ஸ்டார்லிங்க் இந்தியாவுக்கு வருவது ஓகே.. ஆனால், கட்டணம் எவ்வளவு? மிடில் கிளாஸ் மக்கள் தாங்குவாங்களா?

இணையம் இல்லாம ஒரு நாளைக் கூட நினைச்சுப் பார்க்க முடியாத இந்த காலத்தில், ஸ்டார்லிங்க் (Starlink) மிக விரைவில் இந்தியாவுக்கு வரப்போகுது. இது, எலான் மஸ்க் தலைமையிலான ஸ்பேஸ்எக்ஸ் (SpaceX) நிறுவனத்தின் ஒரு புரட்சிகரமான திட்டம். விண்ணில் ஆயிரக்கணக்கான செயற்கைக்கோள்கள் மூலமாக, உலகத்தின் எந்த மூலையிலும் அதிவேக இணையத்தை கொடுக்க முடியும்னு இந்த திட்டம் சொல்லுது. இந்தியாவில், இந்த சேவை எப்போ ஆரம்பிக்கும், எவ்வளவு செலவாகும், இதனால என்ன மாற்றங்கள் வரும்னு இந்தக் கட்டுரை பார்ப்போம்.

ஸ்டார்லிங்க்.. ஸ்பேஸ்எக்ஸ் நிறுவனத்தின் ஒரு செயற்கைக்கோள் இணைய சேவை. இது, லோ-எர்த் ஆர்பிட் (LEO) செயற்கைக்கோள்களைப் பயன்படுத்தி, பாரம்பரிய கேபிள் இணையத்தை விட அதிவேகமான, குறைந்த தாமதத்தோடு (low latency) இணையத்தை வழங்குது.

2024 ஜனவரி வரை, 7,000-க்கும் மேற்பட்ட செயற்கைக்கோள்கள் விண்ணில் இருக்கு, இன்னும் 42,000 வரை அனுப்ப திட்டமிடப்பட்டிருக்கு. இந்த செயற்கைக்கோள்கள், பூமியில் இருந்து 550 கி.மீ உயரத்தில் சுற்றி, நகரங்கள் மட்டுமல்ல, கிராமங்கள், மலைப்பகுதிகள், தொலைதூர இடங்களுக்கும் இணையத்தை கொண்டு சேர்க்குது.

இந்தியாவில், இணைய சேவை ஒரு பெரிய சவாலாக இருக்கு. 1.4 பில்லியன் மக்கள் வாழும் இந்தியாவில், 950 மில்லியன் மக்கள் மட்டுமே இணையத்தை பயன்படுத்தறாங்க. கிராமப்புறங்களில், மலைப்பகுதிகளில், இணையம் இல்லாத இடங்கள் இன்னும் நிறைய இருக்கு. ஸ்டார்லிங்க், இந்த டிஜிட்டல் பிளவை (digital divide) குறைக்க ஒரு பெரிய வாய்ப்பாக பார்க்கப்படுது.

இந்தியாவில் ஸ்டார்லிங்க்: எப்போ வருது?

இந்திய அரசு, மே 2025 இல் ஸ்டார்லிங்க்குக்கு ஒரு லெட்டர் ஆஃப் இன்டென்ட் (LoI) வழங்கியிருக்கு. இது, குளோபல் மொபைல் பர்சனல் கம்யூனிகேஷன் பை சாட்டிலைட் (GMPCS) உரிமத்தை பெறுவதற்கு முதல் படியாக இருக்கு. இந்த உரிமத்தை பெற்ற பிறகு, ஸ்டார்லிங்க் இந்தியாவில் தனது சேவையை தொடங்கலாம். ஆனா, இதற்கு இன்னும் இந்திய தேசிய விண்வெளி மேம்பாடு மற்றும் அங்கீகார மையம் (IN-SPACe) அனுமதி தேவை. ஏர்டெல் மற்றும் ஜியோ ஆகிய இந்திய டெலிகாம் நிறுவனங்களோடு ஸ்டார்லிங்க் ஒப்பந்தம் செய்திருப்பது, இந்த செயல்முறையை வேகப்படுத்துது.

இந்தியாவில் ஸ்டார்லிங்க்: எவ்வளவு செலவு?

ஸ்டார்லிங்க் சேவைக்கு இரண்டு வகையான செலவுகள் இருக்கு—ஆரம்ப அமைப்பு செலவு மற்றும் மாதாந்திர கட்டணம்.

ஆரம்ப அமைப்பு செலவு: ஸ்டார்லிங்க் இணையத்தை பயன்படுத்த, ஒரு ஸ்டார்லிங்க் கிட் (dish, router, மற்றும் தேவையான உபகரணங்கள்) தேவை. அமெரிக்காவில் இதன் விலை $349 (சுமார் ரூ.29,000). இந்தியாவில், இது ரூ.37,400 ஆக இருக்கலாம்னு எதிர்பார்க்கப்படுது. சில நாடுகளில், ஸ்டார்லிங்க் ஒரு வருட சந்தாவோடு இந்த கிட்டை இலவசமாக வழங்குது, ஆனா இந்தியாவில் இந்த சலுகை இருக்குமானு இன்னும் தெளிவாக தெரியலை.

