UPI பணம் செலுத்துவதில் புதிய கட்டணம்... உச்ச நீதிமன்றம் எடுத்த முக்கிய முடிவு என்ன?

இந்தியாவில் அன்றாட பணப் பரிவர்த்தனையின் முக்கிய பகுதியாக மாறிவிட்ட UPI தொடர்பாக புதிய சர்ச்சை உருவாகியுள்ளது. ரூ.2,000-க்கு மேல் நடைபெறும் சில UPI வணிகப் பரிவர்த்தனைகளுக்கு Merchant Discount Rate (MDR) எனப்படும் கட்டணத்தை அறிமுகப்படுத்த மத்திய அரசு எடுத்த முடிவை எதிர்த்து உச்ச நீதிமன்றத்தில் மனு தாக்கல் செய்யப்பட்டது.

அந்த மனுவை விசாரித்த உச்ச நீதிமன்றம், புதிய நடைமுறைக்கு இடைக்காலத் தடை விதிக்க மறுத்ததுடன், கட்டணம் விதிப்பதற்கான சட்ட மற்றும் நிர்வாக அடிப்படை குறித்து மத்திய அரசிடம் விளக்கம் கேட்டுள்ளது.

தலைமை நீதிபதி சூர்ய காந்த் தலைமையிலான நீதிபதிகள் ஜோய்மால்ய பாக்சி மற்றும் வி. மோகனா ஆகியோர் அடங்கிய அமர்வு இந்த வழக்கை விசாரித்தது. மனுதாரர் தரப்பில், ரூ.2,000-க்கு மேல் நடைபெறும் வணிக UPI பரிவர்த்தனைகளுக்கு MDR விதிப்பது பொதுமக்கள் மற்றும் வணிகர்களுக்கு கூடுதல் சுமையை ஏற்படுத்தக்கூடும் என்று வாதிடப்பட்டது.

மேலும், இதனால் சில வணிகர்கள் அந்த செலவை வாடிக்கையாளர்களிடமே வசூலிக்க முயற்சிக்கலாம் என்றும் மனுவில் குறிப்பிடப்பட்டுள்ளது. ஆனால், இந்த கட்டத்தில் புதிய விதிமுறைகளை நிறுத்த வேண்டும் என்ற கோரிக்கையை உச்ச நீதிமன்றம் ஏற்கவில்லை.

அதே நேரத்தில், மத்திய அரசு, இந்திய ரிசர்வ் வங்கி (RBI), தேசிய பணப்பரிவர்த்தனை கழகம் (NPCI) உள்ளிட்ட தரப்புகளுக்கு நோட்டீஸ் அனுப்பி, தங்களது பதிலை நான்கு வாரங்களுக்குள் தாக்கல் செய்ய உத்தரவிட்டுள்ளது. UPI கட்டண விவகாரம் சட்டரீதியான கேள்வியைவிட தொழில்நுட்ப மற்றும் பணப்பரிவர்த்தனை அமைப்பு தொடர்பான அம்சங்களையும் கொண்டுள்ளதாக நீதிமன்றம் குறிப்பிட்டது.

இங்கே முக்கியமாக புரிந்துகொள்ள வேண்டியது, MDR என்பது அரசாங்கம் நேரடியாக வசூலிக்கும் வரி அல்ல என்பதுதான். மத்திய அரசின் விளக்கப்படி, இது UPI பரிவர்த்தனையை செயல்படுத்தும் வங்கிகள், payment aggregators, service providers மற்றும் பிற payment ecosystem நிறுவனங்களுக்கு இடையே பகிரப்படும் கட்டணமாகும்.

