குஜராத் மாநிலத்தில் இரண்டாம் கட்ட வாக்குப்பதிவு நடைபெறும் 93 தொகுதிகளில் நேற்று மாலை 5 மணியுடன் பிரச்சாரம் நிறைவடைந்தது. 

முதற்கட்ட தேர்தல்:

குஜராத் சட்டப் பேரவையில் மொத்தமுள்ள 182 இடங்களுக்கு 2 கட்டங்களாக தேர்தல் நடைபெறுகிறது. அதன்படி 89 தொகுதிகளுக்கான முதல்கட்ட வாக்குப்பதிவு கடந்த 1-ம் தேதி விறுவிறுப்பாக நடைபெற்று முடிந்தது. முதற்கட்ட தேர்தல் வாக்குபதிவில், 63 புள்ளி 14 சதவீத வாக்குகள் பதிவானதாக தேர்தல் ஆணையம் அறிவித்தது.

இரண்டாம் கட்ட தேர்தல்:

இந்நிலையில், மீதம் உள்ள 93 தொகுதிகளில் இரண்டாம் கட்ட வாக்குப்பதிவு நாளை நடைபெற உள்ளது. இதில், 69 பெண்கள் உட்பட 833 வேட்பாளர்கள் களத்தில் உள்ளனர். கடந்த தேர்தலுடன் ஒப்பிடும்போது இம்முறை பெண் வேட்பாளர்கள் அதிகம் பேர் போட்டியிடுவது குறிப்பிடத்தக்கது.

தேர்தல் பணி தீவிரம்:

தொடர்ந்து, இரண்டாம் கட்ட வாக்குப்பதிவுக்கு தேவையான பாதுகாப்பு ஏற்பாடுகளை தேர்தல் ஆணையம் முடுக்கிவிட்டுள்ளது. அதன்படி, இன்று அனைத்து வாக்குச் சாவடிகளுக்கும் தேவையான வாக்குப்பதிவு இயந்திரங்கள் மற்றும் தேர்தல் அலுவலர்களை அனுப்பி வைக்கும் பணி தீவிரமாக நடைபெற்று வருகிறது.

இதையும் படிக்க: மகா தேரோட்டத்தை தொடர்ந்து...மகா தீபம் எப்போ? ஆவலுடன் பக்தர்கள்!!

முடிவடைந்த தேர்தல் பிரச்சாரம்:

இதனிடையே, நாளை வாக்குப்பதிவு நடைபெற உள்ளதையொட்டி, நேற்று மாலை 5 மணியுடன் தேர்தல் பிரசாரம் நிறைவடைந்தது. முன்னதாக, பிரதமர் நரேந்திர மோடி, உள்துறை அமைச்சர் அமித்ஷா, காங்கிரஸ் கட்சித் தலைவர் மல்லிகார்ஜூன கார்கே, ஆம் ஆத்மி கட்சித் தலைவர் அரவிந்த் கெஜ்ரிவால் உள்ளிட்ட தலைவர்கள் இறுதிகட்ட பிரசாரத்தில் ஈடுபட்டனர்.

சூடுபிடிக்க போகும் அரசியல் களம்:

குஜராத் மாநிலத்தில் இரண்டாம் கட்ட தேர்தல் நிறைவடைந்த பிறகு வரும் 8ம் தேதி வாக்குகள் எண்ணப்பட்டு அன்றைய தினமே முடிவுகள் அறிவிக்கப்பட உள்ளது. இதேபோல், இமாச்சல் பிரதேச தேர்தல் முடிவுகளும் அன்றைய தினம் வெளியாக உள்ளதால் வருகிற 8 ஆம் தேதி அரசியல் களமே சூடுபிடித்து காணப்படும் என அரசியல் பார்வையாளர்கள் கருத்து தெரிவித்து வருகின்றனர்.

குஜராத்தில் அகமதாபாத்தில் நடைபெற்ற தேர்தல் பிரச்சாரத்தில் பேசிய கார்கே, பிரதமர் மோடி ஒவ்வொரு தேர்தலிலும் தனது முகத்தை மக்களிடம் காட்டி வாக்கு கேட்கிறார் என்று கூறியிருந்தார்.

