இல்லை. இது இந்த சட்டங்களை அமல் செய்வதிலும், தரவுகளை சேகரிப்பதிலும் குழப்பத்தை ஏற்படுத்தியது. உள்ளூர் மற்றும் மத்திய அதிகாரிகளின் அதிகாரங்கள், அபராத விதிமுறைகள் மற்றும் பாதுகாக்கப்பட்ட பகுதிகளுக்கான விதிகள் போன்றவை நாடு முழுவதும் ஒரே சீராக இல்லை. இந்த சிக்கல்களை நீக்குவதற்காகவே இந்த புதிய சட்டம் கொண்டுவரப்பட்டுள்ளது.

சட்டம், விதிகள் மற்றும் ஆணைகளின் முக்கிய அம்சங்கள்

1. செல்லுபடியாகும் ஆவணங்கள்: வெளிநாட்டவர்கள் அனைவரும் செல்லுபடியாகும் கடவுச்சீட்டு அல்லது பயண ஆவணம் மற்றும் ஒரு விசா வைத்திருக்க வேண்டும். இந்தச் சட்டம் அல்லது மத்திய அரசின் சிறப்பு ஆணைகள் மூலம் விலக்கு அளிக்கப்பட்டவர்களுக்கு இது பொருந்தாது.

2. குறிப்பிட்ட நுழைவு மற்றும் வெளியேறுதல் மையங்கள்: விமான நிலையங்கள், துறைமுகங்கள், தரைவழி எல்லைகள் மற்றும் ரயில் நிலையங்கள் உட்பட, வெளிநாட்டவர்கள் சட்டப்படி நுழையவும் வெளியேறவும் அனுமதிக்கப்பட்ட குடியேற்ற மையங்களின் பட்டியலை இந்தச் சட்டம் தெளிவாக குறிப்பிடுகிறது.

3. இம்மிகிரேஷன் அதிகாரியின் அதிகாரங்கள்: இந்த மையங்களில் உள்ள அதிகாரிகளுக்கு, தேசிய பாதுகாப்பு காரணங்களுக்காக வெளிநாட்டவர்களின் நுழைவு அல்லது வெளியேற்றத்தை இறுதிசெய்ய அல்லது மறுக்க முழு அதிகாரம் வழங்கப்பட்டுள்ளது.

4. பதிவு மற்றும் கட்டுப்பாட்டு அமைப்பு: வெளிநாட்டுப் பிரஜைகள் அனைவரும் குறிப்பிட்ட பதிவு அதிகாரிகளிடம் பதிவு செய்ய வேண்டும். மாவட்ட காவல்துறை கண்காணிப்பாளர் (SP)/ துணை ஆணையர் (DCP) உள்ளூர் குடிவரவு மற்றும் வெளிநாட்டவர் ஒழுங்குமுறை அதிகாரியாக நியமிக்கப்பட்டுள்ளார். மேலும், வெளிநாட்டவர் மண்டலப் பதிவு அதிகாரிகள் (FRROs) குறிப்பிட்ட பிராந்தியங்கள் மற்றும் பணிகளுக்கான அதிகாரங்களை வழங்கியுள்ளனர்.

5. ஹோட்டல்கள், விடுதிகள், தங்கும் இல்லங்கள் மற்றும் மத நிறுவனங்கள் போன்ற தங்குமிடங்கள், வெளிநாட்டவர்களின் விவரங்களைச் சேகரிக்க வேண்டும். அவர்கள் வந்த 24 மணி நேரத்திற்குள்ளும், புறப்படும் 24 மணி நேரத்திற்குள்ளும் மின்னணு முறையில் ஒரு படிவத்தை நிரப்பி, அதிகாரிகளுக்கு அனுப்ப வேண்டும். இதில் இந்திய வெளிநாட்டு குடிமக்கள் (OCI) அட்டை வைத்திருப்பவர்களும் அடங்குவர்.

6. கல்வி மற்றும் மருத்துவ அறிவிப்புகள்: பல்கலைக்கழகங்கள் மற்றும் மருத்துவமனைகளில்  வெளிநாட்டவர்கள் சேர்க்கை அல்லது சிகிச்சை குறித்து பதிவு அதிகாரிகளுக்குத் தெரிவிக்க வேண்டும். மருத்துவமனைகள், வெளிநாட்டவர்களின் பிறப்பு மற்றும் இறப்பு விவரங்களை ஏழு நாட்களுக்குள் மின்னணு முறையில் தெரிவிக்க வேண்டும்.

7. ரிசார்ட்கள் மற்றும் கிளப்புகளை மூடும் அதிகாரம்: ஒரு வெளிநாட்டவர் "குற்றவாளி, சட்டவிரோத சங்கங்களுடன் தொடர்புடையவர் அல்லது ‘விரும்பத்தகாதவர்’ என அதிகாரி கருதினால், வெளிநாட்டவர்கள் அடிக்கடி செல்லும் இடங்களை மூடுவதற்கு உள்ளூர் சிவில் அதிகாரிகளுக்கு அதிகாரம் வழங்கப்பட்டுள்ளது.

8. பாதுகாக்கப்பட்ட பகுதிகளுக்கான சிறப்பு அனுமதி: பாதுகாக்கப்பட்ட, தடைசெய்யப்பட்ட அல்லது கட்டுப்படுத்தப்பட்ட பகுதிகளுக்குள் செல்வதற்கு சிறப்பு அனுமதி தேவைப்படும். இதற்கான விண்ணப்பங்கள், குறிப்பிட்ட ஆன்லைன் போர்ட்டல்கள் அல்லது மொபைல் செயலிகள் மூலம் மட்டுமே செய்யப்பட வேண்டும்.

