மாதவரம் யாருக்கு? தி.மு.க.வின் வெற்றியைத் தடுக்குமா அ.தி.மு.க.? - "மாலை முரசு - கான்சிலிடிக்ஸ்" கருத்துக் கணிப்பு முடிவுகள்!

"மாலை முரசு - கான்சிலிடிக்ஸ்" இணைந்து தமிழகம் முழுவதும் நடத்திய மாபெரும் கருத்துக் கணிப்பு முடிவுகள் குறித்து "Tamil Nadu Political League" நிகழ்ச்சியில் மாதவரம் தொகுதி பற்றியும், வரும் சட்டமன்ற தேர்தலில் அங்கு வெற்றிப் பெற அதிகம் வாய்ப்புள்ள கூட்டணி எது? என்பது குறித்த தகவல்கள் இங்கே தொகுக்கப்பட்டுள்ளன. திருவள்ளூர் மாவட்டத்தின் மிக முக்கியமான தொகுதியான மாதவரம், புழல் சிறைச்சாலை மற்றும் மாதவரம் பால் பண்ணை போன்ற அடையாளங்களைக் கொண்டது. தற்போதைய எம்.எல்.ஏ.வாக தி.மு.க.வின் சுதர்சனம் செயல்பட்டு வரும் நிலையில், வரவிருக்கும் தேர்தலில் அ.தி.மு.க. சார்பில் முன்னாள் அமைச்சர் மாதவரம் மூர்த்தி மீண்டும் களமிறக்கப்பட்டுள்ளதால் போட்டி மிகக் கடுமையாக இருக்கும் என்று எதிர்பார்க்கப்படுகிறது.

இத்தொகுதியின் முக்கிய வாக்காளர் அடையாளங்களைப் பொறுத்தவரை, 40 வயதிற்கு மேற்பட்டவர்கள் 56 சதவீதத்துடன் பெரும்பான்மையாக உள்ளனர். இளம் வாக்காளர்கள் (18-25 வயது) 12 சதவீதம் பேர் உள்ளனர். அரசுப் பணியில் இருந்து ஓய்வு பெற்றவர்கள் மற்றும் ஓய்வூதியம் பெறுபவர்கள் அதிகம் வசிக்கும் இப்பகுதியில் அவர்களின் வாக்குகள் தீர்மானிக்கும் சக்தியாக உள்ளன. சாதி ரீதியான அடிப்படையில் ஆதிதிராவிடர் வகுப்பினர் 45 சதவீதமும், வன்னியர் சமுதாயத்தினர் 40 சதவீதமும் உள்ளனர். முதலியார் சமுதாயத்தினர் 5 சதவீதம் பேர் இத்தொகுதியில் வசிக்கின்றனர். பெண் வாக்காளர்கள் 51 சதவீதத்துடன் முன்னிலையில் உள்ளனர்.

மாதவரம் தொகுதியின் முக்கிய உள்ளூர் பிரச்சினைகளாகக் கடுமையான போக்குவரத்து நெரிசல் மற்றும் நிலத்தடி நீர் மாசுபடுதல் போன்றவை மக்களிடையே அதிருப்தியை ஏற்படுத்தியுள்ளன. குறிப்பாக, செங்குன்றம் மற்றும் புழல் பகுதிகளில் உள்ள ஏரிகள் 'கேட்ச்மென்ட் ஏரியா' (Catchment Area) என அறிவிக்கப்பட்டிருப்பதால், சுமார் 20-க்கும் மேற்பட்ட கிராமங்களில் உள்ள குடியிருப்புகளுக்கு முறையான அனுமதி பெறுவதில் சிக்கல் நீடிக்கிறது. மேலும், தாலுகா அளவிலான அரசு மருத்துவமனை மற்றும் கூடுதல் ஆரம்ப சுகாதார நிலையங்கள் அமைக்க வேண்டும் என்பது இத்தொகுதி மக்களின் நீண்ட நாள் கோரிக்கையாக உள்ளது.

