முந்தைய ரெக்கார்டுகளை எல்லாம் உடைக்குமா தமிழ்நாடு? இந்த முறை ஓட்டு சதவீதம் 80% தாண்டுமா?.. இதோ முழு விவரம்!

தமிழக சட்டமன்ற பொதுத்தேர்தல் 2026-க்கான வாக்குப்பதிவு இன்று காலை தொடங்கி விறுவிறுப்பாக நடைபெற்று வருகிறது. தமிழகத்தின் எதிர்காலத்தைத் தீர்மானிக்கும் இந்த முக்கிய நாளில், மக்கள் காலை முதலே நீண்ட வரிசையில் நின்று தங்களது வாக்குகளைப் பதிவு செய்து வருகின்றனர். ஒவ்வொரு தேர்தலின் போதும் வாக்குப்பதிவு சதவீதம் எவ்வளவு இருக்கும் என்பது மிகப்பெரிய எதிர்பார்ப்பாக அமையும். அந்த வகையில், கடந்த 20 ஆண்டுகளில் தமிழகத்தில் நடந்த சட்டமன்றத் தேர்தல்களில் பதிவான வாக்கு சதவீதங்களை ஒப்பிட்டுப் பார்க்கும்போது, இந்த 2026 தேர்தல் புதிய சரித்திரத்தைப் படைக்கும் என்று எதிர்பார்க்கப்படுகிறது.

கடந்த 2006-ம் ஆண்டு நடைபெற்ற சட்டமன்றத் தேர்தலில் தமிழகத்தில் 70.8 சதவீத வாக்குகள் பதிவாகின. அப்போது மொத்தமாக 3 கோடியே 30 லட்சத்து 45 ஆயிரத்து 949 பேர் தங்களது வாக்குகளைப் பதிவு செய்திருந்தனர். அதனைத் தொடர்ந்து 2011-ம் ஆண்டு நடந்த தேர்தலில் வாக்குப்பதிவு மிகப்பெரிய அளவில் அதிகரித்தது. அந்தத் தேர்தலில் 78.2 சதவீத வாக்குகள் பதிவாகி சாதனை படைத்தது. எண்ணிக்கை அடிப்படையில் பார்த்தால், 3 கோடியே 68 லட்சத்து 42 ஆயிரத்து 687 பேர் அன்றைய தினம் வாக்களித்தனர். இந்த உயர்வு தமிழக அரசியல் களத்தில் பெரும் மாற்றத்தை ஏற்படுத்தியது குறிப்பிடத்தக்கது.

ஆனால், 2016-ம் ஆண்டு நடைபெற்ற தேர்தலில் இந்த சதவீதம் சற்று குறைந்து 73.6 சதவீதமாகப் பதிவானது. அந்தத் தேர்தலில் 4 கோடியே 26 லட்சத்து 46 ஆயிரத்து 591 மக்கள் வாக்களித்திருந்தனர். சதவீதம் குறைந்தாலும் வாக்காளர்களின் எண்ணிக்கை அதிகரித்திருந்தது கவனித்தக்கது. பின்னர் 2021-ம் ஆண்டு நடைபெற்ற கடந்த தேர்தலில் 76.6 சதவீத வாக்குகள் பதிவாகின. இதில் 4 கோடியே 58 லட்சத்து 86 ஆயிரத்து 784 பேர் பங்கேற்று தங்களது ஜனநாயகக் கடமையை ஆற்றினர். ஒவ்வொரு தேர்தலிலும் மக்கள் காட்டும் ஆர்வம் அதிகரித்து வருவதை இந்த புள்ளிவிவரங்கள் நமக்குத் தெளிவாகக் காட்டுகின்றன.

இந்தச் சூழலில், தற்போது நடைபெற்று வரும் 2026 சட்டமன்றத் தேர்தலில் வாக்குப்பதிவு சதவீதம் முன்னெப்போதும் இல்லாத வகையில் 80 சதவீதத்தைத் தாண்டும் என்று கணிக்கப்படுகிறது. இதற்காகத் தேர்தல் ஆணையம் பல்வேறு விழிப்புணர்வு நடவடிக்கைகளை மேற்கொண்டுள்ளது. குறிப்பாக 'சிஸ்டமேட்டிக் வோட்டர்ஸ் எஜுகேஷன் அண்ட் எலக்டோரல் பார்ட்டிசிபேஷன்' (SVEEP) போன்ற பணிகள் மிகத் தீவிரமாக முன்னெடுக்கப்பட்டுள்ளன. இளைஞர்கள் மற்றும் முதல்முறை வாக்காளர்களைக் கவரும் வகையில் சோசியல் மீடியாக்கள் வழியாகவும், நேரடி முகாம்கள் மூலமாகவும் பெரிய அளவில் பிரச்சாரங்கள் செய்யப்பட்டுள்ளன.

தமிழகத்தில் தற்போது நிலவும் அரசியல் சூழல், புதிய கட்சிகளின் வரவு மற்றும் மக்களின் விழிப்புணர்வு ஆகியவையும் இந்த வாக்குப்பதிவு உயர்வுக்கு முக்கியக் காரணமாக இருக்கும் என்று அரசியல் விமர்சகர்கள் கருதுகின்றனர். வெயிலின் தாக்கம் அதிகமாக இருந்தாலும், மக்கள் அதைப் பொருட்படுத்தாமல் ஆர்வத்துடன் வந்து கொண்டிருக்கிறார்கள். குறிப்பாக கிராமப்புறங்களில் வழக்கம்போல அதிகப்படியான வாக்குகள் பதிவாகும் அதே வேளையில், நகர்ப்புறங்களிலும் இந்த முறை மக்கள் ஓட்டு போட அதிக ஆர்வம் காட்டி வருகின்றனர். இதனால் மாலைக்குள் வாக்குப்பதிவு சதவீதம் இதுவரை இல்லாத உச்சத்தை எட்டும் என்று நம்பப்படுகிறது.

20 ஆண்டுகால தேர்தல் வரலாற்றை இந்த முறை 80 சதவீத வாக்குப்பதிவு மூலம் முறியடித்தால், அது இந்திய ஜனநாயகத்திற்கே ஒரு மிகச்சிறந்த முன்னுதாரணமாக அமையும். மாலை 6 மணி வரை வாக்குப்பதிவு நடைபெறவுள்ள நிலையில், இறுதி நிலவரம் என்னவாக இருக்கும் என்பதை அறிய ஒட்டுமொத்த தமிழகமும் ஆவலோடு காத்துக்கொண்டிருக்கிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்