பிரியாணிக்குப் பின் தர்பூசணி.. மும்பை குடும்பத்தை மொத்தமாகப் பலிவாங்கிய உணவு? நீங்களும் இதைப் பண்றீங்களா?

மும்பையின் பைதோனி பகுதியில் வசித்து வந்த ஒரே குடும்பத்தைச் சேர்ந்த கணவன், மனைவி மற்றும் அவர்களது இரண்டு மகள்கள் மர்மமான முறையில் உயிரிழந்த சம்பவம் அந்தப் பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது. உணவு நச்சுத்தன்மை (Food Poisoning) காரணமாக இந்த உயிரிழப்புகள் நிகழ்ந்திருக்கலாம் என்று போலீஸார் சந்தேகிக்கும் நிலையில், இது குறித்த திடுக்கிடும் தகவல்கள் தற்போது வெளியாகியுள்ளன. 40 வயதான அப்துல்லா டோகாடியா, அவரது மனைவி நஸ்ரின் (35) மற்றும் மகள்கள் ஆயிஷா (16), ஜைனப் (13) ஆகியோரே உயிரிழந்த துரதிர்ஷ்டசாலிகள் ஆவர்.

மும்பை போலீஸார் அளித்த தகவலின்படி, கடந்த ஏப்ரல் 25-ம் தேதி இரவு இந்தச் சம்பவம் தொடங்கியுள்ளது. அன்று இரவு 10:30 மணியளவில் உயிரிழந்த நான்கு பேர் உட்பட குடும்ப உறுப்பினர்கள் மற்றும் நெருங்கிய உறவினர்கள் என மொத்தம் ஒன்பது பேர் ஒன்றாகச் சேர்ந்து இரவு உணவைச் சாப்பிட்டுள்ளனர். சாப்பிட்டு முடித்த பிறகு உறவினர்கள் அவரவர் வீட்டிற்குத் திரும்பிவிட்டனர். அதன் பிறகு நள்ளிரவு 1:00 மணி முதல் 1:30 மணிக்குள், வீட்டில் இருந்த அந்த நான்கு பேர் மட்டும் தர்பூசணி பழத்தைச் சாப்பிட்டதாகத் தெரிகிறது.

மறுநாள் காலை 5:30 மணி முதல் 6:00 மணிக்குள், நான்கு பேருக்கும் கடுமையான வாந்தி மற்றும் வயிற்றுப்போக்கு ஏற்பட்டு உடல்நிலை மோசமடைந்தது. உடனடியாகக் குடும்ப மருத்துவரை அணுகிய அவர்கள், நிலைமை சீராகாததால் மேல் சிகிச்சைக்காக ஜே.ஜே மருத்துவமனைக்குக் கொண்டு செல்லப்பட்டனர். அங்கு மருத்துவர்கள் தீவிர சிகிச்சை அளித்தும் பலனின்றி, காலை 10:15 மணியளவில் இளைய மகள் ஜைனப் உயிரிழந்தார். அவரைத் தொடர்ந்து அன்று இரவு 10:30 மணியளவில் தந்தை அப்துல்லாவும், பின்னர் சிகிச்சை பலனின்றி தாயும் மூத்த மகளும் அடுத்தடுத்து உயிரிழந்தனர்.

உயிரிழந்தவர்களின் உடல்கள் பிரேதப் பரிசோதனை செய்யப்பட்டுள்ளன. இருப்பினும், அவர்களின் மரணத்திற்கான இறுதி காரணம் 'ஹிஸ்டோபாதாலஜிகல்' (Histopathological) அறிக்கை வந்த பிறகே உறுதி செய்யப்படும் என்று போலீஸார் தெரிவித்துள்ளனர். தற்போது ஜே.ஜே மார்க் காவல் நிலையத்தில் இது தொடர்பாகத் தற்செயலான மரணம் (Accidental Death) என வழக்குப் பதிவு செய்யப்பட்டுள்ளது. முதற்கட்ட விசாரணையில், அந்த குடும்பத்தினர் தர்பூசணி சாப்பிடுவதற்கு முன்பாக பிரியாணி சாப்பிட்டதாகத் தகவல் கிடைத்துள்ளது. பிரியாணியா அல்லது தர்பூசணியா, எது நச்சுத்தன்மையாக மாறியது என்பது குறித்து விசாரணை தீவிரமடைந்துள்ளது.

இதேபோன்ற மற்றொரு துயரச் சம்பவம் ஜார்க்கண்ட் மாநிலத்தின் கிரீடி மாவட்டத்திலும் நிகழ்ந்துள்ளது. அங்குள்ள பஜ்டோ கிராமத்தில் தெருவோரக் கடையில் 'கோல்கப்பா' மற்றும் 'சாட்' சாப்பிட்ட 7 வயது சிறுவன் உயிரிழந்துள்ளான். மேலும் 18 பேர் உடல்நலக்குறைவு ஏற்பட்டு மருத்துவமனையில் அனுமதிக்கப்பட்டுள்ளனர். இந்தச் சம்பவம் குறித்து உள்ளூர் போலீஸாரும் சுகாதாரத் துறையினரும் தீவிர விசாரணை நடத்தி வருகின்றனர். கோடைக்காலத்தில் இதுபோன்ற தெருவோர உணவுகள் எளிதில் கெட்டுப்போக வாய்ப்புள்ளதால் மக்கள் எச்சரிக்கையாக இருக்க வேண்டும் என அதிகாரிகள் கேட்டுக்கொண்டுள்ளனர்.

பொதுவாக அசுத்தமான உணவு அல்லது தண்ணீரை உட்கொள்வதால் உணவு நச்சுத்தன்மை ஏற்படுகிறது. இது கடுமையான வயிற்றுப்போக்கு, வாந்தி, மயக்கம் மற்றும் வயிற்று வலியை உண்டாக்கும். உணவுப் பாதுகாப்பு மற்றும் சுகாதாரத்தில் மக்கள் அதிக கவனம் செலுத்த வேண்டும் என்று அதிகாரிகள் தொடர்ந்து வலியுறுத்தி வருகின்றனர். மும்பை மற்றும் ஜார்க்கண்ட் சம்பவங்கள் உணவு விஷயத்தில் நாம் எவ்வளவு கவனமாக இருக்க வேண்டும் என்பதை ஒரு எச்சரிக்கையாக உணர்த்தியுள்ளன.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.