.png)
தமிழக சட்டமன்றப் பொதுத்தேர்தல் 2026-க்கான வாக்குப்பதிவு இன்று மாநிலம் முழுவதும் ஒரு திருவிழாவைப் போலக் கொண்டாடப்பட்டு வருகிறது. அரசியல் களத்தில் அனல் பறக்கும் விவாதங்கள் ஒரு பக்கம் இருந்தாலும், சாதாரண மக்கள் தங்களது ஜனநாயகக் கடமையை ஆற்றுவதில் காட்டும் ஆர்வம் ஒட்டுமொத்த தேசத்தையும் வியக்க வைத்துள்ளது. அந்த வகையில், முத்துநகரம் என்று அழைக்கப்படும் தூத்துக்குடியில் இன்று ஒரு சுவாரஸ்ய சம்பவம் அரங்கேறியுள்ளது.
தூத்துக்குடி எஸ்.என். தெருவைச் சேர்ந்தவர் மணிகண்டன். இவருக்கும் தங்க மீனாட்சி என்கிற பெண்ணிற்கும் இன்று காலை உறவினர்கள் மற்றும் நண்பர்கள் முன்னிலையில் கோலாகலமாகத் திருமணம் நடைபெற்றது. பொதுவாகத் திருமணம் முடிந்தவுடன் புதுமண தம்பதிகள் கோயிலுக்குச் செல்வது தான் வழக்கம். ஆனால், மணிகண்டன் மற்றும் தங்க மீனாட்சி ஜோடி ஒரு மாற்றத்தை ஏற்படுத்த விரும்பினர். இன்று தமிழகத்தின் எதிர்காலத்தைத் தீர்மானிக்கும் தேர்தல் நாள் என்பதால், தங்களது வாழ்க்கையின் மிக முக்கியமான நாளில் ஜனநாயகக் கடமையையும் தவறாமல் ஆற்ற வேண்டும் என்று அவர்கள் முடிவெடுத்தனர்.
திருமணச் சடங்குகள் முடிந்த அடுத்த சில நிமிடங்களிலேயே, மணமகன் மணிகண்டன் தனது பட்டு வேட்டி சட்டையுடனும், மணமகள் தங்க மீனாட்சி தனது பட்டுச் சேலை மற்றும் நகைகளுடனும் தூத்துக்குடியில் உள்ள எஸ்.ஏ.வி பள்ளி வாக்குச்சாவடிக்கு வருகை தந்தனர். தாலி கட்டிய கையோடு, கழுத்தில் மாலைகளுடனும், நெற்றியில் சந்தனம் குங்குமத்துடனும் திருமணக் கோலத்திலேயே அவர்கள் வாக்குச்சாவடிக்குள் நுழைந்தபோது அங்கிருந்தவர்கள் ஒரு நிமிடம் திகைத்துப் போயினர். பின்னர் அந்தத் தம்பதியின் சமூக அக்கறையைப் புரிந்து கொண்ட பொதுமக்கள் அவர்களுக்கு வழிவிட்டுத் தங்களது வாழ்த்துக்களைத் தெரிவித்தனர்.
வாக்குச்சாவடிக்குள் சென்ற மணிகண்டன் மற்றும் தங்க மீனாட்சி ஜோடி, முறைப்படி தங்களது அடையாள அட்டைகளைக் காட்டிவிட்டு வரிசையில் நின்று வாக்குகளைப் பதிவு செய்தனர். வாக்களித்துவிட்டு வெளியே வந்த அவர்களின் விரலில் வைக்கப்பட்ட மை அடையாளம், மணக்கோலத்திற்கு இன்னும் அழகு சேர்த்தது. செய்தியாளர்களிடம் பேசிய மணிகண்டன், "வாழ்க்கையில் திருமணம் எவ்வளவு முக்கியமோ, அதே அளவுக்கு இந்த ஜனநாயகக் கடமையும் முக்கியம். நாங்கள் புதிய வாழ்க்கையைத் தொடங்கும் இந்த நாளில், எங்கள் மாநிலத்திற்கான நல்ல ஆட்சியையும் தேர்வு செய்ய வேண்டும் என்று நினைத்தோம். அதற்காகவே திருமணம் முடிந்த கையோடு நேராக இங்கு வந்தோம்" என்று நெகிழ்ச்சியுடன் தெரிவித்தார்.
மணமகள் தங்க மீனாட்சி பேசுகையில், "திருமணம் முடிந்த கையோடு ஓட்டுப் போட்டது எனக்கு மிகவும் சந்தோஷமாக இருக்கிறது. ஒரு ஓட்டுதானே என்று யாரும் நினைக்கக்கூடாது. ஒவ்வொரு ஓட்டும் இந்த நாட்டின் மாற்றத்திற்கு மிக முக்கியமானது. எனவே, அனைவரும் எங்களைப் போலவே தங்களது ஜனநாயகக் கடமையை ஆற்ற வேண்டும் என்று கேட்டுக்கொள்கிறேன்" என்றார்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்
