.png)
ஈரான் மற்றும் இஸ்ரேல் இடையே மூண்டுள்ள போர் பதற்றம் தற்போது உலக நாடுகளின் நிம்மதியைக் கெடுத்துள்ளது. குறிப்பாக, உலகப் பொருளாதாரத்தின் உயிர்நாடியாகக் கருதப்படும் ஹார்முஸ் ஜலசந்திப் பாதையை ஈரான் மூடினால், 1973-ம் ஆண்டு ஏற்பட்ட எண்ணெய் நெருக்கடியை விட மிகப் பெரிய பொருளாதாரப் பேரழிவு ஏற்படும் என நிபுணர்கள் எச்சரிக்கின்றனர். உலக அளவில் பயன்படுத்தப்படும் கச்சா எண்ணெய்ப் போக்குவரத்தில் ஐந்தில் ஒரு பங்கு இந்தப் குறுகிய கடல் வழியாகத்தான் நடக்கிறது. ஒருவேளை இந்தப் பாதை அடைக்கப்பட்டால், சர்வதேசச் சந்தையில் கச்சா எண்ணெய் விநியோகம் முற்றிலுமாக முடங்கி, பெட்ரோல் மற்றும் டீசல் விலைகள் கற்பனை செய்ய முடியாத உயரத்திற்குச் செல்லும் அபாயம் ஏற்பட்டுள்ளது.
தற்போதைய சூழலில் ஈரான் மற்றும் இஸ்ரேல் இடையிலான நேரடி மோதல், மத்திய கிழக்குப் பகுதியில் ஒரு பெரும் போராக உருவெடுக்கும் அறிகுறிகள் தென்படுகின்றன. ஈரான் தனது ஏவுகணைத் தாக்குதல்களுக்குப் பிறகு, இஸ்ரேல் திருப்பித்ாக்கினால் ஹார்முஸ் ஜலசந்தியை முடக்குவோம் என மறைமுகமாக எச்சரித்து வருகிறது. இந்தப் பாதை ஓமன் மற்றும் ஈரான் நாடுகளுக்கு இடையே அமைந்துள்ள ஒரு மிக முக்கியமான கடல் வழித்தடமாகும். சவுதி அரேபியா, ஐக்கிய அரபு அமீரகம், குவைத், ஈராக் மற்றும் ஈரான் ஆகிய நாடுகளின் எண்ணெய் கப்பல்கள் அனைத்தும் இந்த வழியாகத்தான் உலக நாடுகளுக்குச் செல்கின்றன. தினமும் சுமார் 2 கோடி பேரல் கச்சா எண்ணெய் இந்த ஒரு குறுகிய பாதை வழியாகவே கடந்து செல்கிறது என்பது குறிப்பிடத்தக்கது.
வரலாற்றைத் திரும்பிப் பார்த்தால், 1973-ம் ஆண்டு அரபு-இஸ்ரேல் போரின் போது அரபு நாடுகள் எண்ணெய் ஏற்றுமதிக்குத் தடை விதித்தன. அப்போது கச்சா எண்ணெய் விலை ஒரே நாளில் பல மடங்கு உயர்ந்ததுடன், வளர்ந்த நாடுகளின் பொருளாதாரம் நிலைகுலைந்தது. ஆனால், தற்போதைய சூழல் அதைவிட மிக மோசமானதாக இருக்கும் என்று பொருளாதார வல்லுநர்கள் கணித்துள்ளனர். ஏனெனில், அன்றைய காலகட்டத்தை விட இன்று உலகம் எரிசக்தி தேவையில் பல மடங்கு முன்னேறியுள்ளது. ஹார்முஸ் ஜலசந்தி அடைக்கப்பட்டால், ஆசிய நாடுகளான இந்தியா, சீனா மற்றும் ஜப்பான் ஆகியவை மிகக் கடுமையான பாதிப்புகளைச் சந்திக்கும். குறிப்பாக இந்தியா தனது கச்சா எண்ணெய் தேவையில் 80 சதவீதத்திற்கும் மேலாக இறக்குமதியை நம்பி இருப்பதால், இது நாட்டின் ஒட்டுமொத்தப் பொருளாதாரத்தையும் முடக்கிவிடும்.
