அதிகளவில் ஆசிரியர் காலி பணியிடங்களுடன் அண்ணா பல்கலைக்கழகம் எப்படி செயல்படுகிறது என அண்ணா பல்கலைக்கழக பதிவாளருக்கு சென்னை உயர் நீதிமன்றம் வினவியுள்ளது. 

அண்ணா பல்கலைக்கழகத்தின் உறுப்பு கல்லூரிகளில் கடந்த 2010-11 ம் ஆண்டுகளில் மாதம் 20 ஆயிரம் ரூபாய் தொகுப்பூதியத்தில்  ஒப்பந்த அடிப்படையில் நியமிக்கப்பட்ட ஆசிரியர்கள்,  தங்களுக்கு பணி நிரந்தரம் வழங்காமல், புதிதாக தற்காலிக ஆசிரியர்கள் தேர்வுக்காக வெளியிடப்பட்ட அறிவிப்பாணையை ரத்து செய்யக் கோரி சென்னை உயர் நீதிமன்றத்தில் வழக்கு தொடர்ந்தனர்  .

இந்த வழக்கை விசாரித்த தனிநீதிபதி, புதிதாக தற்காலிக ஆசிரியர்களை நியமிக்க கூடாது என்றும், காலியிடங்களை நிரப்ப வேண்டும் என்றும் உத்தரவிட்டு, மனுவை தள்ளுபடி செய்து  உத்தரவிட்டார்.

இந்த உத்தரவை எதிர்த்து தற்காலிக ஆசிரியர்கள் தாக்கல் செய்த மேல்முறையீடு வழக்குகள், நீதிபதிகள் ஆர்.சுரேஷ்குமார் மற்றும் கே.குமரேஷ் பாபு அமர்வில் கடந்த முறை விசாரணைக்கு வந்தபோது, நிரந்தர ஆசிரியர்களை நியமிக்கும் விஷயத்தில் அண்ணா பல்கலைக்கழகத்தின் நிலைப்பாடு என்ன? 12 ஆண்டுகளாக தற்காலிக ஆசிரியர்களாக உள்ளவர்களை பணி நிரந்தரம் செய்ய என்ன சிக்கல் உள்ளது? தற்காலிக ஆசிரியர்களை நிரந்தரம் செய்ய தயங்குவதேன்? நிரந்தர ஆசிரியர்களை நியமிக்க ஏன் நேரடி தேர்வு நடத்த முடியாது? எனக் கேள்விகளை எழுப்பியிருந்தனர்.

இந்த வழக்கு இன்று மீண்டும் விசாரணைக்கு வந்தபோது, பல்கலைகழகம் தரப்பில் தாக்கல் செய்யப்பட்ட ஆவணங்களில், அகில இந்திய தொழில்நுட்ப கல்வி குழுமமான ஏஐசிடிஇ விதிமுறைப்படி உதவி பேராசிரியர், இணை பேராசிரியர், பேராசிரியர் என ஆயிரத்து 745 ஆசிரியர்கள் இருக்க வேண்டும் என்றும், ஆனால் 981 பணியிடங்கள் மட்டுமே அனுமதிக்கபட்டுள்ளது என குறிப்பிடப்பட்டு இருந்தது. 

அதில் 556 பேர் மட்டுமே பணியில் உள்ளதாகவும், 425 இடங்கள் காலியாக உள்ளது, ஏஐசிடிஇ விதிமுறைப்படியான இடங்களில் ஆயிரத்து 189 காலியாக உள்ளதாகவும் குறிப்பிடப்பட்டுள்ளது. வழக்குகள் நிலுவையில் இருந்ததால் காலியிடங்களை நிரப்ப முடியவில்லை என பல்கலைகழகம் தரப்பில் விளக்கம் அளிக்கப்பட்டு இருந்தது. 

இந்த விளக்கத்தை ஏற்க மறுத்த நீதிபதிகள், நீதிமன்றம் எழுப்பிய கேள்விகளுக்கு பதிலளிக்கவில்லை என்றும், 2020-ல் தனி நீதிபதி காலி பணியிடங்களை நிரப்ப வேண்டுமென உத்தரவு பிறப்பித்த பிறகு,  3 ஆண்டுகளுக்கு பிறகு தான் கடந்த செப்டம்பர் மாதம்  சிண்டிகேட் கூட்டம் நடத்தப்பட்டதாக அதிருப்தி தெரிவித்தனர்.

