சங்கரன்கோவில் அருகே குருக்கள்பட்டி கிராமத்தில் 50 அடி ஆழ கிணற்றில் தவறி விழுந்த பள்ளி மாணவனை தீயணைப்பு மற்றும் மீட்பு பணிகள் துறையினர் உயிருடன் மீட்ட சம்பவம் பெரும் பரபரப்பு ஏற்படுத்தி உள்ளது

தென்காசி மாவட்டம் சங்கரன்கோவில் அருகே உள்ள குருக்கள் பட்டி அருகே உள்ள கோ மருதப்பபுரம் கீழத்தெருவை சேர்ந்தவர் கூலி தொழிலாளியான ஆனந்த். இவரது மகன்  அர்ஜுன் ஆறாவது படித்து வருகிறான் இந்த நிலையில் குறுக்கல் பட்டி பகுதியில்  வீட்டில் வளர்த்து வரும் ஆடுகளுக்கு புல் அறுப்பதற்காக தனது தாத்தா முருகப்பனுடன் சென்றுள்ளான்.

அப்போது அப்பகுதியில் உள்ள மகாராஜன் என்பவருடைய 50 அடி ஆழமுள்ள விவசாய கிணற்றில் தண்ணீர் குடிப்பதற்காக சென்றுள்ளான் அப்போது எதிர்பாராத விதமாக கால் தவறி கிணற்றில் விழுந்துள்ளான். சிறுவனுக்கு சரிவர நீச்சல் தெரியாது என்று கூறப்படுகிறது.

இந்த நிலையில், கிணற்றில் விழுந்த சிறுவன் அங்கு இருந்த பைப் லைனை பிடித்து அலறல் சத்தம் கொடுத்துள்ளான். இதை பார்த்த சிறுவனுடைய தாத்தா முருகப்பன் கொடுத்த தகவலின் பெயரில் விரைந்து வந்த சங்கரன்கோவில் தீயணைப்பு இரவு பணிகள் துறையினர், கிணற்றில் விழுந்து உயிருக்கு போராடிக் கொண்டிருந்த அர்ஜுனை சுமார் அரை மணி நேரம் போராடி, கயிறு கொண்டு கூடை போல் கட்டி அதில் சிறுவனை அமர வைத்து மேலே கொண்டு வந்தனர். 

சுமார் 50 அடி ஆழ விவசாயக் கிணற்றில் தவறி விழுந்த பள்ளி மாணவன் உயிருடன் மீட்கப்பட்ட சம்பவம் அப்பகுதி மக்களிடையே பெரும் அதிர்ச்சியுடன் கூடிய மகிழ்ச்சியை ஏற்படுத்தி உள்ளது.
மேலும் தகவல் அறிந்து விரைந்து வந்து சிறுவனை உயிருடன் மீட்ட சங்கரன்கோவில் தீயணைப்பு மற்றும் மீட்பு பணிகள் துறையினரை அப்பகுதி மக்கள் வெகுவாக பாராட்டினர்.

இதையும் படிக்க     | கடித்த பாம்புடன் ஓடி வந்த இளைஞர்....! பீதியடைந்த டாக்டர்கள்...!

நாகப்பட்டினம் மாவட்டம் திருமருகல் அடுத்துள்ள கல்லூரி திருவாசல் பகுதியைச் சேர்ந்தவர் மகேந்திரன். கூலித் தொழிலாளியான இவர் 8-ம் தேதியன்று விட்டு வாசலில் நின்று கொண்டிருந்தபோது 3 அடி நீளமுள்ள சாரைப்பாம்பு ஒன்று மகேந்திரனின் காலில் கடித்தது. 

உடனே திடுக்கிட்டுப் போன மகேந்திரன் தன்னைக் கடித்த பாம்பையே கையால் தூக்கினார். அப்போது கையிலும் பாம்பு கடித்ததைத் தொடர்ந்து அதனை ஒரு கேரி பேக்கில் போட்டு கட்டினார்.

