எதிர்க்கட்சிகள் கூட்டம்: இன்று பெங்களூரு செல்கிறார் முதலமைச்சர் மு.க.ஸ்டாலின்!

எதிர்க்கட்சிகள் கூட்டத்தில் பங்கேற்க சென்னையிலிருந்து இன்று காலை 11.20 மணிக்கு விமானம் மூலம் முதலமைச்சர் மு.க.ஸ்டாலின் புறப்பட உள்ளார்.

நடைபெற இருக்கும் 2024 நாடாளுமன்றத் தேர்தலில் பாஜக கூட்டணிக்கு எதிரான எதிர்க்கட்சித் தலைவர்களின் இரண்டாவது கூட்டம், பெங்களூருவில் இன்று மற்றும் நாளை நடைபெற உள்ளது. இக்கூட்டத்தில் கலந்து கொள்வதற்காக தமிழ்நாடு முதலமைச்சர் திமுக தலைவருமான மு க ஸ்டாலின் சென்னையில் இருந்து இன்று பெங்களூர் செல்கிறார். 

குறிப்பாக அடுத்த ஆண்டு நடைபெறும் நாடாளுமன்றத் தேர்தலில் பாஜக தலைமையிலான தேசிய ஜனநாயக கூட்டணிக்கு எதிராக வலுவான கூட்டணியை அமைக்க எதிர்க்கட்சிகள் முயற்சி மேற்கொண்டு வருகின்றன. அதன்படி, பிகார் தலைநகர் பாட்னாவில் கடந்த மாதம் 23ஆம் தேதி, எதிர்க்கட்சிகளின் முதல் கூட்டம் நடைபெற்ற நிலையில், இரண்டாவது கூட்டம் காங்கிரஸ் தலைமையில் பெங்களூருவில் இன்றும், நாளையும் நடைபெறுகிறது.

முதல் நாளான இன்று எதிர்க்கட்சித் தலைவர்களுக்கு முதலமைச்சர் சித்தராமையா இரவு விருந்து அளிக்கிறார். இதனைத் தொடர்ந்து, நாளை நடைபெறும் கூட்டத்தில் வலுவான எதிர்க் கூட்டணியை அமைப்பதற்கான வியூகங்கள் வகுக்கப்பட உள்ளதாக தகவல்கள் தெரிவிக்கின்றன.

இந்தக் கூட்டத்தில் காங்கிரஸ் சார்பில் முன்னாள் தலைவர்கள் சோனியா காந்தி, ராகுல் காந்தி, தேசியத் தலைவர் மல்லிகார்ஜுன கார்கே, திமுக சார்பில் முதலமைச்சர் மு.க.ஸ்டாலின் உள்ளிட்ட 24 கட்சிகளின் தலைவர்கள் பங்கேற்க உள்ளனர். இந்த கூட்டத்தில் பங்கேற்பதற்காக சென்னையிலிருந்து இன்று காலை 11.20 மணிக்கு விமானம் மூலம் முதலமைச்சர் மு.க.ஸ்டாலின் புறப்பட உள்ளார். இதற்காக, காலை 11 மணிக்கு அவரது இல்லத்தில் இருந்து புறப்பட்டு சென்னை விமான நிலையம் செல்ல இருக்கிறார்.

இதையும் படிக்க:அமைச்சர் பொன்முடி வீட்டில் அமலாக்கத்துறையினர் சோதனை!