அதாவது “உங்களுக்கு எத்தனை முகங்கள், நீங்கள் ராவணனைப் போல 100 தலையா கொண்டுள்ளீர்கள்?” எனப் பேசியிருந்தார்.  கார்கேவின் இந்த பிரச்சாரத்திற்கு பிறகு, பாஜக ஆக்ரோஷமாகி, இது பிரதமர் மோடியையும் குஜராத்திகளையும் அவமதிப்பதாக உள்ளது எனக் கடும் கண்டனம் தெரிவித்தது.

பாஜகவின் கண்டனம்:

காங்கிரஸ் தலைவர் மல்லிகார்ஜுன் கார்கே, பிரதமர் நரேந்திர மோடிக்கு எதிராக ராவணன் என்ற வார்த்தையை பயன்படுத்தியதாக பாஜகவினர் கடும் கண்டனம் தெரிவித்துள்ளனர்.  கார்கே தனது கருத்துக்கு முதல்முறையாக பதிலளித்துள்ளார். பாஜக தனது கருத்துக்களை தேர்தல் ஆதாயத்திற்காக தவறாக பயன்படுத்துகிறது என்று கூறியுள்ளார்.   

மேலும் தெரிந்துகொள்க:     "உங்களுக்கு ராவணனைப் போல 100 தலைகள் இருக்கிறதா?" மோடி அளித்த அல்ட்டிமேட் பதில்!!!

விளக்கமளித்த கார்கே:

மேலும் காங்கிரஸ் செய்யும் அரசியல் என்பது எந்த ஒரு நபருக்கும் எதிரானது அல்ல என்றும் அது அரசியல் கொள்கைகள் சார்ந்தது எனவும் தெரிவித்துள்ளார்.  தொடர்ந்து பேசிய அவர் நாங்கள் செயல்திறன் அரசியலையே நம்புகிறோம் எனவும் ஆனால் பாஜகவின் அரசியல் பாணி பெரும்பாலும் ஜனநாயகத்தின் உணர்வைக் கொண்டிருக்கவில்லை என்றும் கூறியுள்ளார்.

மைய அரசியல்:

தொடர்ந்து பேசிய கார்கே ​​பிரதமர் மோடியை குறிவைத்து பேசும் போது பாஜகவின் அரசியல் எல்லா இடங்களிலும் ஒரு சிறப்பு நபரை மையமாகக் கொண்டுள்ளது என்று கூறியுள்ளார்.  

அரசியல் அனுபவம்:

அதனைத் தொடர்ந்து கார்கே கூறுகையில், அவருக்கு 51 வருட பாராளுமன்ற அரசியல் அனுபவம் உள்ளது எனவும் அதனால்தான்  எந்த ஒரு நபரைக் குறித்தும் தனிப்பட்ட கருத்துகளை கூறுவதில்லை எனவும் தெரிவித்துள்ளார்.  மேலும் வளர்ச்சி, பணவீக்கம், வேலையில்லாத் திண்டாட்டம், வறுமை போன்ற பிரச்னைகளில் பாஜக அரசை விமர்சித்துள்ளேன் எனவும் கூறியுள்ளார்.

-நப்பசலையார்

இதையும் படிக்க:    பாஜகவின் இரும்பு கோட்டையில் காங்கிரஸின் அசைக்க முடியாத கோட்டை!!!

குஜராத்தின் ஆட்சியில் 24 ஆண்டுகளாக பாஜகவுக்கு எதிராக தண்டா தொகுதி ஒரு அசைக்க முடியாத கோட்டையாக மாறியுள்ளது. 

கடந்த 20 ஆண்டுகளாக:

பனஸ்கந்தா மாவட்டத்தில் உள்ள தண்டா தொகுதி கடந்த இருபதாண்டுகளாக காங்கிரஸின் கோட்டையாக இருந்து வருகிறது.  இந்த தொகுதியில் காங்கிரஸ் தொடர்ந்து 5 முறை வெற்றி பெற்று வருகிறது.  இந்த தொகுதியில் பாஜக இரண்டு முறை மட்டுமே வெற்றி பெற்றுள்ளது.  

1990 மற்றும் 1995 ஆம் ஆண்டுகளில் தொடர்ந்து இரண்டு முறை பாஜகவின் காந்திபாய் கச்சோரியா இங்கு தாமரைக்கு ஆதரவாக வெற்றி பெற்றுள்ளார்.  24 ஆண்டுகளாக மாநிலத்தில் ஆட்சியில் இருக்கும் பாஜகவுக்கு தண்டா ஒரு அசைக்க முடியாத கோட்டையாக மாறியுள்ளது. 

