.png)
சென்னை வடக்கு அரசியலின் இதயமாகக் கருதப்படும் ராயபுரம் தொகுதியில், இந்த முறை ஒரு அமைதியான புரட்சி நடந்துள்ளது. பெரும்பான்மையாக அதிமுக, திமுக ஆகிய இரண்டு காட்சிகள் மாறி மாறி ஆதிக்கம் செலுத்தி வந்த இந்தத் தொகுதியில், தமிழக வெற்றி கழகம் (TVK) சார்பில் போட்டியிட்ட ஒரு சாதாரண ஆட்டோ ஓட்டுநர் விஜய் தாமு கணிசமான வாக்கு வித்தியாசத்தில் வெற்றி பெற்றிருப்பது, அரசியல் வட்டாரங்களையே ஆச்சரியத்தில் ஆழ்த்தியுள்ளது.
நடிகர் விஜய் தலைமையிலான இந்தக் கட்சி, “சாதாரண மக்களும் அரசியலில் முன்னிலை பெற முடியும்” என்ற வாசகத்தை வெறும் கோஷமாக அல்ல, நடைமுறையாக மாற்றியிருக்கிறது என்பதை இந்த வெற்றி வெளிப்படுத்தி இருக்கிறது. தினசரி வாழ்க்கைக்காக போராடும் ஒரு ஆட்டோ ஓட்டுநர், பல வருட அரசியல் அனுபவமுள்ள வேட்பாளர்களை பின்னுக்கு தள்ளி வெற்றி பெற்றிருப்பது, வாக்காளர்களின் மனநிலையில் ஏற்பட்ட மாற்றத்தை தெளிவாகக் காட்டுகிறது.
இந்தத் தொகுதியில் நடைபெற்ற பிரசாரத்தின் போது, விஜய் தாமு தனது எளிமையான பின்னணியையும், மக்கள் வாழ்க்கையை நெருக்கமாக அறிந்த அனுபவத்தையும் முன்னிறுத்தி இருந்தார். மேலும் வீடு வீடாகச் சென்று மக்களை நேரடியாகச் சந்தித்து பேசியது, அவருக்கான நம்பிக்கையை வாக்குகளாக மாற்றியுள்ளது. குறிப்பாக, தொழிலாளர்கள், நடுத்தர வர்க்கம் மற்றும் இளைஞர்கள் மத்தியில் அவருக்கு கிடைத்த ஆதரவு இந்த வெற்றியின் முக்கிய காரணமாக பார்க்கப்படுகிறது.
ராயபுரம் போன்ற அரசியல் முக்கியத்துவம் வாய்ந்த தொகுதியில், ஒரு “சாதாரண மனிதன்” வெற்றி பெறுவது வெறும் தேர்தல் முடிவாக இல்லாமல் அது சமூக அரசியலில் ஒரு மாற்றத்தின் தொடக்கமாகவே கருதப்படுகிறது. பணம், பலம், பழைய வாக்கு வங்கிகள் ஆகியவற்றைத் தாண்டி, நம்பிக்கை மற்றும் நேர்மை போன்ற மதிப்புகள் வாக்காளர்களிடம் இன்னும் முக்கியத்துவம் பெறுகின்றன என்பதற்கான சான்றாக இந்த முடிவு பார்க்கப்படுகிறது.
இந்த வெற்றி, தமிழக அரசியலில் புதிய தலைமுறைக்கு ஒரு ஊக்கமாகவும் மாறியுள்ளது. அரசியலில் நுழைவது பெரியவர்கள் மட்டுமே என்ற எண்ணத்தை உடைத்து, பொதுமக்களுக்கும் வாய்ப்பு இருக்கிறது என்ற நம்பிக்கையை இது உருவாக்கியுள்ளது. ராயபுரம் தொகுதியில் நிகழ்ந்த இந்த மாற்றம், எதிர்கால தேர்தல்களில் மற்ற தொகுதிகளுக்கும் பரவுமா என்ற கேள்வியை எழுப்பியுள்ளது. எதுவாக இருந்தாலும், இந்த வெற்றி தமிழக அரசியலில் ஒரு புதிய கதையை எழுதத் தொடங்கியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்
