.png)
நேபாளத்திற்குச் செல்லும் இந்தியச் சுற்றுலாப் பயணிகளுக்குப் புதிய கட்டுப்பாடுகள் விதிக்கப்பட்டுள்ளதாகச் சமூக வலைதளங்களிலும் சில ஊடகங்களிலும் வெளியான செய்திகள் முற்றிலும் அடிப்படையற்றவை என்று நேபாள அரசு அதிகாரப்பூர்வமாகத் தெரிவித்துள்ளது. இந்தியப் பயணிகளின் வருகையைக் குறைக்க நேபாளம் முயற்சிப்பதாக உருவான பிம்பத்தை அந்நாட்டு சுற்றுலா வாரியம் வன்மையாக மறுத்துள்ளது. இது தொடர்பாக அந்நாட்டு அரசு வெளியிட்டுள்ள விளக்கத்தில், இந்தியச் சுற்றுலாப் பயணிகளின் பயணம் தொடர்பாகப் பரப்பப்படும் தவறான தகவல்கள் தங்களுக்கு மிகுந்த கவலையை அளிப்பதாகக் குறிப்பிட்டுள்ளது.
நேபாள சுற்றுலா வாரியம் வெளியிட்டுள்ள அறிக்கையில், எல்லையைக் கடக்கும் இந்தியர்களுக்கு அடையாள அட்டையைக் கட்டாயமாக்கியிருப்பதாகவும், தங்கும் காலத்தை 30 நாட்களாகக் குறைத்திருப்பதாகவும் வெளியான தகவல்கள் முற்றிலும் பொய்யானவை என்று கூறப்பட்டுள்ளது. மேலும், கூடுதல் காலம் தங்கும் பயணிகளின் வாகனங்களைப் பறிமுதல் செய்ய உத்தரவிடப்பட்டுள்ளதாக வெளியான செய்திகளில் எந்த உண்மையும் இல்லை என்றும், இவை அனைத்தும் மக்களைத் திசைதிருப்பும் நோக்கில் பரப்பப்படும் வதந்திகள் என்றும் நேபாளம் திட்டவட்டமாகத் தெரிவித்துள்ளது.
இந்தியச் சுற்றுலாப் பயணிகளின் தங்கும் காலத்தைக் கட்டுப்படுத்தும் வகையில் நேபாள அரசு எந்த ஒரு புதிய கொள்கையையும் அறிமுகப்படுத்தவில்லை. பல ஆண்டுகளாக இந்தியா மற்றும் நேபாளம் இடையே நடைமுறையில் உள்ள திறந்த எல்லை ஒப்பந்தம் மற்றும் இருதரப்பு புரிந்துணர்வுகளில் எந்த மாற்றமும் செய்யப்படவில்லை. இரு நாடுகளுக்கும் இடையே நிலவும் வரலாற்று ரீதியான மக்கள் தொடர்பு, கலாச்சார உறவுகள் மற்றும் சுற்றுலா ஒத்துழைப்பு ஆகியவை முன்னெப்போதையும் விட வலிமையாகவும் மாற்றமில்லாமலும் இருப்பதாக அந்த அறிக்கையில் சுட்டிக்காட்டப்பட்டுள்ளது.
நில வழியாகத் தனது சொந்த வாகனங்களில் நேபாளத்திற்கு வரும் இந்தியப் பயணிகள் மற்றும் சர்வதேச சுற்றுலாப் பயணிகளின் வசதிக்காகப் புதிய ஆன்லைன் நடைமுறை ஒன்று அறிமுகப்படுத்தப்பட்டுள்ளது. நிதி அமைச்சகத்தின் கீழ் இயங்கும் சுங்கத் துறை உருவாக்கியுள்ள இந்த டிஜிட்டல் முறை மூலம், வெளிநாட்டு வாகனங்கள் நேபாளத்திற்குள் நுழைவதற்கான தற்காலிக அனுமதி மற்றும் கட்டணங்களை இணையதளம் வாயிலாகவே எளிதாகச் செலுத்த முடியும். இந்த நடவடிக்கை பயண நடைமுறைகளை எளிதாக்கவும், எல்லைப் பகுதிகளில் ஏற்படும் நெரிசலைக் குறைக்கவும் மட்டுமே கொண்டு வரப்பட்டதாகத் தெளிவுபடுத்தப்பட்டுள்ளது.
நேபாளம் எப்போதும் இந்தியப் பயணிகளுக்குப் பாதுகாப்பான மற்றும் நட்புணர்வோடு வரவேற்கக்கூடிய ஒரு நாடாகத் திகழ்கிறது என்பதை அந்த வாரியம் வலியுறுத்தியுள்ளது. இந்தியாவிலிருந்து வரும் சுற்றுலாப் பயணிகளுக்குச் சிறந்த அனுபவத்தை வழங்குவதிலும், இரு நாடுகளுக்கும் இடையிலான நட்புறவைப் பாதுகாப்பதிலும் நேபாள அரசு முழு அர்ப்பணிப்புடன் இருப்பதாகவும் தெரிவிக்கப்பட்டுள்ளது. எனவே, ஆதாரமற்ற வதந்திகளை நம்ப வேண்டாம் என்றும், எப்போதும் போல இந்தியப் பயணிகள் நேபாளத்திற்கு வருகை தந்து தங்களது சுற்றுலாவை மகிழ்வுடன் கழிக்கலாம் என்றும் அந்நாட்டு அரசு கேட்டுக்கொண்டுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
