.png)
தமிழக வெற்றிக் கழகத்தின் தேர்தல் அறிக்கை தயாரிப்புக் குழுவினர் மண்டல வாரியாகச் சுற்றுப்பயணம் மேற்கொண்டு பொதுமக்களிடமும் பல்வேறு சங்கங்களிடமும் கோரிக்கைகளைப் பெற்று வருகின்றனர். மதுரை மற்றும் கடலூரைத் தொடர்ந்து இன்று கோவையில் மேற்கு மண்டல அளவிலான ஆலோசனைக் கூட்டம் நடைபெற்றது. இக்கூட்டத்தின் இடையே செய்தியாளர்களைச் சந்தித்த தேர்தல் அறிக்கை தயாரிப்புக் குழுவின் உறுப்பினர் அருண்ராஜ், மக்கள் தங்களின் கட்சி மீது மிகுந்த நம்பிக்கை வைத்துள்ளதாகவும், மற்ற கட்சிகள் வெறும் மனுக்களை மட்டுமே வாங்கிச் செல்வதாகவும், ஆனால் தவெக உண்மையான மாற்றத்தை ஏற்படுத்தும் என்றும் நம்பிக்கை தெரிவித்தார்.
செய்தியாளர் சந்திப்பின் போது, கட்சியின் மற்றொரு முக்கிய நிர்வாகியான செங்கோட்டையன் அவர்கள் ஏன் இந்தத் தேர்தல் அறிக்கை தயாரிப்புக் குழுவில் இடம் பெறவில்லை அல்லது முக்கியத்துவம் அளிக்கப்படவில்லையா என்ற கேள்வி முன்வைக்கப்பட்டது. இந்தக் கேள்வியால் சற்றே டென்ஷன் ஆன அருண்ராஜ், தேவையில்லாமல் ஒரு பிரச்சினையை உருவாக்க முயற்சி செய்ய வேண்டாம் என்று காட்டமாகக் கூறினார். ஒவ்வொரு பணிக்கும் தலைவர் விஜய் தனித்தனியாகக் குழுக்களை அமைத்துள்ளதாகவும், செங்கோட்டையன் அவர்கள் தேர்தல் பிரச்சாரக் குழுவின் மிக முக்கியமான உறுப்பினராக இருக்கிறார் என்றும் அவர் விளக்கமளித்தார். தவெகவில் அனைவருக்கும் சம அந்தஸ்து வழங்கப்படுவதாகவும், யாரையும் ஒதுக்கும் எண்ணம் தலைவருக்கு இல்லை என்றும் அவர் உறுதியாகத் தெரிவித்தார்.
தொடர்ந்து பேசிய அவர், அதிமுக மற்றும் பாஜக உள்ளிட்ட கட்சிகளின் விமர்சனங்கள் குறித்துப் பதிலளித்தார். தவெகவின் ஒரே அரசியல் எதிரி திமுக என்ற தீய சக்திதான் என்றும், கொள்கை ரீதியான எதிரி பாஜக என்றும் அவர் மீண்டும் ஒருமுறை தெளிவுபடுத்தினார். அதிமுகவினர் எங்களை வெளியில் கூட வரவிட மாட்டோம் என்று எச்சரிப்பதாகக் கூறப்படுவது குறித்துக் கேட்டபோது, மக்களின் ஆதரவு இருக்கும் வரை எங்களைத் தடுத்து நிறுத்த முடியாது என்று அவர் பதிலடி கொடுத்தார். குறிப்பாக, வேலூரில் கட்சியின் நிகழ்ச்சிக்கு அனுமதி மறுக்கப்பட்டதையும், புதிய கட்டுப்பாட்டு விதிகள் (SOP) தவெகவை முடக்குவதற்காகவே கொண்டு வரப்பட்டுள்ளதாகவும் அவர் குற்றம் சாட்டினார்.
சிறுபான்மையினரின் வாக்குகள் குறித்துப் பேசிய அருண்ராஜ், திமுக சிறுபான்மையினரை வெறும் ஓட்டு வங்கியாக மட்டுமே பயன்படுத்தி வருவதாகவும், அவர்களது உரிமைகளுக்காக உண்மையான பாதுகாவலராகத் தலைவர் விஜய் இருப்பார் என்றும் கூறினார். மேலும், வேட்பாளர் தேர்வு என்பது மிகவும் நேர்மையான முறையிலும் தகுதியான நபர்களைக் கொண்டும் நடத்தப்படும் என்று உறுதி அளித்தார். தமிழக அரசின் கட்டுப்பாடுகள் மற்றும் அனுமதி மறுப்புகளுக்கு மக்கள் தேர்தலில் தகுந்த பாடம் புகட்டுவார்கள் என்றார்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
