குழந்தைகளின் மரணம்.. தமிழகத்தில் 'கோல்ட்ரிஃப்' இருமல் மருந்துக்கு அதிரடி தடை!

மத்திய பிரதேசம் மற்றும் இராஜஸ்தான் மாநிலங்களில் சுமார் 11 குழந்தைகளின் மரணம் தொடர்பாக 'கோல்ட்ரிஃப்' (Coldrif) என்ற இருமல் மருந்து மீது எழுந்த சந்தேகத்தைத் தொடர்ந்து, தமிழக அரசு அதன் விற்பனைக்குத் தடை விதித்து உத்தரவிட்டுள்ளது. சென்னை நகரத்தை மையமாகக் கொண்ட ஒரு மருந்து உற்பத்தி நிறுவனம் தயாரித்த இந்த இருமல் சிரப், செப்டம்பர் 7-ஆம் தேதி முதல் மத்திய பிரதேசத்தின் சிந்த்வாரா மாவட்டத்தில் நிகழ்ந்த குழந்தைகள் இறப்புகளுடன் தொடர்புபடுத்தப்பட்டுள்ள நிலையில், இந்த நடவடிக்கையைத் தமிழக அரசு எடுத்துள்ளது.

உணவுப் பாதுகாப்பு மற்றும் மருந்து நிர்வாகத் துறையின் மூத்த அதிகாரி ஒருவர் அளித்த தகவல்படி, தமிழகத்தில் அக்டோபர் 1, 2025 முதல் 'கோல்ட்ரிஃப்' இருமல் மருந்தின் விற்பனை முழுமையாகத் தடை செய்யப்பட்டுள்ளது. மேலும், சந்தையில் உள்ள அனைத்து மருந்துப் பொட்டலங்களையும் உடனடியாகத் திரும்பப் பெறவும், கையிருப்பில் உள்ள மருந்துகளை முடக்கவும் (freeze the stocks) உத்தரவிடப்பட்டுள்ளது.

இந்த இருமல் சிரப்பைத் தயாரிக்கும் மருந்து உற்பத்தி நிறுவனம், காஞ்சிபுரம் மாவட்டத்திற்கு அருகிலுள்ள சுங்குவார்சத்திரம் பகுதியில் இயங்கி வருகிறது. கடந்த இரண்டு நாட்களாக அந்த உற்பத்தி நிலையத்தில் அதிகாரிகள் தீவிர ஆய்வுகளை மேற்கொண்டுள்ளனர். ஆய்வின்போது, மருந்து மாதிரிகள் சேகரிக்கப்பட்டு, அரசு ஆய்வகங்களுக்கு அனுப்பப்பட்டுள்ளன. இந்தக் குழந்தைகளுக்கு ஏற்பட்ட சிறுநீரகக் கோளாறு (kidney ailment) மற்றும் மரணங்களுக்குக் காரணமாக இருக்கலாம் என்று சந்தேகிக்கப்படும் 'டைஎத்திலீன் கிளைகால்' (Diethylene Glycol) என்ற வேதிப்பொருள் இருப்பதற்கான சோதனைகள் இந்த மாதிரிகளில் நடத்தப்படவுள்ளன என்று அந்த அதிகாரி தெரிவித்துள்ளார்.

மத்திய அரசின் எச்சரிக்கை மற்றும் அவசர உத்தரவு

இந்தியா முழுவதும் இந்த இருமல் சிரப் சர்ச்சை பூதாகரமாக வெடித்துள்ள நிலையில், மத்திய சுகாதார அமைச்சகமும் அவசரமாகச் செயல்பட்டுள்ளது. நாடு முழுவதும் குழந்தைகள் உயிரிழந்த சம்பவங்களை அறிந்த மத்திய சுகாதார அமைச்சகம், வெள்ளிக்கிழமை அன்று அனைத்து மாநிலங்கள் மற்றும் யூனியன் பிரதேசங்களுக்கு ஓர் அறிவுறுத்தலை வழங்கியது.

சுகாதார சேவைகள் தலைமை இயக்குநரகம் (Directorate General of Health Services) வெளியிட்ட அந்த ஆலோசனையின்படி, இரண்டு வயதுக்குட்பட்ட குழந்தைகளுக்கு இருமல் மற்றும் சளிக்கான மருந்துகளைப் பரிந்துரைக்கக் கூடாது என்று மருத்துவர்களுக்கு உத்தரவிடப்பட்டுள்ளது.

மத்தியப் பிரதேசத்தில் சிந்த்வாரா மாவட்டத்தில் செப்டம்பர் 7 முதல் இதுவரை இந்தச் சிரப்பைக் குடித்ததாகச் சந்தேகிக்கப்படும் சம்பவங்களில் 9 குழந்தைகள் உயிரிழந்துள்ளனர். மேலும், இராஜஸ்தானில் இரண்டு பச்சிளங் குழந்தைகள் இறந்ததாகவும் செய்திகள் தெரிவிக்கின்றன.

தமிழகத்தில் மருந்து நிர்வாகத் துறை வெளியிட்டுள்ள உத்தரவில், ஆய்வக முடிவுகள் வெளியாகும் வரை சுங்குவார்சத்திரத்தில் உள்ள அந்த உற்பத்தி ஆலையில் இருமல் சிரப் உற்பத்தியை நிறுத்தவும் நிறுவனம் அறிவுறுத்தப்பட்டுள்ளது. ஆய்வறிக்கைகள் இன்னும் சில நாட்களில் வெளியாகும் என்று எதிர்பார்க்கப்படுகிறது. மத்திய அரசும் இந்த உற்பத்தி ஆலையில் இருந்து சேகரிக்கப்பட்ட மாதிரிகளைச் சோதிக்க உள்ளது. மூத்த காங்கிரஸ் தலைவர் கமல்நாத், இந்தத் துயரமான மரணங்களுக்கு இருமல் சிரப்களில் Brake Oil Solvent கலக்கப்பட்டதே காரணம் என்று குற்றம் சாட்டியுள்ளார்.

சென்னை நிறுவனத்தால் தயாரிக்கப்படும் இந்தச் சிரப் தமிழ்நாடு மட்டுமின்றி, புதுச்சேரி, இராஜஸ்தான் மற்றும் மத்தியப் பிரதேசம் ஆகிய மாநிலங்களுக்கும் விநியோகம் செய்யப்படுகிறது என்பதால், இந்தத் தடை உத்தரவு நாட்டின் மற்ற பகுதிகளுக்கும் ஒரு கடுமையான எச்சரிக்கையை விடுத்துள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.