.png)
ஜப்பானின் சைதாமா மாகாணத்தில் உள்ள கவாகோ என்ற இடத்தில் கட்டப்பட்டுள்ள மசூதி தொடர்பாகத் தற்போது பெரும் சர்ச்சை எழுந்துள்ளது. உள்ளூர் சட்டங்களுக்கு உட்பட்டுத் தேவையான அனுமதிகளைப் பெறாமல் இந்த மசூதி கட்டப்பட்டுள்ளதாக ஜப்பான் அதிகாரிகள் குற்றம் சாட்டியுள்ளனர். இது தொடர்பான செய்தி வெளியானதும், பாகிஸ்தான் தூதரகம் உடனடியாக அந்த மசூதி திட்டத்திலிருந்து தாங்கள் எந்தத் தொடர்பும் இல்லை என்று ஒதுங்கிக்கொண்டது. குறிப்பிட்ட அந்த நிலம், மலை மற்றும் வனப்பகுதிக்கு உட்பட்டது என்பதால், அங்கு கட்டுமானம் மேற்கொள்வதற்கு அரசு அனுமதி கட்டாயம் என ஜப்பான் அதிகாரிகள் தெரிவித்துள்ளனர்.
கவாகோ நகர நிர்வாகத்தின் அதிகாரப்பூர்வ அறிக்கையின்படி, இந்த மசூதி கட்டப்பட்ட இடம் நகர்ப்புற மேம்பாட்டுக் கட்டுப்பாட்டுப் பகுதிக்குள் வருகிறது. நகரத் திட்டமிடல் சட்டத்தின் கீழ் முறையான அனுமதி பெறாமல் இந்த இடத்தில் எந்தவொரு கட்டுமானப் பணிகளையும் செய்யக் கூடாது என்பது விதி. ஆனால், இந்த விதிமுறைகளை மீறி எந்த முன்னனுமதியும் இன்றி மசூதி கட்டப்பட்டிருப்பதை நகர அதிகாரிகள் உறுதிப்படுத்தியுள்ளனர். இந்த விவகாரம் பெரிதானதற்குக் காரணம், இந்த மசூதியின் திறப்பு விழாவில் ஜப்பானுக்கான பாகிஸ்தான் தூதர் அப்துல் ஹமீது கலந்துகொண்டதுதான். இது பெரும் சர்ச்சையை உருவாக்கியுள்ளது.
இந்த விவகாரம் குறித்துப் பாகிஸ்தான் தூதரகம் தனது எக்ஸ் பக்கத்தில் வெளியிட்ட அறிக்கையில், ஜப்பானில் வசிக்கும் பாகிஸ்தானியர்கள் அனைவரும் அந்தந்த உள்ளூர் சட்டதிட்டங்களுக்குக் கீழ்ப்படிந்து நடக்க வேண்டும் என்று வேண்டுகோள் விடுத்துள்ளது. மத வழிபாட்டுத் தலங்களைக் கட்டுவதற்கு முன்பாக உள்ளூர் அரசிடம் முறையாக அனுமதி பெற வேண்டும் என்பதை மீண்டும் வலியுறுத்தியுள்ளது. தாங்கள் எந்தவொரு சட்டவிரோத கட்டுமானத் திட்டங்களுடனும் இணைந்திருக்கவில்லை என்று தூதரகம் தெளிவாகக் குறிப்பிட்டுள்ளது. ஏப்ரல் 3-ஆம் தேதி நடைபெற்ற திறப்பு விழா நிகழ்விற்குத் தூதர் சென்றது, விழா ஏற்பாட்டாளர்கள் அனைத்து அனுமதிகளையும் பெற்றுள்ளதாகக் கூறியதால் தான் என்றும் விளக்கமளித்துள்ளது.
இந்த சர்ச்சைக்கு மற்றொரு முக்கியக் காரணமாகப் பார்க்கப்படுவது, ஏற்கனவே ஜப்பானில் நீண்டகாலமாகச் சிறப்பாகச் செயல்பட்டு வரும் பிற மசூதிகள் உள்ளூர் மக்களுடன் இணைந்து செயல்படும் விதம். உதாரணத்திற்கு, யாஷியோ மசூதி உள்ளூர் நிர்வாகம் மற்றும் குடியிருப்பாளர்களுடன் மிக இணக்கமாகச் செயல்பட்டு வருகிறது. உள்ளூர் மக்களுடன் ஆலோசித்து, அவர்களின் ஆதரவுடன் செயல்படும்போதுதான் மத வழிபாட்டுத் தலங்கள் அமைதியாகச் செயல்பட முடியும் என்று அந்த அமைப்பின் பிரதிநிதிகள் கருத்து தெரிவித்துள்ளனர். எனவே, அனுமதி பெறாமல் கட்டிவிட்டு இப்போது தர்மசங்கடத்தில் சிக்கியுள்ள இந்த விவகாரம், பாகிஸ்தான் சமூகத்தினரிடையே பெரும் விவாதத்தை ஏற்படுத்தியுள்ளது.
கடைசியாக, பாகிஸ்தான் தூதரகம் தனது சமூக உறுப்பினர்களுக்கு ஒரு முக்கிய எச்சரிக்கையையும் விடுத்துள்ளது. ஏதேனும் ஒரு கட்டுமானத் திட்டத்தைத் தொடங்குவதற்கு முன்பு அதன் சட்டப்பூர்வமான அம்சங்களை அந்தப் பகுதி மக்களிடம் வெளிப்படையாகத் தெரிவிக்க வேண்டும் என்றும், ஜப்பான் அதிகாரிகளுடன் முழுமையாக ஒத்துழைக்க வேண்டும் என்றும் கேட்டுக்கொண்டுள்ளது. எந்தவொரு சூழலிலும் ஜப்பானின் சட்டங்களை மீறக் கூடாது என்றும், இந்த விவகாரத்தில் சட்டப்பூர்வமான நடவடிக்கைகளுக்கு உட்பட்டு நடக்கும்படியும் அறிவுறுத்தப்பட்டுள்ளது. தூதரகத்தின் இந்த விளக்கத்திற்குப் பிறகும், ஜப்பான் அரசு இந்த சட்டவிரோத கட்டுமானம் குறித்து என்ன நடவடிக்கை எடுக்கப் போகிறது என்பதைப் பொறுத்திருந்துதான் பார்க்க வேண்டும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்
