“தமிழ்த் தேர்விலே 85,000 பட்டதாரி ஆசிரியர்கள் தோல்வி..” அதிலும் பாஸ் மார்க்கு எவ்வளவுன்னு தெரிஞ்சா!..?

தமிழ்ச்சூழல் பலகாலமாக தனது தாய் மொழியின் மீதான பற்றை இழந்து வருகிறது என்பதுதான் உண்மை.  அதனை உறுதிப்படுத்தும் விதமாக அதிர்ச்சியூட்டும் சம்பவம் தற்போது நடந்துள்ளது. தமிழ்நாடு முழுவதும் முதுகலை ஆசிரியர் காலி பணியிடங்களை நிரப்புவதற்கான அறிவிப்பு வெளியானது.  இந்நிலையில் சென்னையில் முதுநிலை பட்டதாரி ஆசிரியர் வேலைக்காக நடைபெற்ற தேர்வில் ஆசிரியர்களில் 85,000 பேர் தமிழ் பாடத்தில் ‘தோல்வி’ அடைந்துள்ளனர். வெறும் 50க்கு 20 மதிப்பெண் எடுத்தால் தேர்ச்சி பெற்று விடலாம் என்ற நிலையில் தான் இந்த தோல்வி எண்ணிக்கை பெரும் பேசுபொருளாகியுள்ளது.

முதுகலை ஆசிரியர், உடற்கல்வி இயக்குநர் நிலை - 1 மற்றும் கணினி பயிற்றுநர் நிலை 1, ஆகிய பணியிடங்கள் நிரப்பப்பட்ட உள்ளது. தமிழ் - 216, ஆங்கிலம் - 197, பொருளியல் - 169,  கணிதம் -232, இயற்பியல் - 233, வேதியியல் - 217, தாவரவியல் - 147, , வணிகவியல் 198, விலங்கியல் 131,வரலாறு - 68, புவியியல் - 15, அரசியல் அறிவியல் - 14, கணினி பயிற்றுநர் நிலை - 57, உடற்கல்வி இயக்குநர் நிலை -102 என்று மொத்தம் 1996 காலிப்பணியிடங்கள் நிரப்பப்பட உள்ளது.

இதற்கு 10.07.2025 முதல் 12.08.2025 விண்ணப்பிக்க ஆசிரியர்களுக்கு வாய்ப்பு வழங்கப்பட்டது. அதன்பிறகு அக்டோபர் 12ம் தேதி தேர்வு நடந்தது. முதுநிலை பட்டதாரிகள் 2.20லட்சம் பேர் எழுதினர். இதற்கான தேர்வு முடிவுகள் வெளியாகி உள்ளன. இதில் கட்டாய தமிழ் பாட தேர்வில் 85,000த்துக்கு அதிகமானோர் தோல்வி அடைந்துள்ளனர்.

 தமிழக அரசு வேலையில் சேர்பவர்களுக்கு தமிழ் எழுத, படிக்க தெரிய வேண்டும் என்பதற்காக, அனைத்து போட்டித் தேர்வுகளிலும் 2022 -ல் தமிழ் தேர்வு அறிமுகம் செய்யப்பட்டது. கட்டாய தமிழ் தகுதித்தாள்தேர்வில் மொத்தம் 30 கேள்விகள் கேட்கப்பட்டு இருக்கும். இந்த கேள்விகளுக்கு 50 மதிப்பெண் வழங்கப்படும். அதில் 20 மதிப்பெண் எடுத்தால் தேர்ச்சி பெறுவார்கள். 10ம் வகுப்பு மாணவர்கள் எழுதும் அளவில் தான் கேள்விகள் இருக்கும். இதனால் எளிதில் தேர்ச்சி பெறலாம். மேலும் இந்த கட்டாய தமிழ் தேர்வில் தேர்ச்சியடைந்தால் தான் பாடம் சார்ந்த விடைத்தாள் திருத்தப்படும்.

ஆனால் இதிலேயே 85,000 ஆசிரியர்கள் தமிழ் பாடத்தில் தேர்ச்சியடைவில்லை என்பது ஆசிரியர்களின் தகுதியை கேள்விக்குறியாக்கியுள்ளது. இதில் தோல்வியடைந்த  பாடம் சார்ந்த விடைத்தாள் திருத்தப்படாது என்று அறிவிக்கப்பட்டுள்ளது. தாய் மொழி தமிழாக வைத்து கொண்டு, பள்ளி முதல் தமிழ் பாடத்தை படித்த பலராலும் கூட இந்த தேர்வில் தேர்ச்சியடைய முடியவில்லை என்பதுதான் மற்றுமொரு சோகம்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.