.png)
தமிழக அரசியல் வரலாற்றில் இன்று ஒரு மிக முக்கியமான நாளாகக் கருதப்படுகிறது. தமிழக வெற்றிக் கழகத்தின் தலைவரும், தமிழகத்தின் புதிய முதலமைச்சருமான சி. ஜோசப் விஜய், இன்று சட்டசபையில் தனது பெரும்பான்மையை நிரூபிக்க உள்ளார். கடந்த மே 10-ஆம் தேதி முதலமைச்சராகப் பதவியேற்ற விஜய், ஆளுநரின் உத்தரவுப்படி இன்று நம்பிக்கை வாக்கெடுப்பை எதிர்கொள்கிறார். 234 உறுப்பினர்களைக் கொண்ட தமிழக சட்டசபையில், ஆட்சியைத் தக்கவைக்க 118 உறுப்பினர்களின் ஆதரவு தேவை என்ற நிலையில், விஜய்யின் அரசுக்கு ஆதரவாகவும் எதிராகவும் பல்வேறு அரசியல் நகர்வுகள் மிகத் தீவிரமாக நடந்து வருகின்றன. இது தமிழகத்தின் முதல் 'கூட்டணி ஆட்சி' என்பதால், ஒட்டுமொத்த இந்திய அரசியலும் இன்று சென்னையை உற்று நோக்கிக் கொண்டிருக்கிறது. முதலமைச்சர் விஜய் தலைமையிலான அரசுக்கு தற்போது காங்கிரஸ், விடுதலைச் சிறுத்தைகள் கட்சி (விசிக), இடதுசாரி கட்சிகள் மற்றும் முஸ்லிம் லீக் ஆகியவை தங்களது ஆதரவை உறுதி செய்துள்ளன. இதன் மூலம் விஜய்யின் கூட்டணி பலம் 120 இடங்களை எட்டியுள்ளதாகக் கூறப்படுகிறது. இருப்பினும், கடைசி நேரத்தில் எந்தவொரு மாற்றமும் நிகழ்ந்துவிடக் கூடாது என்பதில் முதலமைச்சர் மிகத் தீவிரமாக உள்ளார்.
இதன் ஒரு பகுதியாக, நேற்று முன்தினம் முன்னாள் முதலமைச்சர் மு.க. ஸ்டாலின், வைகோ உள்ளிட்ட மூத்த தலைவர்களை விஜய் நேரில் சந்தித்துப் பேசினார். இது ஒரு மரியாதை நிமித்தமான சந்திப்பு என்று சொல்லப்பட்டாலும், நம்பிக்கை வாக்கெடுப்பிற்கு முன்னதாக அரசியல் ரீதியாக அனைவரையும் அரவணைத்துச் செல்லும் முயற்சியாகவே இது பார்க்கப்படுகிறது.இந்த அரசியல் சதுரங்கத்தில் ஒரு மிகப்பெரிய திருப்பமாக, அதிமுகவின் ஒரு அதிருப்தி குழு முதலமைச்சர் விஜய்க்கு ஆதரவு தெரிவித்துள்ளதாகத் தகவல்கள் வெளியாகியுள்ளன. முன்னாள் அமைச்சர்கள் சி.வி. சண்முகம் மற்றும் எஸ்.பி. வேலுமணி தலைமையிலான ஒரு தரப்பினர், எடப்பாடி பழனிசாமிக்கு எதிராகத் தங்களது அதிருப்தியை வெளிப்படுத்திவிட்டு, விஜய்யின் அரசுக்கு ஆதரவளிக்க முன்வந்துள்ளனர். திராவிடக் கட்சிகளின் பிடியில் இருந்து தமிழகத்தை மீட்க இது ஒரு வாய்ப்பு என்று அவர்கள் தரப்பில் சொல்லப்பட்டாலும், இது அதிமுகவின் உள்கட்சிப் பூசலை இன்னும் அதிகப்படுத்தியுள்ளது.
இந்த ஆதரவு விஜய்க்கு ஒரு கூடுதல் பலமாக அமைந்தாலும், சட்ட ரீதியாக இதில் பல சிக்கல்கள் நீடிக்கின்றன.வாக்கெடுப்பிற்கு முன்னதாக ஒரு பின்னடைவாக, தவெக கட்சியின் ஒரு எம்.எல்.ஏ தேர்தலில் ஒரே ஒரு வாக்கு வித்தியாசத்தில் வெற்றி பெற்றதை எதிர்த்து நீதிமன்றத்தில் வழக்கு தொடரப்பட்டுள்ளது. இந்த வழக்கின் காரணமாக, சம்பந்தப்பட்ட எம்.எல்.ஏ இன்றைய வாக்கெடுப்பில் கலந்துகொள்ள சென்னை உயர்நீதிமன்றம் தடை விதித்துள்ளது. இது விஜய்யின் தரப்பில் சற்றே கவலையை ஏற்படுத்தியுள்ளது. இந்த உத்தரவை எதிர்த்து உச்சநீதிமன்றத்தில் மேல்முறையீடு செய்யப்பட்டுள்ளது. ஒரு வாக்கு கூட ஆட்சியின் தலையெழுத்தைத் தீர்மானிக்கலாம் என்பதால், இந்தத் தடை உத்தரவு இன்றைய பலப்பரீட்சையில் ஒரு முக்கியப் பங்கு வகிக்கும் என்று எதிர்பார்க்கப்படுகிறது.இன்று காலை சட்டசபை கூடியதும், சபாநாயகர் முன்னிலையில் நம்பிக்கை தீர்மானம் கொண்டு வரப்படும்.
இதில் குரல் வாக்கெடுப்பு அல்லது ரகசிய வாக்கெடுப்பு முறை பின்பற்றப்படலாம். எதிர்க்கட்சியான திமுக மற்றும் எடப்பாடி பழனிசாமி தலைமையிலான அதிமுக தரப்பினர் விஜய்க்கு எதிராக வாக்களிக்க வாய்ப்புள்ளதால், ஒவ்வொரு வாக்கும் இன்று மிக முக்கியமானது. தமிழக வரலாற்றில் முதல்முறையாகச் சட்டசபை நிகழ்வுகள் இன்று நேரலையாகத் ஒளிபரப்பப்பட உள்ளன. விஜய்யின் அரசியல் பயணம் ஒரு முதலமைச்சராகத் தொடருமா? அல்லது மீண்டும் ஒரு அரசியல் நெருக்கடி ஏற்படுமா? என்பது இன்னும் சில மணிநேரங்களில் தெரிந்துவிடும். ஒட்டுமொத்த தமிழக மக்களும் தங்களது அரசியல் எதிர்காலத்தை அறிய ஆவலோடு காத்திருக்கிறார்கள்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
