கண்ணீருடன் கவிதா..! தெலங்கானா அரசியலில் மையம் கொள்ளும் புது 'புயல்'

தெலங்கானா மாநிலத்தின் முன்னாள் முதல்வர் கே. சந்திரசேகர் ராவின் (கேசிஆர்) மகளும், பிஆர்எஸ் கட்சியின் சட்டமன்ற மேலவை உறுப்பினருமான கே. கவிதா, கட்சியில் இருந்து இடைநீக்கம் செய்யப்பட்ட சில மணி நேரங்களுக்குப் பிறகு, கண்ணீருடன் தனது எம்எல்சி பதவியை ராஜினாமா செய்தார். இது தெலங்கானா அரசியலிலும், பிஆர்எஸ் கட்சிக்குள்ளும் ஒரு பெரும் புயலைக் கிளப்பியுள்ளது. ராஜினாமா கடிதத்தை அளித்துவிட்டு, தனது தந்தை கேசிஆருக்கு ஒரு உருக்கமான செய்தியையும் அவர் விடுத்துள்ளார். "அப்பா, உங்களுக்கு அருகில் யார் இருக்கிறார்கள் என்பதை ஒருமுறை பாருங்கள்" என்று அவர் கூறியது, பிஆர்எஸ் கட்சிக்குள் நிலவும் கோஷ்டி மோதல்களையும், குடும்பப் பிளவுகளையும் வெளிச்சம் போட்டுக் காட்டியுள்ளது.

காலேஸ்வரம் திட்டம்

இந்த விவகாரத்தின் மையமாக இருப்பது, தெலங்கானாவின் உயிர்நாடியாகக் கருதப்படும் கலேஸ்வரம் பாசனத் திட்டம். கோதாவரி ஆற்றின் குறுக்கே கட்டப்பட்ட இந்த திட்டம், சுமார் ரூ. 1 லட்சம் கோடிக்கும் அதிகமான செலவில் உருவாக்கப்பட்ட உலகின் மிகப்பெரிய பல-நிலை நீர்ப்பாசனத் திட்டமாகும். இது 13 மாவட்டங்களுக்கு குடிநீர் மற்றும் விவசாயத்திற்கான நீரை வழங்குவதை நோக்கமாகக் கொண்டது.

ஆனால், இந்த மெகா திட்டத்தில் ஊழல் நடந்ததாகப் பல காலமாகவே குற்றச்சாட்டுகள் எழுந்து வந்தன. குறிப்பாக, 2023-ல் ஒருநாள் திடீரென இந்த திட்டத்தின் மெடிகட்டா தடுப்பணையின் (Medigadda barrage) ஆறு தூண்கள் பகுதி அளவில் நீரில் மூழ்கின. இது பெரும் அதிர்ச்சியை ஏற்படுத்தியது. தேசிய அணை பாதுகாப்பு ஆணையம் (NDSA) நடத்திய விசாரணையில், இந்த சேதங்களுக்கு தரமற்ற கட்டுமானம், திட்டமிடல் குறைபாடுகள் மற்றும் வடிவமைப்பு தவறுகள்தான் காரணம் என்று தெரியவந்தது. முன்னாள் முதல்வர் கேசிஆர், முன்னாள் அமைச்சர்கள் டி. ஹரீஷ் ராவ் மற்றும் ஈட்டல ராஜேந்தர் ஆகியோர் இந்த முறைகேடுகளுக்கு நேரடிப் பொறுப்பு என நீதிபதி பி.சி.கோஷ் தலைமையிலான விசாரணைக் குழுவின் அறிக்கையில் கூறப்பட்டுள்ளது.

இந்தத் திட்டத்தில் நடைபெற்ற முறைகேடுகள் குறித்து சிபிஐ விசாரணைக்கு உத்தரவிட வேண்டும் என்று தற்போதைய தெலங்கானா அரசு கோரிக்கை விடுத்துள்ளது. இதன் காரணமாக, இந்த ஊழல் வழக்கு இப்போது மத்திய விசாரணை அமைப்பின் கையில் சென்றுள்ளது.

கவிதா ஏன் நீக்கப்பட்டார்?