பின்னர் நாகை அரசு மருத்துவக்கல்லூரி மருத்துவமனைக்கு ஓடோடி வந்தவர், தன்னை பாம்பு கடித்து விட்டது என கூறியதோடு, கடித்த பாம்பை அனைவர் முன்னிலையிலும் காட்டினார். 

இதைக் கண்டு அலறியடித்த மருத்துவர்களும் பிற நோயாளிகளும் ஓட்டம் பிடித்ததால் சில நிமிடங்கள் அங்கு பரபரப்பு நிலவியது. வெகுநேரமாக கேரி பேக்கிலேயே கிடந்ததால் மூச்சுத் திணறி இறந்ததைத் தொடர்ந்து செத்த பாம்பை அங்கிருந்தவர்கள் புகைப்படம் எடுத்துக் கொண்டனர். 

இதையும் படிக்க    | யார் பெரியவர் என்ற போட்டியால் விபரீதம்: இளைஞரை வெட்டி வீசிய நண்பர்கள்.. ..!

கீழ்வேளூரில் கள்ளச்சாரயம் விற்பனை செய்த 2 பெண்கள் உள்பட மூவர் குண்டர் தடுப்புச்சட்டத்தில் கைது.   

நாகப்பட்டினம் மாவட்டம் கீழ்வேளூர் அடுத்த ராதாமங்கலம்  நடுத்தெருவை சேர்ந்த கொல்லக்காட்டு குமார் இவரது  மனைவி பூங்கொடி (வயது50)  அத்திப்புலியூர் ஊராட்சி கீழத்தெருவை சேர்ந்த ராதாகிருஷ்ணன் இவரது மனைவி வனஜா (49). நாகை தாலுகா ஆலங்குடி ராமாபுரம் பகுதியை சேர்ந்த தவமணி மகன் தங்கம் என்கிற வினோத் (26). 

இவர்கள் 3 பேரும் தொடர்ந்து சாராய விற்பனையில் ஈடுபட்டு வந்தனர். இவர்கள் மீது கீழ்வேளூர் காவல்  நிலையத்தில் சாராய விற்பனை தொடர்பாக வழக்குகள் உள்ளன. இதுதொடர்பாக பூங்கொடி, வனஜா ஆகிய 2 பேரும் கைது செய்யப்பட்டு திருவாரூர் மகளிர் சிறையிலும், தங்கம் என்கிற வினோத் நாகை மாவட்ட சிறையிலும் அடைக்கப்பட்டிருந்தனர்.

மேலும்,  3 பேரும் தொடர்ந்து சாராயம் விற்பனையில் ஈடுபட்டு வருவதால் அவர்கள் மீது நடவடிக்கை எடுக்க வேண்டும் என கீழ்வேளூர் காவல் ஆய்வாளர் தியாகராஜன், துணை காவல் கண்காணிப்பாளர் பாலகிருஷ்ணன் ஆகியோர் நாகை மாவட்ட காவல் கண்காணிப்பாளர் ஹர்ஷ் சிங்கிற்கு பரிந்துரை செய்தனர்.  இதையடுத்து மாவட்ட காவல் கண்காணிப்பாளர் 3 பேரையும் குண்டர் சட்டத்தில் கைது செய்ய ஆட்சியர்  ஜானி டாம் வர்கீசுக்கு பரிந்துரை செய்தார். 

அதனை தொடர்ந்து 3 பேரையும் குண்டர் சட்டத்தில் கைது செய்ய ஆட்சியர் உத்தரவிட்டார். இதையடுத்து கீழ்வேளூர் போலீசார் நாகை, திருவாரூர் சிறையில் இருந்த 3 பேரையும்  குண்டர் சட்டத்தில் கைது செய்து திருச்சி மத்திய சிறையில் அடைத்தனர்.