இவ்வளவு காலியிடங்களை வைத்துக்கொண்டு இத்தனை ஆண்டுகளாக பல்கலைகழகம் எப்படி செயல்படுகிறது என தெரியவில்லை எனவும் குற்றம்சாட்டினர். 

இடைப்பட்ட 3 ஆண்டுகளில் உயர் நீதிமன்ற உத்தரவை அமல்படுத்த 
நடவடிக்கை எடுக்காதது ஏன், 425 காலியிடங்களுடன் எப்படி செயல்படுகிறது என விளக்கமளிக்க பல்கலைகழக பதிவாளருக்கு உத்தரவிட்டு, வழக்கின் விசாரணையை அக்டோபர் 5-ம் தேதிக்கு தள்ளிவைத்த நீதிபதிகள், தவறினால்  பதிவாளர் நேரில் ஆஜராக வேண்டி வரும் எனவும் எச்சரித்தனர்.

இதையும் படிக்க   | அரக்கோணத்தில் நடந்தேறிய அவலம்: வீடியோ கேம் விளையாடியதால் இளைஞருக்கு மனநலம் பாதிப்பு ..!

கடந்த 2018-ஆம் ஆண்டு இந்திய ராணுவம் வெளியிட்ட ராணுவ வீரர் பணியிடத்திற்கான அறிவிப்பில் அனைத்து தகுதி தேர்விலும் தேர்ச்சி பெற்றவர்களின் பெயர்கள் வரவில்லை என கூறப்படுகிறது. இதனால், இந்த அறிவிப்பாணையை ரத்து செய்து, முறையாக அறிவிப்பாணை வெளியிட்டு ராணுவ வீரர்களை தேர்வு செய்ய உத்தரவிட வேண்டும் என வலியுறுத்தி மதுரை உயர்நீதிமன்றத்தில் மனு தாக்கல் செய்யப்பட்டது. 

திருநெல்வேலி மாவட்டதை சேர்ந்த முத்துகிருஷ்ணன் உள்ளிட்டோர்  உயர்நீதிமன்ற மதுரை கிளையில் ஒரு மனுவினை தாக்கல் செய்திருந்தார்.  அந்த மனுவில், 

"கடந்த 2018-ம் ஆண்டு பிப்ரவரி 24-ம் தேதி இந்திய ராணுவம் சார்பாக வெளியிட்ட ராணுவ வீரர்  பணியிடத்திற்கான அறிவிப்பில் விண்ணப்பித்து, அனைத்து தகுதி தேர்விலும் கலந்து கொண்டு உடற்தகுதி தேர்வு மற்றும் எழுத்து தேர்வில் தேர்ச்சி பெற்றோம். 

இதை தொடர்ந்து,  2018 ஜூலை 29-ம் தேதி வெளியிட்ட தேர்வு முடிவில்,  22 வீரர் பெயர்கள் மட்டுமே தேர்வு செய்யப்பட்டுள்ளது. அதில் எங்களது பெயர் இடம்பெறவில்லை. இது தொடர்பாக அதிகாரிகளிடம் கேட்டபோது, காலி இடங்கள் இல்லை என்று தெரிவித்தார். ஆனால், இந்திய ராணுவம் வெளியிட்ட அறிவிப்பாணையில் இந்த பதவிக்கு எத்தனை பேர் தேவை, எத்தனை பேர் தேர்வு செய்ய இருக்கிறார்கள் என்ற விவரம் தெரிவிக்கப்படவில்லை. இது சட்டவிரோதம்.

எனவே இந்த அறிவிப்பாணையை ரத்து செய்துவிட்டு, விதிகளை பின்பற்றி முறையாக அறிவிப்பாணை வெளியிட்டு ராணுவ வீரர்களை தேர்வு செய்ய உத்தரவிட வேண்டும் என்று கடந்த 2019 ஆண்டு மனு தாக்கல் செய்ய மனுவில்  கூறியிருந்தார்.