காங்கிரஸின் வெற்றிகள்:

2017ல் நடந்த சட்டசபை தேர்தலிலும், காங்கிரஸ் இத்தொகுதியில் வெற்றி பெற்றது.  2017ம் ஆண்டு வெற்றியானது காங்கிரஸின் தொடர்ச்சியான ஐந்தாவது வெற்றியாகும்.  காங்கிரஸின் காந்திபாய் கலாபாய் 24,000 வாக்குகள் வித்தியாசத்தில் பாஜகவின் மல்ஜிபாயை தோற்கடித்தார்.   இத்தேர்தலில் மொத்தம் 9 வேட்பாளர்கள் களத்தில் இருந்தனர், அவர்களில் 7 வேட்பாளர்களின் டெபாசிட் பறிமுதல் செய்யப்பட்டது. 

2012 தேர்தலிலும் காங்கிரஸின் காந்திபாய் கலாபாய்  26,000 வாக்குகள் வித்தியாசத்தில் பாஜக வேட்பாளர் காமபாய் பிகாபாயை தோற்கடித்தார். காந்திபாய்க்கு முன்னர், காங்கிரஸின் முகேஷ் குமார் காத்வி 1998, 2002 மற்றும் 2007ல் தொடர்ந்து மூன்று முறை இங்கிருந்து வெற்றி பெற்றுள்ளார்.   

காந்திபாய்க்கு ஹாட்ரிக் வெற்றி கிடைக்குமா அல்லது போக்கு மாறுமா?:

காந்திபாய் கலாபாய்க்கு காங்கிரஸ் மீண்டும் வாய்ப்பளித்துள்ளது.  அதேசமயம், இந்த தொகுதியில் லதுபாய் சந்த்பாய் பார்கியை பாஜக நிறுத்தியுள்ளது.  ஆம் ஆத்மி கட்சியின் மகேந்திரபாய் கேசர்பாய் பும்பாடியா போட்டியை மும்முனையாக மாற்ற முயற்சித்து வருகிறார்.  இந்த தொகுதிக்கு டிசம்பர் 5-ம் தேதி இரண்டாம் கட்டமாக வாக்குப்பதிவு நடைபெறவுள்ளது.  முடிவுகள் வந்த பின்னரே இந்த தொகுதி காங்கிரஸின் கோட்டையா என்பது தெளிவாகும்.

-நப்பசலையார்

இதையும் படிக்க:    "உங்களுக்கு ராவணனைப் போல 100 தலைகள் இருக்கிறதா?" மோடி அளித்த அல்ட்டிமேட் பதில்!!!

பிரதமர் மன்மோகன் சிங் அரசில் கே.எம்.சந்திரசேகர் அமைச்சரவை செயலாளராக நியமிக்கப்பட்டார்.  2011 வரை இந்தப் பதவியில் இருந்த அவர் எழுதிய 'எனது வார்த்தை போல் நல்லது' (As good as my word) என்ற புத்தகத்தில் 2008ல் மகாராஷ்டிராவின் 26/11 தாக்குதலின் பல மறைக்கப்பட்ட தகவல்களை வெளிப்படுத்தியுள்ளார். 

குழப்பமான சூழல்:

முன்னாள் கேபினட் செயலாளர் கே.எம்.சந்திரசேகர் அவரது 'எனது வார்த்தை போல் நல்லது' என்ற புத்தகத்தில், ஐக்கிய முற்போக்குக் கூட்டணி அரசில் தேசிய பாதுகாப்பு ஆலோசகர் பதவி குறித்து பல தகவல்களை வெளிப்படுத்தியுள்ளார்.  மும்பை தாக்குதலுக்குப் பிறகு ஒரு குழப்பமான சூழ்நிலை உருவானது என்றும் அவர் கூறியுள்ளார். 

தடுமாறிய அரசு:

அதாவது, தாக்குதலின் போது, ​ என்ன நடவடிக்கை எடுக்க வேண்டும் என்று மத்திய அரசுக்கு தெரியவில்லை என்று தெரிவித்துள்ளார்.  இந்த செய்தி அப்போது ஆட்சி செய்த மத்திய அரசிடம் முடிவெடுக்கும் திறன் இல்லாததையே தற்போது அம்பலப்படுத்தியுள்ளது.  தாக்குதலுக்குப் பிறகு, மத்திய மட்டத்தில் யார் என்ன செய்வார்கள் என்பது குறித்து உண்மையான தெளிவு இல்லை என்றும் அவர் கூறியுள்ளார்.

