டிரம்பை சந்தித்த "ஜேசன் மில்லர்".. இந்தியாவின் "கன்வின்ஸ்" முயற்சி பலிக்குமா?

அமெரிக்க அதிபர் டொனால்ட் டிரம்ப் மீண்டும் பதவியேற்ற பிறகு, அமெரிக்கா - இந்தியா இடையேயான உறவுகளில் பதற்றம் தொடர்ந்து அதிகரித்தே வருகிறது. குறிப்பாக, வர்த்தகப் போர் மற்றும் ரஷ்யாவிடமிருந்து இந்தியா தொடர்ந்து கச்சா எண்ணெய் வாங்குவது தொடர்பான கருத்து வேறுபாடுகளால், இரு நாடுகளுக்கும் இடையே விரிசல் ஏற்பட்டது. டிரம்ப் நிர்வாகம், இந்தியாவின் பொருட்களுக்கு 50% வரி விதித்திருந்தது. இதில் 25% பரஸ்பர வரியாகவும், மேலும் 25% ரஷ்ய எண்ணெய் வாங்கியதற்கான அபராதமாகவும் விதிக்கப்பட்டது. இந்த நடவடிக்கையை இந்தியா, "நியாயமற்றது மற்றும் ஏற்க முடியாதது" என்று கண்டித்திருந்தது.

இந்தியாவின் லாபிஸ்ட் ஜேசன் மில்லர்

இந்தியாவுக்கும் அமெரிக்காவுக்கும் இடையிலான இந்தத் தற்போதைய பதற்றமான சூழலுக்கு மத்தியில், இந்தியா தனது நிலைப்பாட்டை அமெரிக்க அரசுக்கு எடுத்துரைப்பதற்காக, ஜேசன் மில்லர் தலைமையிலான SHW பார்ட்னர்ஸ் LLC என்ற லாபிங் நிறுவனத்தை ஒப்பந்தம் செய்துள்ளது. இந்த நிறுவனத்திற்கு ஒரு வருடத்திற்கு $1.8 மில்லியன் (சுமார் ₹15 கோடி) கட்டணம் நிர்ணயிக்கப்பட்டுள்ளது. ஜேசன் மில்லர், ட்ரம்ப்பின் கடந்தகால தேர்தல் பிரச்சாரங்களில் முக்கியப் பங்கு வகித்தவர்.

ட்ரம்ப் - மில்லர் சந்திப்பு

இந்தியாவுடனான மோதல் உச்சத்தில் இருந்தபோது, ஜேசன் மில்லர் வாஷிங்டனில் அதிபர் டொனால்ட் ட்ரம்ப் மற்றும் அவரது நிர்வாக அதிகாரிகளைச் சந்தித்தார். மில்லர் தனது சமூக வலைத்தளப் பக்கத்தில், "வாஷிங்டனில் பல நண்பர்களைச் சந்தித்த இந்த வாரம் அருமையாக இருந்தது. அதிபர் ட்ரம்ப்பை நேரில் சந்திக்கும் வாய்ப்புக் கிடைத்தது கூடுதல் மகிழ்ச்சி" என்று பதிவிட்டு, அவருடன் எடுத்த புகைப்படத்தையும் பகிர்ந்துள்ளார்.

இந்த சந்திப்பின் நோக்கம் குறித்து அதிகாரப்பூர்வமாக எதுவும் அறிவிக்கப்படவில்லை. இருப்பினும், இந்த சந்திப்பின் நேரம் மிகவும் முக்கியத்துவம் வாய்ந்ததாகக் கருதப்படுகிறது.

சமாதான முயற்சிகளும், மோதல்களும்

இந்த சந்திப்பு நடந்த சில நாட்களுக்கு முன்புதான், ஷாங்காய் ஒத்துழைப்பு அமைப்பின் மாநாட்டில் பிரதமர் மோடி, சீன அதிபர் ஜி ஜின்பிங் மற்றும் ரஷ்ய அதிபர் விளாடிமிர் புதின் ஆகியோருடன் கலந்துகொண்டது குறித்து டொனால்ட் ட்ரம்ப் விமர்சித்திருந்தார். "இந்தியா மற்றும் ரஷ்யாவை நாம் சீனாவின் இருண்ட, ஆழமான பகுதியிடம் இழந்துவிட்டோம்" என்று அவர் கூறியிருந்தார்.

இதற்குப் பிறகு, டிரம்ப் தனது நிலைப்பாட்டை சற்று மாற்றிக்கொண்டார். செய்தியாளர்களிடம் பேசிய அவர், "நான் எப்போதும் மோடியின் நண்பனாக இருப்பேன். அவர் ஒரு சிறந்த பிரதமர். ஆனால், இந்த நேரத்தில் அவர் செய்வது எனக்குப் பிடிக்கவில்லை. இருந்தாலும், இந்தியாவுக்கும் அமெரிக்காவுக்கும் இடையே ஒரு சிறப்பான உறவு உள்ளது. கவலைப்பட ஒன்றுமில்லை" என்று கூறியிருந்தார்.

இதற்குப் பதிலளித்த பிரதமர் மோடி, "அதிபர் ட்ரம்ப்பின் உணர்வுகளையும், நமது உறவுகள் குறித்த அவரது நேர்மறையான மதிப்பீட்டையும் நான் மிகவும் பாராட்டுகிறேன், அதை முழுமையாக ஏற்றுக்கொள்கிறேன்" என்று தனது சமூக வலைத்தளத்தில் பதிவிட்டிருந்தார்.

இந்தச் சூழலில், ஜேசன் மில்லரின் சந்திப்பு, இந்தியா தனது வர்த்தகப் பிரச்சினைகளைத் தீர்க்கவும், அமெரிக்காவுடனான உறவுகளை மீண்டும் வலுப்படுத்தவும் மேற்கொள்ளும் ஒரு முக்கிய முயற்சியாகப் பார்க்கப்படுகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.