வியக்க வைக்கும் இந்தியா..! டாப் 10-ல இல்லாவிட்டாலும் அசுர வளர்ச்சி!

உலக நாடுகள் எந்த அளவுக்குப் புதிய கண்டுபிடிப்புகள், தொழில்நுட்பங்கள் மற்றும் வணிக முறைகளில் முன்னேறியுள்ளன என்பதைக் கணக்கிடும் Global Innovation Index 2025-க்கான அறிக்கை வெளியிடப்பட்டுள்ளது. இது, உலகின் பல்வேறு நாடுகள் எப்படிப் புதிதாகச் சிந்தித்து, வளர்ந்து வருகின்றன என்பதைக் காட்டுகிறது.

இந்த அறிக்கையின்படி, உலகம் முழுவதும் ஆராய்ச்சி மற்றும் மேம்பாடு (R&D)-க்கான வளர்ச்சி விகிதம் குறைந்து வருகிறது. கடந்த ஆண்டு 4.4% ஆக இருந்த வளர்ச்சி, இப்போது 2.9% ஆகக் குறைந்துவிட்டது. வரும் ஆண்டுகளில் இது இன்னும் குறைந்து 2.3% ஆகலாம் என்று கணிக்கப்பட்டுள்ளது. இது 2010 நிதி நெருக்கடிக்குப் பிறகு ஏற்பட்ட மிகக் குறைந்த வளர்ச்சி என்பது கவலைக்குரிய விஷயம்.

முன்னேறும் நாடுகள் யார் யார்?

ஐரோப்பா கண்டம், புத்தாக்கத்தில் இன்னும் முன்னணியில் இருக்கிறது. முதல் 25 இடங்களில் 15 நாடுகள் ஐரோப்பாவைச் சேர்ந்தவை. அதேபோல், அமெரிக்காவும், கனடாவும் தொடர்ந்து சிறப்பாகச் செயல்படுகின்றன. ஆசியப் பிராந்தியத்தில், குறிப்பாகத் தென்கிழக்கு ஆசிய நாடுகளில் இந்த புரட்சி வேகமாக நடந்து வருகிறது.

சீனாவின் அபார வளர்ச்சி!

சீனாவின் வளர்ச்சி இதில் கவனிக்கத்தக்கது. உலக அளவில் 10-வது இடத்தைப் பிடித்து, முன்னணி நாடுகளைக் கலக்கியுள்ளது. முக்கியமாக, அறிவு மற்றும் தொழில்நுட்ப உற்பத்தியில் (Knowledge and Technology Outputs) சுவிட்சர்லாந்தைக் கூட சீனா மிஞ்சிவிட்டது. காப்புரிமை விண்ணப்பங்களை அதிகமாகச் சமர்ப்பிப்பதிலும், ஆராய்ச்சிக்கு அதிகப் பணம் செலவிடுவதிலும் சீனா இரண்டாம் இடத்தில் இருக்கிறது.

Global Innovation-ல் சிறந்து விளங்கும் முதல் 10 நாடுகள்:

சுவிட்சர்லாந்து

ஸ்வீடன்

அமெரிக்கா

கொரியா குடியரசு

சிங்கப்பூர்

இங்கிலாந்து

பின்லாந்து

நெதர்லாந்து

டென்மார்க்

சீனா

இந்தியா எங்கே இருக்கிறது?

இந்தியாவின் பயணம் மிகவும் நம்பிக்கையாக இருக்கிறது. 2020-ல் 48-வது இடத்தில் இருந்த நாம், 2025-ல் 38-வது இடத்திற்கு முன்னேறியுள்ளோம். இது ஒரு பெரிய பாய்ச்சல்!

அறிவு மற்றும் தொழில்நுட்ப உற்பத்தியில் நாம் 22-வது இடத்தில் இருக்கிறோம்.

சந்தையின் நுட்பங்களில் நாம் 38-வது இடத்தைப் பிடித்துள்ளோம்.

ஆனால், சில விஷயங்களில் நாம் இன்னும் கவனம் செலுத்த வேண்டும். குறிப்பாக, வர்த்தக நுட்பம் (Business Sophistication), உள்கட்டமைப்பு மற்றும் நிர்வாகம் (Institutions) போன்ற விஷயங்களில் நாம் இன்னும் பின்தங்கியே இருக்கிறோம். இந்தப் பகுதிகளில் நாம் கவனம் செலுத்தினால், அடுத்தடுத்த ஆண்டுகளில் இன்னும் வேகமாக முன்னேற முடியும்.

மிகவும் பெருமைப்பட வேண்டிய விஷயம் என்னவென்றால், குறைந்த மற்றும் நடுத்தர வருமானம் கொண்ட நாடுகளில் இந்தியா முதல் இடத்தைப் பிடித்துள்ளது! மேலும், மத்திய மற்றும் தெற்கு ஆசியாவிலும் நாம் முதலிடத்தில் இருக்கிறோம்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.