நிர்வகிப்பதில் குழப்பம்:

மேலும் அந்த புத்தகத்தில் தேசிய பாதுகாப்பு ஆலோசகர் பதவி என்பது அரசின் சரியான முடிவு என்றும் எழுதியுள்ளார்.    ஆனால், பாதுகாப்பு விஷயங்களில் அவரை சுதந்திரமாக வைத்திருக்காதது பலவித குழப்பத்தையே ஏற்படுத்தியது எனவும் கூறியுள்ளார்.  

மேலும், இது பாதுகாப்பு தொடர்பான விஷயங்களில் என்எஸ்ஏ மற்றும் கேபினட் செயலாளரின் பங்கு மற்றும் அதிகாரம் என்ன என்பதில் தெளிவான வரையறை செய்யப்படாதது பெரிய குழப்பத்தையே ஏற்படுத்தியது எனவும் கூறியுள்ளார். அதனோடு 26/11 தாக்குதல் கடுமையான அவசரநிலையில் முடிவெடுக்கும் திறனின் பலவீனத்தையும் அம்பலப்படுத்தியது என அவர் தெரிவித்துள்ளார்.

அடிப்படை உண்மை:

பொதுவாக புலனாய்வு அமைப்புகள் ஒரு பகுதியில் இருந்து பெறப்படும் தகவல்களை உள்துறை அமைச்சகம், பாதுகாப்பு அமைச்சகம் அல்லது ஆயுதப்படைகளுடன் பகிர்ந்து கொள்கின்றன. எனவும் ஆனால் இதுபற்றி  அமைச்சரவை செயலாளருக்கு தெரிவிக்கப்படவில்லை எனவும் சந்திரசேகர் கூறியுள்ளார்.  

26/11 தாக்குதலின் போது என்ன நடந்தது?:

மும்பையில் தீவிரவாதத் தாக்குதல் நடந்தபோது, ​​மத்திய அளவில் யார் என்ன செய்ய வேண்டும் என்பது குறித்த தெளிவு இல்லை என்று கே.எம்.சந்திரசேகர் அவரது புத்தகத்தில் எழுதியுள்ளார்.  மேலும் சட்டம் ஒழுங்கு என்பது இந்திய அரசியலமைப்புச் சட்டத்தின் கீழ் சம்பந்தப்பட்ட மாநில அரசின் கோரிக்கையின் பேரில் மத்திய தலையீட்டுடன் நடைபெறும் நிலையால் அப்போது குழப்பமான நிலையே ஏற்பட்டது எனக் கூறியுள்ளார்.  

தொடர்ந்து “நான் இந்த நெருக்கடிக்கு உடனடி முற்றுப்புள்ளி வைக்க விரும்பினேன், ஆனால் இரவு வெகுநேரம் வரை மும்பையில் உண்மையில் என்ன நடக்கிறது என்பதை அறிய எனக்கு உளவுத்துறையோ அல்லது எதனுடைய உதவியோ கிடைக்கவில்லை.” என எழுதியுள்ளார். 

-நப்பசலையார்

இதையும் படிக்க:   குஜராத் தேர்தல் வாக்குப்பதிவு சரிவு கூறுவது என்ன...வெற்றி வாய்ப்பு யாருக்கு?!!

"லோக் ஆயுக்தா - தனி நீதிமன்றம் - சேவை உரிமைச் சட்டம்" போன்ற லஞ்ச - ஊழல் ஒழிப்புச் சட்டங்களை விரைந்து செயல்படுத்த வேண்டும் என மக்கள் நீதி மய்யம் வலியுறுத்தி அறிக்கை வெளியிட்டு உள்ளது.