இதையும் படிக்க      |  கே.எஸ்.அழகிரி உள்ளிட்ட மாநிலத் தலைவர்கள் மாற்றம்?

குளித்தலை அருகே கோவில் திருவிழாவில் பட்டியல் இன சமூக இளைஞரை கோவிலுக்குள் அனுமதிக்காததால் ஏற்பட்ட பிரச்சனையை தொடர்ந்து தற்காலிகமாக கோவிலை அதிகாரிகள் இழுத்துப் பூட்டியுள்ளனர்.

கரூர் மாவட்டம், குளித்தலை அருகே வீரணம்பட்டியில் காளியம்மன் கோவில் உள்ளது. இக்கோவிலின் வைகாசி திருவிழா தற்போது நடைபெற்று வருகிறது. கோவிலைச் சுற்றியுள்ள 8 கிராமங்களை சேர்ந்த மக்கள் கொண்டாடும் திருவிழாவில், கோவில் அமைந்திருக்கும் உள்ளூரான வீரணம்பட்டியில் பட்டியலின சமூகத்தைச் சேர்ந்த 80 குடும்பத்தினர் வசித்து வருகின்றனர்.

இந்த ஊரில் பெரும்பான்மையாக வாழும் குறிப்பிட்ட சமூகத்தை சேர்ந்த மக்கள் 200 குடும்பத்தினரும் வசித்து வருகின்றனர். அப்பகுதியில் தொடர்ச்சியாக சாதிய பிரச்சனைகள் இருந்து கொண்டே இருப்பதாக கூறப்படுகிறது. மேலும் பட்டியல் இன சமூகத்தினர் கோவிலுக்குள் நுழைவதை அனுமதிப்பதில்லை என்ற குற்றச்சாட்டும் வைக்கப்படுகிறது. இந்நிலையில் நேற்று நடந்த திருவிழாவில் கோவிலுக்குள் சென்ற பட்டியலின இளைஞரை கோவிலுக்குள் வரக்கூடாது என்று தடுத்து வெளியே தள்ளியிதாக தெரிகிறது. சாமி கும்பிட்டு விட்டு திருநீர் கேட்ட போதும் கொடுக்க மறுத்ததாக கூறப்படுகிறது. 

இந்த சம்பவத்தையடுத்து இரு பிரிவினருக்கும் இடையே பிரச்சனை ஏற்பட்டது. இது குறித்து தகவல் அறிந்த கடவூர் வட்டாட்சியர் முனிராஜ், கரூர் மாவட்ட ஏடிஸ்பி மோகன், குளித்தலை டிஸ்பி ஸ்ரீதர் தலைமையில்  அதிகாரிகள் அங்கு சென்று  இச்சம்பவம் குறித்து விசாரணை மேற்கொண்டனர்.

அப்போது குறிப்பிட்ட அந்த சமூகத்தினர் பட்டியல் இன மக்களை கோவிலுக்குள் வழிபாடு செய்ய அனுமதிக்க மாட்டோம் என்றும் கூறியுள்ளனர் என அடுத்து கோவில் திருவிழாவை நிறுத்தி கோவிலை பூட்டுவதாக அதிகாரிகள் தெரிவித்தனர். அப்போது குறிப்பிட்ட அந்த சமூகத்தினர் கோவிலை பூட்டக்கூடாது எனவும், கோவிலுக்குள் எங்களை அனுமதிக்க வேண்டும் என பட்டியலின மக்களும் சாலை மறியல் போராட்டத்தில் ஈடுப்பட்டனர்.

