மரண தண்டனையில் இருந்து உயிர் தப்பிய பெண்! “உடலிலும் மனதிலும் வலி”, முதல் முறையாக மனம் திறந்த கைதி...

அமெரிக்காவில் மரண தண்டனை நிறைவேற்றப்பட்டபோது உயிர் பிழைத்த பெண் கைதி, ஒரு மாதத்திற்குப் பிறகு முதன்முறையாகத் தனது அனுபவத்தைப் பகிர்ந்துள்ளார். மரண தண்டனைக்காக ஊசி மூலம் மருந்து செலுத்தப்பட்டும் உயிரிழக்காமல் மருத்துவமனையில் அனுமதிக்கப்பட்ட கிறிஸ்டா பைக், தற்போது உடலிலும் மனதிலும் கடுமையான வலியை அனுபவித்து வருவதாகத் தெரிவித்துள்ளார். “எனது உடல் வலிக்கிறது; கைகள், தொண்டை என அனைத்துப் பகுதிகளிலும் வலி உள்ளது. இந்த வலி உடலோடு மட்டும் முடிந்துவிடவில்லை; மனதிலும் ஆன்மாவிலும் வலியை உணர்கிறேன்” என்று அவர் கூறியிருப்பது அமெரிக்காவில் பெரும் விவாதத்தை ஏற்படுத்தியுள்ளது.

அமெரிக்காவின் டென்னசி மாகாணத்தில் இந்தச் சம்பவம் நடந்துள்ளது. 50 வயதான கிறிஸ்டா பைக்கிற்கு கடந்த செப்டம்பர் 30ஆம் தேதி மரண தண்டனை நிறைவேற்றத் திட்டமிடப்பட்டது. இதற்காக நாஷ்வில்லில் உள்ள ரிவர்பெண்ட் சிறையில் மரண தண்டனைக்கான நடைமுறைகள் தொடங்கப்பட்டன. அப்போது அவருக்கு பென்டோபார்பிட்டல் (Pentobarbital) என்ற மருந்து இரண்டு முறை செலுத்தப்பட்டது. இந்த மருந்து அமெரிக்காவின் சில மாகாணங்களில் மரண தண்டனையை நிறைவேற்றப் பயன்படுத்தப்படுகிறது.

ஆனால், மருந்து செலுத்தப்பட்ட பிறகும் கிறிஸ்டா பைக் உயிரிழக்கவில்லை. அவருடைய உடல்நிலை மோசமடைந்ததைத் தொடர்ந்து, மரண தண்டனை நிறைவேற்றும் நடவடிக்கை நிறுத்தப்பட்டது. பின்னர் அவர் அவசரமாக மருத்துவமனைக்குக் கொண்டு செல்லப்பட்டார். அங்கு பல நாட்கள் சிகிச்சை அளிக்கப்பட்டது. சுமார் 10 நாட்கள் மருத்துவமனையில் இருந்த அவர், அக்டோபர் 10ஆம் தேதி மீண்டும் சிறைக்கு மாற்றப்பட்டார். அமெரிக்காவில் மரண தண்டனைக்கான முழு மருந்து நடைமுறைக்குப் பிறகும் ஒருவர் உயிர் பிழைத்த சம்பவம் மிகவும் அரிதானது என்று கூறப்படுகிறது.

இந்தச் சம்பவம் நடந்து சரியாக ஒரு மாதம் ஆன நிலையில், அக்டோபர் 30ஆம் தேதி கிறிஸ்டா பைக் தனது முதல் பொதுவான அறிக்கையை வெளியிட்டார். தனது வழக்கறிஞர்களிடம் கூறிய தகவல்களை எழுத்து வடிவில் வெளியிட்ட அவர், மரண தண்டனை அறைக்குள் சென்றபோது தான் உயிருடன் திரும்புவோம் என்று எதிர்பார்க்கவில்லை எனத் தெரிவித்துள்ளார். தனது அன்புக்குரியவர்களிடம் நன்றி கூறி, அவர்களிடம் விடைபெற்றுவிட்டதாகவும் குறிப்பிட்டுள்ளார்.

ஆனால், சில நாட்களுக்குப் பிறகு மருத்துவமனையில் தனியாகவும் குழப்பமான நிலையிலும் கண்விழித்ததாக அவர் தெரிவித்துள்ளார். அன்றிலிருந்து இன்றுவரை ஒரு நிமிடம்கூட வலியின்றி இருந்ததில்லை என்றும் கூறியுள்ளார். கைகள், உடல் மற்றும் தொண்டையில் வலி இருப்பதுடன், பேசுவதற்குக்கூட இன்னும் சிரமப்படுவதாகவும் தெரிவித்துள்ளார். உடல்நிலை படிப்படியாக முன்னேறி வருவதாகக் கூறிய அவர், குணமடைவது என்பது எல்லாப் பிரச்சினைகளும் முடிந்துவிட்டன என்று அர்த்தமல்ல என்றும் குறிப்பிட்டுள்ளார்.