விலக்கு அளிக்கப்பட்ட பிரிவுகள்

இந்திய இராணுவத்தினர்: பணியில் இருக்கும்போது நாட்டிற்குள் நுழையும்/வெளியேறும் இந்திய இராணுவ வீரர்கள் மற்றும் அரசு போக்குவரத்தில் பயணிக்கும் அவர்களது குடும்பத்தினர்.

நேபாளம் மற்றும் பூடான் குடிமக்கள்: குறிப்பிட்ட தரைவழி அல்லது வான்வழி எல்லைகள் வழியாக இந்தியாவுக்குள் நுழையும் நேபாளம் மற்றும் பூடான் குடிமக்கள் (சீனா, மக்காவு, ஹாங்காங் அல்லது பாகிஸ்தான் வழியாக நுழையாதவர்கள்).

திபெத்திய அகதிகள்: 1959 மற்றும் மே 30, 2003 க்கு இடையில் நுழைந்தவர்கள் அல்லது பின்னர் நியமிக்கப்பட்ட பதவிகள் வழியாக நுழைந்த திபெத்திய அகதிகள். அவர்கள் அதிகாரிகளிடம் பதிவு செய்து பதிவுச் சான்றிதழை வைத்திருக்க வேண்டும்.

சிறுபான்மை சமூக அகதிகள்: ஆப்கானிஸ்தான், பங்களாதேஷ், மற்றும் பாகிஸ்தானிலிருந்து மத துன்புறுத்தல்களால் பாதிக்கப்பட்டு, டிசம்பர் 31, 2024 அன்றோ அல்லது அதற்கு முன்னரோ இந்தியாவுக்குள் நுழைந்த சிறுபான்மையினர் (இந்துக்கள், சீக்கியர்கள், பௌத்தர்கள், சமணர்கள், பார்சிகள் மற்றும் கிறிஸ்தவர்கள்). இவர்களுக்கு செல்லுபடியாகும் ஆவணங்கள் இல்லாவிட்டாலும் அல்லது காலாவதியான ஆவணங்கள் இருந்தாலும், அவர்களுக்குச் சிறப்பான பாதுகாப்பு வழங்கப்பட்டுள்ளது.

குடியுரிமை (திருத்த) சட்டம், 2019 (CAA) இன் படி, இந்தச் சிறுபான்மையினர் இந்தியக் குடியுரிமையைப் பெறுவதற்கான கடைசி நாள் டிசம்பர் 31, 2014 ஆகும். இந்தத் தேதி மாற்றப்படவில்லை. ஆனால், டிசம்பர் 31, 2014 க்குப் பிறகு இந்தியாவுக்குள் நுழைந்த சிறுபான்மையினருக்கு, கைது அல்லது தண்டனையில் இருந்து சிறப்புப் பாதுகாப்பு வழங்கப்பட்டுள்ளது.

இலங்கைத் தமிழ் அகதிகள்: ஜனவரி 9, 2015 வரை இந்தியாவில் அடைக்கலம் பெற்ற பதிவு செய்யப்பட்ட இலங்கைத் தமிழர்கள்.

புதிய அம்சங்கள் மற்றும் அமலாக்கம்

இந்தச் சட்டம், தங்குமிடங்கள், மருத்துவமனைகள் மற்றும் பல்கலைக்கழகங்கள் மூலம் மின்னணு அறிவிப்புகளை கட்டாயப்படுத்துகிறது. இது அமலாக்கம், பொது சுகாதார மேலாண்மை மற்றும் குடியுரிமை முடிவுகளுக்கு ஒரு வலுவான தரவுத்தளத்தை உருவாக்கும்.

விசா விதிமீறல்கள், பதிவு செய்யாதது அல்லது பாதுகாக்கப்பட்ட பகுதிக்குள் அங்கீகரிக்கப்படாத நுழைவு போன்ற குற்றங்களுக்கு, ₹10,000 முதல் ₹5 லட்சம் வரை அபராதங்கள் விதிக்கப்படும். திபெத்தியர்கள் மற்றும் மங்கோலிய பௌத்த துறவிகள் போன்ற குறிப்பிட்ட தேசியக் குழுக்களுக்கு அபராதம் ₹50 -ஆக உள்ளது.

இந்தச் சட்டம், நல்லெண்ணத்துடன் செய்யப்படும் தவறுகளுக்குப் பாதுகாப்பு அளிக்கிறது. அபராதங்கள் மற்றும் தண்டனைகளுக்கு எதிரான மேல்முறையீடுகளும் தெளிவாக வரையறுக்கப்பட்டுள்ளன.

உள்ளூர் மட்டத்தில் தன்னிச்சையான முடிவுகளைத் தடுக்கும் வகையில், அனைத்து விலக்குகளும் மத்திய அரசால் வெளியிடப்பட்ட ஆணைகளின் அடிப்படையில் மட்டுமே இருக்கும். இந்தச் சட்டம் மத்திய அரசுக்கு மாநிலங்கள் மற்றும் யூனியன் பிரதேசங்களுக்குப் பணிகளை ஒப்படைக்கவும், சிறப்பு அல்லது பொதுவான வழிமுறைகளை வழங்கவும் அதிகாரம் அளிக்கிறது.

இந்த புதிய விதிகள், வெளிநாட்டவர் தொடர்பான சட்டங்களை எளிதாக்குவதோடு, அமலாக்கத்தையும் மேம்படுத்தும் என்று எதிர்பார்க்கப்படுகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.