.png)
மதுராந்தகம் இடைத்தேர்தல் பிரச்சாரம் தீவிரமடைந்துள்ள நிலையில், தவெக தலைமையிலான மதச்சார்பற்ற சமூகநீதி வெற்றிக் கூட்டணியின் முக்கிய தலைவர்கள் நேற்று ஒரே மேடையில் திரண்டனர். இந்த பிரச்சார கூட்டத்தில் விசிக தலைவர் தொல். திருமாவளவன், காங்கிரஸ் மாநிலத் தலைவர் மாணிக்கம் தாகூர், மதிமுக பொதுச்செயலாளர் வைகோ மற்றும் அமைச்சர் ஆதவ் அர்ஜுனா, மரியா வில்சன் உள்ளிட்ட கூட்டணி தலைவர்கள் பங்கேற்றனர். தவெக கூட்டணி உருவான பிறகு கூட்டணிக் கட்சிகள் இணைந்து நடத்திய முதல் முக்கிய பிரச்சாரக் கூட்டமாகவும் இது அமைந்தது.
இந்தக் கூட்டத்தில் பேசிய விசிக தலைவர் திருமாவளவன், திமுக கூட்டணியில் இருந்து விலகி தவெகவுடன் கைகோர்த்ததற்கான அரசியல் பின்னணியை விரிவாக விளக்கினார். மேலும் அமைச்சர் ஆதவ் அர்ஜுனா தன்னை அணுகிய காலகட்டத்தில் நடைபெற்ற பேச்சுவார்த்தைகள் குறித்தும் மனம் திறந்து பேசினார். தனது அரசியல் பயணத்தில் கூட்டணி முடிவுகளை ஒருபோதும் வெறும் பதவி அல்லது அதிகாரத்தை அடிப்படையாகக் கொண்டு எடுக்கவில்லை எனக் கூறிய திருமாவளவன், கடந்த காலங்களில் கூட்டணி தொடர்பாக தனக்கு ஏற்பட்ட அனுபவங்களையும் சுட்டிக்காட்டினார். குறிப்பாக, 2016ஆம் ஆண்டில் திமுகவுடனான கூட்டணியில் ஏற்பட்ட அரசியல் சூழலே தாம் அந்த அணியிலிருந்து விலகுவதற்கு முக்கிய காரணமாக அமைந்ததாக அவர் தெரிவித்தார்.
பின்னர் மீண்டும் திமுக கூட்டணியில் இணைந்து தேர்தல்களை சந்தித்ததாகவும், தொடர்ந்து கிடைத்த வெற்றிகளுக்குப் பிறகு 2026 அரசியல் சூழலில் எதிர்பாராத மாற்றங்கள் ஏற்பட்டதாகவும் திருமாவளவன் குறிப்பிட்டார். இதன் தொடர்ச்சியாக தவெக தலைமையிலான அணியுடன் இணைந்து பயணிக்கும் முடிவு உருவானதாக அவர் விளக்கினார். இந்தச் சூழலில்தான் ஆதவ் அர்ஜுனா தொடர்பான விவகாரத்தை திருமாவளவன் விரிவாகப் பேசியுள்ளார். திமுக கூட்டணியில் விசிக இருந்தபோது, பாஜக அல்லாத மாற்று அணியை உருவாக்குவது தொடர்பாக ஆதவ் அர்ஜுனா தன்னை பலமுறை சந்தித்து பேசியதாக அவர் கூறினார்.
டெல்லியில் தன்னை நீண்ட நேரம் சந்தித்த ஆதவ் அர்ஜுனா, மாற்று அரசியல் அணியை உருவாக்குவது குறித்தும், அதில் விசிக இடம்பெறுவது குறித்தும் பேசியதாக தெரிவித்தார். மேலும், ஆட்சியிலும் பங்கு அதிகாரத்திலும் பங்கு என்ற அரசியல் வாய்ப்புகள் குறித்தும் தன்னிடம் பேசப்பட்டதாக அவர் தெரிவித்தார். ஆனால், ஏற்கெனவே இடம்பெற்றிருந்த மதச்சார்பற்ற முற்போக்கு கூட்டணியை வெறும் பதவிக்காக உடைத்துவிட்டார் என்ற விமர்சனம் தனது அரசியல் வாழ்க்கையில் வந்துவிடக் கூடாது என்பதில் தான் உறுதியாக இருந்ததாக திருமாவளவன் தெரிவித்தார். அதனால் அந்த முயற்சிகளுக்கு அப்போது தான் சம்மதிக்கவில்லை என்றும் அவர் கூறினார்.
இதற்கு இடையே, ‘அனைவருக்குமான தலைவர் அம்பேத்கர்’ நூல் வெளியீட்டு நிகழ்வைச் சுற்றிய அரசியல் நிகழ்வுகளையும் திருமாவளவன் நினைவுகூர்ந்தார். அந்த நிகழ்வில் விஜய் பங்கேற்பது தொடர்பாக ஆதவ் அர்ஜுனா மற்றும் ஜான் ஆரோக்கியசாமி தன்னை சந்தித்ததாகவும், ஆனால் அப்போது திமுக கூட்டணியில் இருந்ததால் அந்த நிகழ்வில் பங்கேற்பது கூட்டணிக்குள் குழப்பத்தை ஏற்படுத்தக்கூடும் எனக் கருதி தான் விலகியதாகவும் அவர் தெரிவித்தார்.
தற்போது அரசியல் சூழல் மாறியுள்ளதாகக் கூறிய திருமாவளவன், தவெகவுடன் இணைந்து பயணிப்பதில் கொள்கை முரண்பாடு இல்லை என்றும் தெரிவித்தார். குறிப்பாக மதச்சார்பின்மை மற்றும் சமூகநீதியை முன்னிறுத்துவதாக தவெக தரப்பு கூறியிருப்பதை சுட்டிக்காட்டிய அவர், புதிய அரசியல் அணியுடன் இணைந்து செயல்படுவதற்கான சூழலை மக்கள் தீர்ப்பே உருவாக்கியதாகக் குறிப்பிட்டார். மேலும், விஜய் காங்கிரஸ் உள்ளிட்ட பாஜக அல்லாத கட்சிகளின் ஆதரவை நாடியதை தனது மதச்சார்பற்ற அரசியல் நிலைப்பாட்டுக்கான முக்கிய அறிகுறியாக பார்ப்பதாகவும் திருமாவளவன் தெரிவித்தார். இதே கருத்தை மதுராந்தகம் கூட்டத்திலும் அவர் வலியுறுத்தியதாக செய்திகள் தெரிவிக்கின்றன.
இதற்கிடையில், தவெக கூட்டணியில் பாமக இணையப்போவதாக வெளியாகும் தகவல்கள் குறித்தும் திருமாவளவன் சமீபத்தில் எச்சரிக்கை விடுத்துள்ளார். பாமக இடம்பெறும் எந்த அணியிலும் விசிக இருக்காது என்பது தங்களது நீண்டகால நிலைப்பாடு என்றும் அவர் தெரிவித்துள்ளார். இவ்வாறு திமுக கூட்டணியில் இருந்து தவெக கூட்டணிக்கு விசிக நகர்ந்த பின்னணியை திருமாவளவன் வெளிப்படையாக விளக்கியிருப்பது, மதுராந்தகம் இடைத்தேர்தல் பிரச்சாரத்தில் புதிய அரசியல் விவாதத்தை ஏற்படுத்தியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்