இந்த வழக்கு ஏற்கனவே நீதிமன்றத்தில் விசாரணைக்கு வந்த போது, இந்த வழக்கு குறித்து மத்திய பாதுகாப்புத்துறை செயலாளர், முதன்மை ராணுவ அதிகாரி உள்ளிட்டவர்களுக்கு நோட்டீஸ் அனுப்ப நீதிபதி உத்தரவிடப்பட்டு இருந்தது.

இந்த நிலையில் இந்த வழக்கு நீதிபதி பட்டு தேவானந்த் முன்பு விசாரணைக்கு வந்தது.  அப்போது, மத்திய அரசு தரப்பில் ஆஜரான வழக்கறிஞர் சீலிடப்பட்ட கவரில் அறிக்கை தாக்கல் செய்தார்.

இதனை படித்து பார்த்த நீதிபதி, ” ஒன்றிய அரசு வழக்கறிஞர் நீதிமன்றத்தில் கொடுத்த தகவல்கள் அனைத்தும் தவறானது;  தவறான தகவல்களை சீலிடப்பட்ட கவரில் கொடுத்துள்ளீர்கள்;  உங்களுக்கு  அதிகாரிகள் கொடுக்கும் தகவல்கள் அனைத்துமே தவறாகத்தான் உள்ளது. எல்லா அதிகாரிகளையும் குறிப்பிட்டு சொல்லவில்லை. சில அதிகாரிகள் நீதிமன்றத்திற்கு கூட சரியான தகவல்களை தருவதில்லை”, எனவும் குறிப்பிட்டார்.

இதனை தொடர்ந்து,  கணினியில் பதிவாகியுள்ள தகவல்களை நீதிமன்றத்தில் சமர்பித்துள்ளதாகவும் இந்தியா முழுதும் இதே முறை தான் பின்பற்றப்பட்டு வருகிறது எனவும் ஒன்றிய  அரசு வழக்கறிஞர் தெரிவித்தார்.

இதனை ஏற்க மறுத்த நீதிபதி, ” நாட்டின் பாதுகாப்பில் ஈடுபடும் பாதுகாப்புத்துறை அதிகாரிகளே இவ்வாறு தவறான தகவல்களை தரலாமா?, பிறகு பாதுகாப்பு எந்த அளவிற்கு இருக்கும்?”  என வினவிய  நீதிபதி  “உங்களின் சிஸ்டமே சரியில்லை”, என கூறி இந்த வழக்கில் உரிய உத்தரவு பிறப்பிக்கப்படும் எனக் கூறி வழக்கின் தீர்ப்பை தேதி குறிப்பிடாமல் ஒத்தி வைத்தார்.

இதையும்  படிக்க      | பள்ளியில் சாதிய பாகுபாடு... படித்தது போதுமென குழந்தைகளை அழைத்துச் சென்ற பெற்றோர்!!

வேலூர் மாவட்டம் முள்ளிப்பாளையம் பகுதியில் உள்ள நிதி உதவி பெறும் அரசுப் பள்ளி தண்ணீரில் தத்தளிப்பதால் அருகில் உள்ள கோயிலில் மாணவர்களுக்கு பாடம் நடத்தும் அவலம் அரங்கேறி வருகிறது. 

வேலூர் மாநகராட்சி உட்பட்ட முள்ளிப்பாளையம் அவுலிசியா தர்கா தெரு பகுதியில் இயங்கி வருகிறது பாரதி நிதி உதவி துவக்கப்பள்ளி. இந்த பள்ளியில் 1-முதல் 5-ம் வகுப்பு வரை 75-மாணவ மாணவிகள் பயின்று வருகின்றனர்.

இவ்வாறிருக்க, கடந்த 2-நாட்களாக வேலூரில் பெயத கனமழையின் காரணமாக முள்ளிப்பாளையம், மாங்காய் மண்டி பகுதியில், ஆங்காங்கே இடுப்பளவு மழை நீர் தேங்கியுள்ளது. 

இந்த நிலையில், முள்ளிப்பாளையம் அவுலியா தெருவில் உள்ள பாரதி அரசு நிதிவுதவி பெறும் பள்ளியை சுற்றியும் மழை நீர் இடுப்பளவு தேங்கி நிற்பதால், பள்ளி வகுப்பறைக்கு செல்ல முடியாத நிலையில் மாண மாணவிகளை சாலையோரம் உள்ள கோயிலில் அமர வைத்து பள்ளி மாணவர்களுக்கு வகுப்பு எடுக்கும் நிலை ஏற்பட்டுள்ளது. இதனால், வேலூர் மாநகராட்சி மேயர் சுஜாத்தாவின் வார்டு என்பதால், அப்பகுதி மக்கள் பெரும் அதிருப்தியில் உள்ளனர். 