இந்த சூழலில் தான் முன்னாள் முதல்வர் கேசிஆர் தனது மகளான கவிதாவை கட்சி விரோத நடவடிக்கைகளுக்காக இடைநீக்கம் செய்து அதிரடி முடிவை எடுத்துள்ளார். கவிதா, தனது உறவினர்களான முன்னாள் அமைச்சர் ஹரீஷ் ராவ் மற்றும் முன்னாள் எம்.பி. ஜே. சந்தோஷ் குமார் ஆகியோர் மீது கலேஸ்வரம் திட்ட ஊழலில் ஈடுபட்டதாகக் குற்றம் சாட்டினார். கேசிஆர் இந்த ஊழலை கண்டுகொள்ளாமல் இருந்தார் என்றும் கூறினார்.

டெல்லி மதுபானக் கொள்கை ஊழல் வழக்கில் அமலாக்கத்துறையால் கைது செய்யப்பட்டு ஜாமீனில் வெளிவந்த கவிதா, தனது குற்றச்சாட்டுகளால் கட்சிக்குள் பெரும் குழப்பத்தை ஏற்படுத்தியதாக பிஆர்எஸ் தலைமை கருதுகிறது. கட்சிக்குள் இருக்கும் உள் விவகாரங்களை பொதுவெளியில் பேசி, கட்சிக்கு அவப்பெயரை ஏற்படுத்தியதால்தான் அவர் இடைநீக்கம் செய்யப்பட்டார் என பிஆர்எஸ் தலைமை விளக்கமளித்துள்ளது. கவிதாவின் இந்த வெளிப்படையான குற்றச்சாட்டுகள், ஊழல் குற்றச்சாட்டுகளால் ஏற்கனவே பின்னடைவில் இருக்கும் பிஆர்எஸ் கட்சிக்கு மேலும் சேதத்தை ஏற்படுத்தும் என்று கேசிஆர் அஞ்சியிருக்கலாம்.

கவிதாவின் ராஜினாமா, ஒரு தனிப்பட்ட முடிவாக இல்லாமல், பிஆர்எஸ் கட்சிக்குள் நிலவும் நீண்டகால கோஷ்டி மோதல்களின் வெளிப்பாடாகப் பார்க்கப்படுகிறது. தெலங்கானா சட்டசபைத் தேர்தலில் பிஆர்எஸ் கட்சி தோல்வியடைந்த பிறகு, கட்சிக்குள் தலைமைப் பொறுப்பிற்காகக் கடுமையான போட்டி நிலவி வருகிறது. ஒருபுறம், கேசிஆரின் மகனான கே.டி. ராமாராவ், கட்சியின் அடுத்த தலைவர் எனப் பார்க்கப்படுகிறார். மற்றொருபுறம், மூத்த தலைவர்கள் தங்கள் செல்வாக்கை நிலைநிறுத்த முயற்சி செய்கின்றனர்.

கவிதா, தனது தந்தையின் நம்பிக்கையை மீண்டும் பெறவும், கட்சிக்குள் தனது செல்வாக்கை நிலைநிறுத்தவும், இந்த ஊழல் குற்றச்சாட்டுகளை ஒரு கருவியாகப் பயன்படுத்தியிருக்கலாம் என்று அரசியல் விமர்சகர்கள் கருதுகின்றனர். குறிப்பாக, காலேஸ்வரம் ஊழலுக்கு தனது உறவினர்கள்தான் காரணம் என்று நேரடியாகக் குற்றம் சாட்டியதன் மூலம், அவர் தனது தந்தை பக்கமிருந்து விலகி, தனி ஒரு அரசியல் சக்தியாக தன்னை நிலைநிறுத்த முயற்சிப்பதாகக் கூறப்படுகிறது.

இந்த விவகாரம், தெலங்கானாவில் பிஆர்எஸ் கட்சியின் எதிர்காலத்தை கேள்விக்குறியாக்கியுள்ளது. தலைவரின் மகளே கட்சியின் மூத்த தலைவர்கள் மீது ஊழல் குற்றச்சாட்டுகளை வைப்பது, பிஆர்எஸ்-ன் நம்பகத்தன்மையை கடுமையாக பாதிக்கும். இது, தெலங்கானா அரசியலில் காங்கிரஸ் மற்றும் பாஜக கட்சிகளுக்கு சாதகமான சூழலை உருவாக்கும் என எதிர்பார்க்கப்படுகிறது. மொத்தத்தில், கவிதாவின் ராஜினாமா, தெலங்கானா அரசியலில் ஒரு புதிய திருப்பத்தை ஏற்படுத்தியுள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.