மாதவரம் தொகுதியின் முழு கருத்து கணிப்பு பற்றி தெரிந்து கொள்ள : இங்கே கிளிக் செய்யவும்

கடந்த 2021 சட்டமன்றத் தேர்தல் முடிவுகளின்படி, தி.மு.க. வேட்பாளர் சுதர்சனம் 50.40 சதவீத வாக்குகளைப் பெற்று வெற்றி பெற்றார். அந்தத் தேர்தலில் அ.தி.மு.க. சார்பில் போட்டியிட்ட மாதவரம் மூர்த்தி 31.40 சதவீத வாக்குகளை மட்டுமே பெற்றார். அப்போது தி.மு.க. 134 வாக்குச் சாவடிகளில் (Booths) பலமாகவும், அ.தி.மு.க. 74 சாவடிகளில் மட்டுமே பலமாகவும் இருந்தன. சுமார் 54 சாவடிகள் தி.மு.க.விற்குப் பலவீனமாகவும், 116 சாவடிகள் அ.தி.மு.க.விற்குப் பலவீனமாகவும் இருந்தன.

2024 நாடாளுமன்றத் தேர்தலில் காங்கிரஸ் வேட்பாளர் சசிகாந்த் செந்தில் இத்தொகுதியில் 58.20 சதவீத வாக்குகளைப் பெற்று பெரும் முன்னிலை வகித்தார்.

"கான்சிலிடிக்ஸ்" குழுவின் 2026 தேர்தல் கணிப்பின்படி, மாதவரம் தொகுதியில் தி.மு.க. மீண்டும் முன்னிலை வகிக்க வாய்ப்புள்ளது. இந்த ஆய்வின்படி தி.மு.க. 39 சதவீத வாக்குகளைப் பெற்று முதலிடம் பிடிக்கும் என்றும், அ.தி.மு.க. 35 சதவீத வாக்குகளுடன் இரண்டாம் இடத்தைப் பிடிக்கும் என்றும் கணிக்கப்பட்டுள்ளது. இரு கட்சிகளுக்கும் இடையிலான வெற்றி வித்தியாசம் சுமார் 4 சதவீத வாக்குகள் வரை இருக்கும் என்று எதிர்பார்க்கப்படுகிறது. குறிப்பாக, தமிழக வெற்றி கழகம் இத்தொகுதியில் 20 சதவீத வாக்குகளைப் பெற்றுப் பெரிய தாக்கத்தை ஏற்படுத்தும் என்றும், நாம் தமிழர் கட்சி 8 சதவீத வாக்குகளைப் பெற்றுத் தனது நிலையைத் தக்கவைக்கும் என்றும் தெரிவிக்கப்பட்டுள்ளது.

தற்போதைய நிலவரப்படி, தி.மு.க. வேட்பாளர் சுதர்சனம் மற்றும் அ.தி.மு.க. வேட்பாளர் மாதவரம் மூர்த்தி ஆகிய இருவருமே ஒரே சமுதாயத்தைச் சேர்ந்தவர்கள் என்பதால், வாக்குகள் சிதற வாய்ப்புள்ளது. இருப்பினும், தி.மு.க. தற்போது 39 சதவீத வாக்குகளுடன் முன்னிலையில் இருக்கிறது. அ.தி.மு.க. இழந்த வெற்றியை மீண்டும் பெற வேண்டுமானால், களப்பணிகளை இன்னும் தீவிரப்படுத்த வேண்டும் என்று ஆய்வுகள் தெரிவிக்கின்றன. த.வெ.க. மற்றும் நாம் தமிழர் கட்சி இணைந்து சுமார் 28 சதவீத வாக்குகளைப் பிரிக்கக்கூடும் என்பதால், இது பிரதான கட்சிகளுக்குப் பெரும் சவாலாக அமையும்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.