.png)
ஆந்திரப் பிரதேச காங்கிரஸ் கமிட்டி தலைவரான ஒய்.எஸ். ஷர்மிளா, தனது கணவர் அனில் குமாருடன் இன்று சென்னை வந்தார். சென்னை தலைமைச் செயலகத்தில் தமிழக முதலமைச்சர் சி. ஜோசப் விஜய்யை நேரில் சந்தித்த அவர், தனது மகள் ஒய்.எஸ். அஞ்சலி ரெட்டியின் திருமண அழைப்பிதழை வழங்கி, திருமண நிகழ்ச்சியில் குடும்பத்துடன் கலந்து கொண்டு மணமக்களை ஆசீர்வதிக்குமாறு அழைப்பு விடுத்தார். இந்த சந்திப்பு தொடர்பான தகவலை ஷர்மிளா தனது சமூக வலைதளப் பதிவிலும் பகிர்ந்துள்ளார்.
முதல்வர் விஜய்யை சந்தித்தது குறித்து பதிவிட்டுள்ள ஷர்மிளா, தமிழக முதலமைச்சரை நேரில் சந்தித்து தனது மகளின் திருமணத்திற்கு தனிப்பட்ட முறையில் அழைத்ததில் மகிழ்ச்சி அடைவதாகவும், விஜய் அளித்த அன்பான வரவேற்பு மற்றும் நல்வாழ்த்துகளுக்கு நன்றி தெரிவிப்பதாகவும் குறிப்பிட்டுள்ளார்.
ஷர்மிளாவின் மகள் அஞ்சலி ரெட்டி - சோமல ரகுராம் ரெட்டி திருமணம் வரும் நவம்பர் 25ஆம் தேதி நடைபெற உள்ளதாக ஏற்கனவே அறிவிக்கப்பட்டுள்ளது. இதற்கான நிச்சயதார்த்தம் செப்டம்பர் 24ஆம் தேதி நடைபெற்றது. திருமணத்திற்குப் பிறகு டிசம்பர் 5ஆம் தேதி வரவேற்பு நிகழ்ச்சி நடைபெற உள்ளதாகவும் தெரிவிக்கப்பட்டுள்ளது.
மகளின் திருமணத்தை முன்னிட்டு ஷர்மிளா பல்வேறு அரசியல் தலைவர்களை நேரில் சந்தித்து அழைப்பிதழ் வழங்கி வருகிறார். இதன் ஒரு பகுதியாகவே தமிழக முதலமைச்சர் விஜய்யையும் சந்தித்து அழைப்பு வழங்கியுள்ளார். முன்னதாக திமுக நாடாளுமன்ற உறுப்பினர் கனிமொழி மற்றும் தேமுதிக தலைவர் பிரேமலதா விஜயகாந்த் உள்ளிட்டோரையும் ஷர்மிளா நேரில் சந்தித்து திருமண அழைப்பிதழை வழங்கியதாக செய்திகள் வெளியாகியுள்ளன.
ஒய்.எஸ். ஷர்மிளா ஆந்திரப் பிரதேச அரசியலில் முக்கியமான தலைவராக உள்ளார். மறைந்த ஆந்திரப் பிரதேச முன்னாள் முதலமைச்சர் ஒய்.எஸ். ராஜசேகர ரெட்டியின் மகளும், முன்னாள் முதலமைச்சர் ஒய்.எஸ். ஜெகன் மோகன் ரெட்டியின் சகோதரியும் ஆவார். ஆரம்பத்தில் தனது சகோதரர் ஜெகன் மோகன் ரெட்டியின் அரசியல் பயணத்தில் தீவிரமாக செயல்பட்ட ஷர்மிளா, பின்னர் தெலங்கானாவில் தனிக்கட்சியைத் தொடங்கினார்.
அதன்பின்னர் 2024ஆம் ஆண்டு தனது கட்சியை காங்கிரஸுடன் இணைத்த அவர், ஆந்திரப் பிரதேச காங்கிரஸ் கமிட்டி தலைவராக பொறுப்பேற்றார். தற்போது தனது மகளின் திருமண ஏற்பாடுகளில் கவனம் செலுத்தி வரும் நிலையில், பல்வேறு அரசியல் தலைவர்களை நேரில் சந்தித்து திருமண அழைப்பிதழ் வழங்கி வருகிறார்.
இந்த வரிசையில் தமிழக முதலமைச்சர் விஜய்யுடனான ஷர்மிளாவின் சந்திப்பும் கவனம் பெற்றுள்ளது. இருவரின் சந்திப்பு அரசியல் நிகழ்வாக அல்லாமல், தனது மகளின் திருமணத்திற்கான தனிப்பட்ட அழைப்பாகவே நடைபெற்றதாக ஷர்மிளா வெளியிட்டுள்ள தகவல்களில் தெரிவிக்கப்பட்டுள்ளது.
மேலும், ஷர்மிளாவின் சென்னை பயணத்தின் போது தமிழக காங்கிரஸ் தலைவர்களையும் சந்தித்து திருமண அழைப்பிதழ் வழங்கியதாக தகவல்கள் வெளியாகியுள்ளன. இதனால் அவரது மகள் திருமண நிகழ்வில் அரசியல் மற்றும் பல்வேறு துறைகளைச் சேர்ந்த முக்கிய பிரமுகர்கள் பங்கேற்கும் சூழல் உருவாகியுள்ளது. முதல்வர் விஜய்யை நேரில் சந்தித்து, திருமண அழைப்பிதழுடன் ஷர்மிளா அழைப்பு விடுத்த சம்பவம் தற்போது அரசியல் வட்டாரத்திலும் கவனம் பெற்றுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்