இதையும் படிக்க   | சிறு, குறு தொழில் நிறுவனங்கள் வேலைநிறுத்தம்... முதலமைச்சர் அவசர ஆலோசனை!!

தமிழ்நாடு சட்டமன்ற பேரவை சார்பில் சட்டமன்ற நாயகர் கருணாநிதி என்ற தலைப்பில் பள்ளி கல்லூரி மாணவ மாணவியர்களுக்கு மாநில அளவிலான பேச்சு போட்டி தொடங்கப்பட்டது.

சென்னை நுங்கம்பாக்கத்தில் உள்ள லயோலா கல்லூரியில் தமிழ்நாடு சட்டமன்ற பேரவை செயலகம் சார்பில் கலைஞர் நூற்றாண்டு விழாவை முன்னிட்டு சட்டமன்ற நாயகர் கருணாநிதி என்ற தலைப்பில் மாநில அளவிலான பள்ளி கல்லூரி மாணவ மாணவியர்களுக்கு பேச்சுப்போட்டி தொடங்கப்பட்டுள்ளது. இதற்காக, மாவட்டம் தோறும் போட்டிகள் நடைபெற்று மாவட்டத்திற்கு மூன்று பேர் தேர்வு செய்யப்பட்டு சென்னையில் இறுதிப்போட்டி நடத்த திட்டமிடப்பட்டுள்ளது.

மாவட்ட அளவில் தேர்வாகும் மூன்று நபர்களில் முதல் பரிசு பெறுபவர்களுக்கு ரூபாய் 3000 இரண்டாம் பரிசு பெறுவதற்கு 2000 மூன்றாம் பரிசு பெறுவோருக்கு 1000 ரூபாய் பரிசுத் தொகையும் சான்றிதழ்களும் வழங்கப்பட உள்ளது.

இந்நிகழ்வில் பேசிய சிறுபான்மை நல ஆணையத் தலைவர் பீட்டர் அல்போன்ஸ், பல துறைகளுக்கு செல்ல நினைக்கும் மாணவர்கள் சட்டமன்றத்துக்கும் செல்ல திட்டமிட வேண்டும். கருணாநிதியின் சட்டமன்ற நினைவுகளை மாணவர்கள் தெரிந்து கொண்டால் அதன் விருப்பம் அதிகரிக்கும் என்றார்.

மேலும் தாம் சட்டமன்ற உறுப்பினராக செல்ல வேண்டும் என கல்லூரி நாட்களில் விரும்பியதாகவும் மத்திய அரசின் முதுநிலை மருத்துவ நுழைவுத் தேர்வு வேண்டாம் என முதலில் குரல் கொடுத்தவர் கருணாநிதி. இன்று அதில் மாற்றம் வந்து இருக்கிறது என்றும் தெரிவித்தார். 

தொடர்ந்து பேசிய தமிழ்நாடு சட்டமன்ற பேரவை தலைவர் அப்பாவு, வாழ்நாள் முழுவதும் சட்டமன்ற உறுப்பினராக இருந்து மறைந்தவர் கருணாநிதி. பெண்களுக்கு சொத்தில் உரிமை, பலர் பட்டதாரிகளாக மாறி இருப்பதற்கும், தமிழகத்தில் பட்டம் பெற்றவர்கள் சதவீதம் 51ஆக இருக்க கருணாநிதி தான் முதன்மை காரணம் என தெரிவித்த அவர், சந்திராயன், இஸ்ரோவில் இருக்கும் தமிழர்கள் இன்று சாதித்தற்கு பெருமை திராவிட மாடல் ஆட்சிதான் எனவும் சமச்சீர் கல்வியும், சாமானிய மக்களுக்கும் கல்வி என்ற கருணாநிதியின் இலக்கு தான் காரணம் எனக் கூறினார். 