கவலை தெரிவித்த நீதிமன்றம்:

மக்கள் நீதி மய்யம் வெளியிட்டுள்ள அறிக்கையில், தமிழகம் முழுவதும் 1983 ஆம் ஆண்டு முதல் 2021-ம் ஆண்டு வரையிலான 38 ஆண்டுகளில், நிலுவையில் இருக்கும் 1,635 ஊழல் வழக்குகளை விரைந்து முடிக்க வேண்டும் என்று, விசாரணை நீதிமன்றங்களுக்கு உயர் நீதிமன்றம் உத்தரவிட்டுள்ளது. அரசுப் போக்குவரத்து கழக ஊழியர்கள் பலர் மீது லஞ்ச ஒழிப்புப் போலீஸார் பதிவு செய்து, நிலுவையில் உள்ள ஊழல் வழக்குகள் தொடர்பாக விசாரித்த சென்னை உயர் நீதிமன்றம், ஊழல் வழக்குகளை இத்தனை ஆண்டுகளாக நிலுவையில் வைத்திருந்தால், ஊழலை ஒருபோதும் கட்டுப்படுத்த முடியாது, அது வழக்கின் தன்மையை நீர்த்துப்போகச் செய்து, ஊழல் குற்றச்சாட்டுக்கு உள்ளானவர்கள் சட்டத்தின் பிடியில் இருந்து தப்ப வழிவகுக்கும் என்று கவலை தெரிவித்துள்ளது.

குற்றப்பத்திரிக்கையே பதிவு செய்வதில்லை:

அதுமட்டுமின்றி, ஊழல் வழக்குகளை விரைந்து விசாரிக்காவிட்டால், ஊழல் தடுப்புச் சட்டத்தின் நோக்கத்தையே வீழ்த்திவிடும் என்றும் நீதிபதி தெரிவித்துள்ளார். லஞ்சம், ஊழல் தொடர்பாக மக்களின் எண்ணங்களை நீதிபதி பிரதிபலித்துள்ளார். அவருக்கு மக்கள் நீதி மய்யம் பாராட்டுகளைத் தெரிவிக்கிறது.மக்கள் வரிப் பணத்தில் ஊதியம் வாங்கிக் கொண்டு, பொதுமக்களுக்கான சேவைகளைப் புரிவதற்கே லஞ்சம் வாங்கிய அலுவலர்கள் ஏராளமானோர் லஞ்ச ஒழிப்புப் பிரிவு போலீஸாரிடம் சிக்கியும்கூட, எந்தப் பிரச்சினையும் இல்லாமல் ஓய்வுபெறும் சூழல் நிலவுகிறது. பலர் மீது குற்றப்பத்திரிக்கையே பதிவு செய்வதில்லை என்றும் கூறப்படுகிறது.

லஞ்சத்தை தடுத்து நிறுத்துவது எப்படி?:

தாமதிக்கப்படும் நீதி, மறுக்கப்பட்ட நீதிக்குச் சமம் என்பார்கள். ஊழல் வழக்குக் குற்றவாளிகள் எவ்வித தண்டனைக்கும் உள்ளாகாமல், மீண்டும் மீண்டும் ஊழலில் ஈடுபட்டுக் கொண்டிருப்பது மிகுந்த வேதனைக்குரியது. லஞ்சம், ஊழலில் ஈடுபட்டுக் கொண்டிருப்போரில் சிக்குபவர்கள் கொஞ்சம் பேர்தான். அவர்களும் தண்டிக்கப்படாமல் இருந்தால், சமுதாயத்தில் புரையோடிப்போன லஞ்சத்தை தடுத்து நிறுத்துவது எப்படி?

இதையும் படிக்க: தமிழ்நாட்டில் அடுத்த 5 நாட்களுக்கு மழையாம்...!எந்தெந்த இடம் தெரியுமா?

தமிழக அரசு முன்வர வேண்டும்:

எனவே, லஞ்ச வழக்குகளை விரைந்து முடிக்க வேண்டும். லஞ்ச ஒழிப்புப் பிரிவு காவல் துறையை இன்னும் வலுப்படுத்துவதுடன், லஞ்ச வழக்குகளை விசாரிக்கும் நீதிமன்றங்களின் எண்ணிக்கையை அதிகரிப்பதுடன், நீதித்துறைக்குத் தேவையான அனைத்து உதவிகளையும் செய்ய தமிழக அரசு முன்வர வேண்டும் என்று மக்கள் நீதி மய்யம் வலியுறுத்துகிறது. 