அரசின் கணக்கில் இந்தப் பணம் சேராது என்றும் அதிகாரப்பூர்வமாக தெரிவிக்கப்பட்டுள்ளது. புதிய விதிமுறை அக்டோபர் 15, 2026 முதல் நடைமுறைக்கு வர உள்ளது. தகுதியுள்ள சில person-to-merchant, அதாவது வாடிக்கையாளர் முதல் வணிகர் வரையிலான UPI பரிவர்த்தனைகளுக்கு ரூ.2,000-க்கு மேல் MDR பொருந்தும். வழக்கமான கட்டணம் 0.4 சதவீதமாக நிர்ணயிக்கப்பட்டுள்ளது. ரூ.75,000 அல்லது அதற்கு மேல் உள்ள பரிவர்த்தனைகளுக்கு அதிகபட்ச MDR ரூ.300 என வரம்பு நிர்ணயிக்கப்பட்டுள்ளது.

அதே நேரத்தில், ஒவ்வொரு UPI பரிவர்த்தனைக்கும் கட்டணம் விதிக்கப்படுவதில்லை. ஒருவரிடமிருந்து மற்றொருவருக்கு பணம் அனுப்பும் P2P பரிவர்த்தனைகள் தொடர்ந்து இலவசமாக இருக்கும். ரூ.2,000 வரை வணிகர்களுக்கு செய்யப்படும் UPI பணப்பரிவர்த்தனைகளும் MDR-இலிருந்து விலக்கப்பட்டுள்ளன. சிறிய வணிகர்களுக்கான zero-MDR திட்டங்களும் தொடரும் என்று மத்திய அரசு தெரிவித்துள்ளது.

இதனால் சுமார் 96 சதவீத merchant UPI transactions பாதிக்கப்படாது என அரசு கூறியுள்ளது. இதற்கிடையில், MDR அறிமுகம் குறித்து சிறு மற்றும் நடுத்தர வணிகர்கள் கவலை தெரிவித்துள்ளனர். தங்களது லாப வரம்பு ஏற்கனவே குறைவாக இருக்கும் நிலையில், புதிய கட்டணம் கூடுதல் செலவை ஏற்படுத்தும் என்றும், எதிர்காலத்தில் அதன் தாக்கம் வாடிக்கையாளர்களிடமும் செல்லக்கூடும் என்றும் சில வணிக அமைப்புகள் கூறியுள்ளன.

அதேவேளை, வாடிக்கையாளர்களிடம் MDR தொகையை வசூலிக்காமல் இருப்பதை உறுதி செய்ய வங்கிகள் கண்காணிப்பு நடவடிக்கைகளை மேற்கொள்ளும் என அரசு தரப்பில் தெரிவிக்கப்பட்டுள்ளது.

இந்த விவகாரம் தொடர்பாக உச்ச நீதிமன்றம் எழுப்பிய முக்கிய கேள்வி, இத்தகைய கட்டணத்தை விதிப்பதற்கான சட்ட அடிப்படை என்ன என்பதுதான்.

அரசு தரப்பில் இது வரியோ, அரசுக் கட்டணமோ அல்ல; UPI payment ecosystem-ல் சேவை வழங்கும் நிறுவனங்களுக்கு இடையிலான settlement charge என்று விளக்கம் அளிக்கப்பட்டுள்ளது. இதற்கான முழுமையான பதிலை அரசு தாக்கல் செய்யும் affidavit மூலம் அறிய முடியும். தற்போது UPI பயன்படுத்தும் பொதுமக்களுக்கு உடனடியாக அனைத்து பரிவர்த்தனைகளுக்கும் புதிய கட்டணம் விதிக்கப்பட்டுவிட்டது என்று அர்த்தமில்லை.

குறிப்பிட்ட வணிகப் பரிவர்த்தனைகளுக்கு மட்டுமே புதிய MDR நடைமுறைக்கு வர உள்ளது. அக்டோபர் 15 முதல் அது எவ்வாறு செயல்படுத்தப்படுகிறது, வணிகர்கள் மீது ஏற்படும் தாக்கம் என்ன, உச்ச நீதிமன்றத்தின் அடுத்தடுத்த விசாரணைகளில் என்ன முடிவு வருகிறது என்பதுதான் அடுத்த முக்கிய கட்டமாக இருக்கிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்