இந்தச் சம்பவத்துக்குப் பின்னால் இருந்த நிர்வாகத் தவறுகள் குறித்து அவர் கடுமையான அதிருப்தியையும் வெளிப்படுத்தியுள்ளார். இத்தகைய சூழல் உருவாகக் காரணமானவர்களின் திறமையின்மை தன்னை ஆழமாகப் பாதித்துள்ளதாகக் கூறியுள்ளார். அதே நேரத்தில், தான் கொலை செய்ததாகத் தீர்ப்பளிக்கப்பட்ட பெண்ணின் குடும்பத்தினர் அனுபவித்துவரும் துயரத்தையும் தொடர்ந்து நினைத்துப் பார்ப்பதாகத் தெரிவித்துள்ளார்.

கிறிஸ்டா பைக் மரண தண்டனைக்குத் தள்ளப்பட்டதற்குப் பின்னால் 1995ஆம் ஆண்டு நடந்த கொடூரமான கொலைச் சம்பவம் உள்ளது. அப்போது அவருக்கு 18 வயது. தனது வகுப்புத் தோழியான 19 வயது கோலீன் ஸ்லெம்மர் என்பவரைக் கொலை செய்த வழக்கில் அவர் குற்றவாளியாகத் தீர்ப்பளிக்கப்பட்டார். விசாரணையில், ஸ்லெம்மர் கடுமையாகத் தாக்கப்பட்டு சித்திரவதை செய்யப்பட்டுக் கொலை செய்யப்பட்டதாகக் கூறப்பட்டது. இந்த வழக்கில் 1996ஆம் ஆண்டு பைக்கிற்கு மரண தண்டனை விதிக்கப்பட்டது. அதன் பின்னர் அவர் பல ஆண்டுகளாக மரண தண்டனைக் கைதியாகச் சிறையில் இருந்து வந்தார்.

தற்போது சிறையின் மருத்துவப் பிரிவில் பெரும்பாலும் தனிமையில் வைக்கப்பட்டிருப்பதாகவும் பைக் தெரிவித்துள்ளார். ஏற்கெனவே 28 ஆண்டுகள் தனிமைச் சிறையில் இருந்த அனுபவம் தனக்கு இருப்பதாகக் குறிப்பிட்ட அவர், இப்போதைய தனிமையும் மனதளவில் வேதனையை ஏற்படுத்துவதாகக் கூறியுள்ளார். மருத்துவமனையில் தன்னைப் பராமரித்த மருத்துவர்கள், செவிலியர்கள் மற்றும் மீட்புக் குழுவினருக்கு நன்றியும் தெரிவித்துள்ளார்.

இந்தச் சம்பவம் டென்னசி மாகாணத்தின் மரண தண்டனை நடைமுறைகள் குறித்த கேள்விகளை எழுப்பியுள்ளது. இதே ஆண்டில் மற்றொரு கைதிக்கு மரண ஊசி செலுத்துவதற்கான நடவடிக்கையிலும் சிக்கல் ஏற்பட்டிருந்தது. இதையடுத்து, டென்னசி ஆளுநர் பில் லீ, இந்த ஆண்டு நடைபெறவிருந்த மற்ற மரண தண்டனைகளைத் தற்காலிகமாக நிறுத்தி வைத்து, சம்பவங்கள் குறித்து வெளிப்புற விசாரணைக்கு உத்தரவிட்டுள்ளார்.

கிறிஸ்டா பைக்கின் மரண தண்டனை ரத்து செய்யப்பட்டுவிட்டதா அல்லது மீண்டும் நிறைவேற்றப்படுமா என்பது இன்னும் தெளிவாகவில்லை. நீதிமன்ற முடிவுகள் மற்றும் விசாரணையின் அடிப்படையிலேயே அடுத்தகட்ட நடவடிக்கை அமையும் என எதிர்பார்க்கப்படுகிறது. “நான் ஏன் உயிர் பிழைத்தேன் என்று தெரியவில்லை; இனி என்ன நடக்கும் என்பதும் தெரியவில்லை. ஒவ்வொரு நாளாகக் குணமடைய முயற்சி செய்கிறேன்” என்ற அவரது வார்த்தைகள், இந்தச் சம்பவத்தின் மனிதநேய மற்றும் சட்டரீதியான சிக்கல்களை மீண்டும் உலகின் கவனத்திற்குக் கொண்டுவந்துள்ளன.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்