“லோக் ஆயுக்தா” அமைப்பு:

மேலும் முன்னாள் அமைச்சர்கள், தற்போதைய அமைச்சர்கள் போன்ற உயர்பொறுப்பிலுள்ளோர் மீதான ஊழல் குற்றச்சாட்டுகளை உரிய முறையில் விசாரிக்கும் பொருட்டு “லோக் ஆயுக்தா” அமைப்பானது வலுவாக்கப்பட வேண்டும். நீதிமன்றங்களின் தொடர் வலியுறுத்தல் காரணமாக உருவாக்கப்பட்ட “லோக் ஆயுக்தா" அமைப்பானது தற்போது தமிழகத்தில் செயல்பாட்டில் உள்ளதா என்று சந்தேகிக்கும் அளவில்தான் இருக்கிறது. வெறும் ஏட்டளவில்தான் இச்சட்டம் செயல்பட்டுவருகிறது. திமுக தேர்தல் அறிக்கையில் (வாக்குறுதி எண்:18)”...லோக் ஆயுக்தா முறையாகவும், முழுமையாகவும் செயல்படத் தேவையான நடவடிக்கைகளை திமுக அரசு உடனடியாக மேற்கொள்ளும்” என்று குறிப்பிடப்பட்டிருந்தது. 

ஆனால், ஆட்சிப்பொறுப்பேற்று 18 மாதங்கள் ஆகியும், “லோக் ஆயுக்தா”வை வலுப்படுத்தும் நடவடிக்கைகள் தொடங்கப்படவில்லை. இனிமேலாவது இந்நடவடிக்கைகளை விரைவுபடுத்த வேண்டியது அவசியமாகிறது. பக்கத்து மாநிலமான கர்நாடகாவில், லோக் ஆயுக்தா அமைப்பின் விசாரணையின் காரணமாக அப்போது முதல்வராக இருந்த எதியூரப்பா (பாஜக) அவர்கள் சிறைசெல்ல நேர்ந்தது என்பது குறிப்பிடத்தக்கது.

திமுகவின் வாக்குறுதி:

இதேபோல், “கடந்த அதிமுக ஆட்சியில் ஊழல் புகாருக்கு உள்ளான அமைச்சர்கள் மீது உரிய சட்ட நடவடிக்கை எடுக்க தனி நீதிமன்றங்கள்” அமைக்கப்படும் என்ற திமுகவின் வாக்குறுதியும் (வாக்குறுதி எண்: 21) இன்னும் செயல்படுத்தப்படவில்லை; குறித்த காலத்திற்குள் அரசு சேவைகள் தரப்படுவதை உறுதி செய்யும் “சேவை பெறும் உரிமைச் சட்டம்” குறித்தான வாக்குறுதியும் (வாக்குறுதி எண்:19) இதுவரை கண்டுகொள்ளப்படவில்லை. 

லஞ்ச-ஊழல் ஒழிப்பில் கவனம் செலுத்துவாரா முதல்வர்?:

இலஞ்ச ஊழலற்ற ஆட்சி நிர்வாகத்தையே அனைத்து மக்களும் எதிர்பார்க்கிறார்கள். இதுபோன்றதொரு நல்ல நிர்வாகத்தை நடத்துவது தான் எங்கள் நோக்கம் என்று முதல்வர் தொடர்ந்து பேசிவருகிறார். ஆனால், மேற்குறிப்பிட்ட நிர்வாக சீர்திருத்தங்கள் மற்றும் வெளிப்படையான டெண்டர்முறைகளை மேற்கொள்ளாவிடில் லஞ்ச-ஊழல் ஒழிப்பு என்பது வெறும் பேச்சளவில்தான் இருக்குமே தவிர செயல்பாட்டுக்கு வராது. ஊழல் ஒழிப்புச் சட்டங்களைச் செயல்படுத்துவதில் கவனம் செலுத்துவாரா முதல்வர்? இவ்வாறு அறிக்கையில் தெரிவிக்கப்பட்டுள்ளது.

"லோக் ஆயுக்தா - தனி நீதிமன்றம் - சேவை உரிமைச் சட்டம்" போன்ற இலஞ்ச-ஊழல் ஒழிப்புச் சட்டங்களை விரைந்து செயல்படுத்த வேண்டும்!
மக்கள் நீதி மய்யம் வலியுறுத்தல்.
மாநில செயலாளர் @sentharu அறிக்கை.@CMOTamilnadu @mkstalin @arivalayam @regupathymla @tnpoliceoffl @ptrmadurai pic.twitter.com/pQ8htvundp

— Makkal Needhi Maiam | மக்கள் நீதி மய்யம் (@maiamofficial) December 2, 2022