மேலும், சமூகநீதிக்கு முதல் புள்ளி தமிழகம் வைத்து இருக்கிறது என்றும் ஜாதி, மதம் தவிர்த்து தமிழர், இந்தியன் என மாணவர்கள் பயணிக்க வேண்டும் என்றும் தெரிவித்தார். இந்நிகழ்ச்சியில் சட்டமன்ற துணை சபாநாயகர் பிச்சாண்டி,தலைமை கொறடா கோவி செழியன், சட்டமன்ற உறுப்பினர்கள் மற்றும் லயோலா கல்லூரி மாணவர்கள் கலந்து கொண்டனர்.

இதையும் படிக்க: 2 வாரங்களுக்கு இபிஎஸ் பற்றி உதயநிதி பேசக் கூடாது!!

சென்னை பள்ளிகளில் எந்த விதியின் கீழ் பட்டதாரி ஆசிரியர் பணியிடங்கள் நிரப்பப்படுகின்றன என மாநகராட்சி ஆணையர் விளக்கம் அளிக்க உயர் நீதிமன்றம் உத்தரவிட்டுள்ளது

பட்டதாரி ஆசிரியராக பதவி உயர்வு வழங்கக் கோரி சென்னை  மாநகராட்சி தொடக்கப் பள்ளி இடைநிலை ஆசிரியர் தாக்கல் செய்த வழக்கை விசாரித்த நீதிபதிகள் சுரேஷ்குமார் மற்றும் குமரேஷ்பாபு அமர்வு, சென்னை மாநகராட்சி சார்பில் எத்தனை நடத்தப்படுகின்றன?. அந்த பட்டதாரி ஆசிரியர் பணியிடங்களில் எத்தனை காலியாக உள்ளன?. கடந்த 10 ஆண்டுகளாக காலியாக உள்ள 400 பட்டதாரி ஆசிரியர் பணியிடங்களை, தகுதியான ஆசிரியர்களுக்கு பதவி உயர்வு வழங்கி நிரப்ப நடவடிக்கை எடுக்காதது ஏன்?. என  அறிக்கை தாக்கல் செய்ய சென்னை மாநகராட்சி ஆணையருக்கும், கல்வித்துறை துணை ஆணையருக்கும் நீதிபதிகள் உத்தரவிட்டிருந்தனர்.

இந்த வழக்கு மீண்டும் விசாரணைக்கு வந்த போது, மாநகராட்சி ஆணையர் தரப்பில் தாக்கல் செய்யப்பட்ட அறிக்கையில், 119 ஆரம்ப பள்ளிகள் 92 நடுநிலை பள்ளிகள், 38 உயர் நிலை பள்ளிகள், 32 மேல்நிலை பள்ளிகள் ஆகியவற்றை மாநகராட்சி நடத்துவதாகவும், 1,345 பட்டதாரி ஆசிரியர் பணியிடங்கள் உள்ளன என்றும் தெரிவிக்கப்பட்டுள்ளது.

மேலும், காலிப்பணியிடங்களில் 50 சதவீதம் பதவி உயர்வு மூலமும், மீதமுள்ளவற்றை ஆசிரியர் தேர்வு வாரியத்தின் நேரடி தேர்வு மூலமாகவும், பணியிடமாற்றம் மூலமாகவும் நிரப்பப்படுவதாக தெரிவிக்கப்பட்டு இருந்தது. 

இதையடுத்து, சென்னை மாநகராட்சி பள்ளிகளில் எந்த விதியின் கீழ் பட்டதாரி ஆசிரியர் பணியிடங்கள் நிரப்பப்படுகின்றன? எந்த விதிகளும் இல்லாவிட்டால் எந்த அடிப்படையில் பணி நியமனங்கள் மேற்கொள்ளப்படுகின்றன? இடமாற்றம் மூலமாக நியமிப்பதாக இருந்தால் அதற்கு எந்த பணி விதி ஒப்புதல் அளிக்கிறது? என்பன உள்ளிட்ட கேள்விகளை எழுப்பி, அதற்கு விளக்கம் அளிக்க மாநகராட்சி ஆணையருக்கு உத்தரவிட்ட நீதிபதி, வழக்கின் விசாரணையை செப்டம்பர் 25ஆம் தேதிக்கு தள்ளிவைத்தார்.

இதையும் படிக்க   | மகளிர் உரிமை தொகை விண்ணப்பித்தும் கிடைக்காத பெண்கள்..!