இதனை அடுத்து இரு தரப்பினரிடமும் பேசிய அதிகாரிகள் இப்பிரச்சனையை சுமூகமாக பேசி தீர்த்துக் கொள்ளலாம் எனவும் அதுவரை கோவிலை தற்காலிகமாக பூட்டுவதாகவும் கூறி கோவில் திருவிழாவை நிறுத்தி கோவிலுக்கு பூட்டு போட்டனர்  இந்த சம்பவம் காரணமாக காளியம்மன் கோவில் தற்காலிகமாக இழுத்து பூட்டப்பட்டுள்ளது. மேலும் இது குறித்து அதிகாரிகள் இரு தரப்பினருடையே பேச்சுவார்த்தை நடத்தி வருகின்றனர்

இதையும் படிக்க:அதிமுகவினர் மீதான வழக்கை ரத்து செய்யக்கோாிய மனு தள்ளுபடி!

சென்னை மெட்ரோ ரயில் இரண்டாவது கட்டப் பணிகள் மாதவரம் வேணுகோபால் நகரில் முதல் சுரங்கம் தோண்டும் இயந்திரம் பணியை இன்று நிறைவு செய்தது.

சென்னையில் இரண்டாம் கட்டமாக ரூ.61, 841 கோடி மதிப்பில் 118.9 கிலோ மீட்டர் தொலைவில் 3 வழித்தடங்களில் மெட்ரோ ரெயில் திட்டப்பணிகள் நடைபெற்று வருகிறது. இவற்றில் மாதவரம்- சிறுசேரி சிப்காட் வரையிலான 3-வது வழித்தடத்தில், மாதவரம்-தரமணி வரை பாதையில் சுரங்க ரெயில் நிலையங்கள் அமைக்கும் பணி நடந்து வருகிறது.

இந்தப்பாதையில் மாதவரம்-பெரம்பூர், அயனாவரம்- கெல்லீஸ், கீழ்ப்பாக்கம் மருத்துவக் கல்லூரி - ராயப்பேட்டை, ராதாகிருஷ்ணன் சாலை - அடையாறு, அடையாறு- தரமணி, கொளத்தூர் - நாதமுனி என 6 தொகுப்புகளை பிரித்து பணிகள் நடந்து வருகிறது.

மாதவரம்-சோழிங்கநல்லூர் வரையிலான பாதையில் முக்கியமான பணியான முதல் சுரங்கம் தோண்டும் பணியை கடந்த ஆண்டு அக்டோபர் 13-ந்தேதி மாதவரத்தில் முதல்-அமைச்சர் மு.க.ஸ்டாலின் தொடங்கி வைத்தார். எஸ்.98 எண் கொண்ட ஆனைமலை என்ற பெயர் கொண்ட சுரங்கம் தோண்டும் எந்திரம் (டணல் போரிங் எந்திரம்) சுமார் 1 கிலோ மீட்டர் தூரம் சுரங்கம் தோண்டும் பணியை முடித்து கொண்டு வேணுகோபால் நகர் ரெயில் நிலையத்தை இன்று  மாலை 4.15 மணி அளவில் வந்தடைந்தது. 

தொடர்ந்து இந்த பாதையில் 2-வது சுரங்கம் தோண்டும் எந்திரம் பணியில் ஈடுபட்டு வருகிறது. மாதவரம்- சிப்காட் வரை 47 கி.மீ. நீளம் அமையவுள்ள தடத்தில் 30 சுரங்க ரெயில் நிலையங்கள் உள்பட 50 மெட்ரோ ரெயில் நிலையங்கள் வர உள்ளன. சென்னையில் நடைபெறும் மெட்ரோ ரெயில் திட்டத்தில் இரட்டை சுரங்கங்கள் தோண்டுவதற்காக 23 சுரங்கம் தோண்டும் எந்திரங்கள் பயன்படுத்தப்பட உள்ளன.

வரும் 2026-ம் ஆண்டுக்குள் இப்பணிகளை முடிக்கத் திட்டமிடப்பட்டுள்ளது என்று மெட்ரோ ரெயில் நிர்வாகம் தரப்பில் தெரிவிக்கப்பட்டுள்ளது.

இதையும் படிக்க:"கருணாநிதி நூற்றாண்டு விழா" சாதனைகளை நினைவு கூர்ந்த தலைவர்கள்!