இந்தப் பாதையை ஈரான் முடக்கினால், கச்சா எண்ணெய் விலை ஒரு பேரலுக்கு 150 டாலர் முதல் 200 டாலர் வரை உயரக்கூடும் என அஞ்சப்படுகிறது. இது நடந்தால், இந்தியாவில் பெட்ரோல் விலை லிட்டருக்கு பல நூறு ரூபாய்கள் உயர வாய்ப்புள்ளது. எரிபொருள் விலை உயர்வு என்பது வெறும் வாகன ஓட்டிகளை மட்டும் பாதிப்பதோடு நின்றுவிடாது. சரக்கு போக்குவரத்துச் செலவு அதிகரிப்பதால், அத்தியாவசியப் பொருட்களான காய்கறிகள், மளிகைச் சாமான்கள் மற்றும் மருந்துப் பொருட்களின் விலையும் சாமானிய மக்கள் வாங்க முடியாத அளவிற்கு உயரும். இது ஒட்டுமொத்த பணவீக்கத்தையும் விண்ணைத் தொட வைக்கும் என்பதில் ஐயமில்லை.
அமெரிக்கா மற்றும் அதன் கூட்டணி நாடுகள் இந்தப் பாதையைப் பாதுகாக்கத் தங்களது போர்க்கப்பல்களை இப்பகுதியில் நிலைநிறுத்தியுள்ளன. இருப்பினும், ஈரான் தனது கடற்படை மற்றும் ஏவுகணைகள் மூலம் இந்தப் பாதையில் செல்லும் கப்பல்களைத் தாக்கத் தொடங்கினால், அது ஒரு முழு அளவிலான உலகப் போராக மாறக்கூடும். ஹார்முஸ் ஜலசந்தி என்பது வெறும் கடல் பாதை மட்டுமல்ல, அது உலகப் பொருளாதாரத்தின் 'தொண்டை' போன்றது. அந்தத் தொண்டை நெரிக்கப்பட்டால், உலக வர்த்தகம் மூச்சுத் திணறிப் போகும். கச்சா எண்ணெய் மட்டுமின்றி, இயற்கை எரிவாயு (LNG) விநியோகத்திலும் கத்தார் போன்ற நாடுகள் இந்தப் பாதையையே நம்பியுள்ளன. இதனால் மின்சார உற்பத்தியும் பல நாடுகளில் பாதிக்கப்பட வாய்ப்புள்ளது.
தற்போது உலக நாடுகள் அனைத்தும் ஈரானையும் இஸ்ரேலையும் அமைதி காக்குமாறு வலியுறுத்தி வருகின்றன. போர் தீவிரமடைந்து இந்தப் போக்குவரத்துப் பாதை பாதிக்கப்பட்டால், அதிலிருந்து மீண்டு வர உலக நாடுகளுக்குப் பல ஆண்டுகள் ஆகலாம். ஏற்கனவே கொரோனா பாதிப்பு மற்றும் உக்ரைன்-ரஷ்யா போரினால் தள்ளாடிக் கொண்டிருக்கும் உலகப் பொருளாதாரம், மற்றுமொரு பெரிய அடியைத் தாங்கும் நிலையில் இல்லை. எனவே, வரும் நாட்கள் உலக வரலாற்றில் மிக முக்கியமானவையாகக் கருதப்படுகின்றன. ஹார்முஸ் ஜலசந்தியில் ஏற்படும் ஒரு சிறிய சலசலப்பு கூட உங்கள் பாக்கெட்டில் இருக்கும் பணத்தின் மதிப்பைத் தீர்மானிக்கும் சக்தியாக இன்று மாறியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