மாதாந்திர கட்டணம்: அமெரிக்காவில், ஸ்டார்லிங்க் மாதாந்திர சேவை கட்டணம் $120 (சுமார் ரூ.10,000). ஆனா, இந்தியாவில் இது ரூ.7,425 ஆக இருக்கலாம்னு கணிக்கப்பட்டிருக்கு. முதல் வருடத்துக்கு மொத்த செலவு சுமார் ரூ.1.58 லட்சம் ஆகலாம், இதில் உபகரண செலவும் அடங்கும்.

இந்த விலை, இந்தியாவில் உள்ள பாரம்பரிய இணைய சேவைகளை விட (ஜியோ, ஏர்டெல் போன்றவை மாதம் ரூ.500-1,500) பல மடங்கு அதிகம். ஆனா, ஸ்டார்லிங்க் கிராமப்புறங்களில், இணையம் இல்லாத இடங்களில், அல்லது குறைந்த வேக இணையம் மட்டுமே இருக்கும் இடங்களில் ஒரு பெரிய மாற்றத்தை கொண்டு வரலாம்.

ஸ்டார்லிங்க் எப்படி வேலை செய்யுது?

ஸ்டார்லிங்க், பாரம்பரிய இணைய சேவைகளைப் போல கேபிள்கள், டவர்களை சார்ந்து இல்லை. இது, விண்ணில் உள்ள செயற்கைக்கோள்கள் மூலமாக இணையத்தை வழங்குது. இதற்கு தேவையானவை:

ஸ்டார்லிங்க் டிஷ்: ஒரு சிறிய, வட்ட வடிவ டிஷ், இது விண்ணில் உள்ள செயற்கைக்கோள்களோடு இணைக்கப்படுது. இதை வீட்டின் மாடியிலோ, திறந்தவெளியிலோ வைக்கணும்.

ரூட்டர்: இணையத்தை வீட்டுக்குள் பரப்ப ஒரு வைஃபை ரூட்டர்.

மின் இணைப்பு: டிஷ் மற்றும் ரூட்டருக்கு மின்சாரம் தேவை.

இந்த டிஷ், செயற்கைக்கோள்களோடு தொடர்பு கொண்டு, 100-200 Mbps வேகத்தில் இணையத்தை வழங்குது. சில இடங்களில், இது பல டெராபைட்ஸ் பர் செகண்ட் (terabytes per second) வரை செல்லலாம்னு கூறப்படுது, இது ஜியோ-எஸ்இஎஸ், யூடெல்சாட் ஒன்வெப் போன்றவற்றை விட 80-90 மடங்கு அதிகம்.

ஸ்டார்லிங்க், 2021-ல இருந்து இந்தியாவில் சேவையை தொடங்க முயற்சி செய்யுது. ஆனா, ஸ்பெக்ட்ரம் ஒதுக்கீடு (spectrum allocation) தொடர்பான பிரச்சினைகளால, இது தாமதமாகி வந்தது. ரிலையன்ஸ் ஜியோ மற்றும் பாரதி ஏர்டெல், இந்த ஸ்பெக்ட்ரத்தை ஏலம் மூலமாக ஒதுக்க வேண்டும்னு வாதிட்டாங்க, ஆனா ஸ்டார்லிங்க், இதை நிர்வாக ரீதியாக (administrative allocation) ஒதுக்க வேண்டும்னு கூறியது. 2024 அக்டோபரில், இந்திய அரசு ஸ்டார்லிங்க்குக்கு ஆதரவாக முடிவு எடுத்தது.

2025 மார்ச்சில், ஜியோ மற்றும் ஏர்டெல், ஸ்டார்லிங்க்கோடு ஒப்பந்தம் செய்து, இந்த சேவையை இந்தியாவில் விநியோகிக்க ஒப்புக்கொண்டாங்க. இது, முன்னர் எதிர்ப்பு தெரிவித்த இந்த நிறுவனங்களுக்கு ஒரு பெரிய மாற்றமாக பார்க்கப்பட்டது.

பிரதமர் நரேந்திர மோடியுடனான எலான் மஸ்கின் சந்திப்பு, இந்த ஒப்பந்தங்களுக்கு ஒரு தூண்டுதலாக இருந்திருக்கலாம்னு கூறப்படுது. இந்தியாவில் 60% மக்கள் கிராமப்புறங்களில் வாழறாங்க. இங்கு இணையம் இல்லாத இடங்களுக்கு, ஸ்டார்லிங்க் ஒரு மாற்று வழியாக இருக்கும். கல்வி, தொழில்கள், மற்றும் ஆன்லைன் சேவைகளுக்கு இது உதவலாம்.

இது ஒரு புரட்சிகரமான வாய்ப்பு தான். ஆனா, அதிக விலை இருக்கும் என்று தெரிகிறது. இருந்தாலும், ஸ்டார்லிங்க், இந்தியாவின் இணைய எதிர்காலத்தை மாற்றுமா? விரைவில் பதில் தெரியும்!

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்