பள்ளிபாளையம் புதன் சந்தப்பேட்டை பகுதியில் செயல்பட்டு வரும் தனியார் நூற்பாலையில் திருவாரூர் மாவட்டத்தைச் சேர்ந்த ஆஷிக் என்பவர் தங்கி வேலை பார்த்து வருகிறார். இந்நிலையில் தனியார் நூற்பாலை அருகே உள்ள கிணற்று பகுதியில்  நின்றுகொண்டு நேற்று இரவு தனது காதலியுடன் செல்போனில் பேசிக் கொண்டிருந்த ஆஷிக் கால் தவறி கிணற்றில் கீழே விழுந்தார்.

இதன் பின்னர் கூச்சலிட்ட இளைஞரின் அலறல் சத்தம் கேட்டு யாரும் வராத நிலையில், கடந்த பத்து மணி நேரத்திற்கு மேலாக இரவில் கிணற்றில் உள்ள தண்ணீரில் இளைஞர் தத்தளித்துக்கொண்டிருந்தார். இதன் பின்னர் காலையில் இளைஞரின் சத்தத்தை கேட்டு வந்த அக்கம்பக்கத்தினர், தீயணைப்பு துறையினர் உதவியுடன் இளைஞரை கயிறு மூலம் கட்டி மீட்டனர். இதில் இளைஞரின் கை முறிவு ஏற்பட்டதால் அவரை பள்ளிபாளையம் அரசு மருத்துமனைக்கு தீயணைப்பு துறையினர் அனுப்பி வைத்தனர். 

சென்னை ராஜிவ் காந்தி அரசு மருத்துவமனையில் மெகா தடுப்பூசி முகாமினை ஆய்வு செய்தபின் சுகாதாரத்துறை செயலாளர் ராதாகிருஷ்ணன் செய்தியாளர்களை சந்தித்து பேசினார். அப்போது பேசிய அவர்: தமிழகத்தில் கொரோனா தடுப்பூசி கையிருபிற்கு ஏற்றவாறு இன்றைய கொரோனா மெகா தடுப்பூசி முகாம்களின் அளவு நிர்ணயம் செய்யப்பட்டுள்ளதாகவும் கடந்த வாரம் நடைபெற்ற மெகா தடுப்பூசி முகாம் மூலம் 28 லட்சம் தடுப்பூசி செலுத்தப்பட்ட நிலையில் இன்று 15 லட்சம் தடுப்பூசி செலுத்த முடிவு செய்யபட்டு இருப்பதாக தெரிவித்தார்.

மேலும் தமிழகம் முழுவதும் 20 ஆயிரம் கொரோனா தடுப்பூசி முகாம் மூலம் தடுப்பூசி செலுத்தும் பணி துவங்கி உள்ளதாக தெரிவித்த அவர் அரசு மற்றும் தனியார் மூலம் இதுவரை 4.2 கோடி தடுப்பூசி செலுத்தப்பட்டு உள்ளதாகவும், அதில் 3 கோடி நபர்களுக்கு மேல் முதல் தவணை மட்டும் செலுத்தப்பட்டு இருப்பதாக தெரிவித்தார்.  தமிழகத்தில் கொரோனா பாதிக்கப்படும் நபர்களின் எண்ணிக்கை 1.1 சதவீதமாக உள்ளது என்று தெரிவித்த அவர் பொதுமக்கள் கொரோனா வழிகாட்டு நெறிமுறைகளை முறையாக பின்பற்றி அக்டோபர் மாதம் இறுதிக்குள் முதல் தவணை தடுப்பூசி செலுத்தி கொண்டால் மூன்றாம் அலை ஏற்படாமல் தடுக்கலாம் என்று தெரிவித்தார்.

பொதுமக்கள் கூட்டம் கூடுவதை தவிர்த்து கொள்ள வேண்டும் என்று தெரிவித்த அவர் அரசு நடவடிக்கைகள் மூலம் மட்டும் கொரோனா நோயினை ஒழிக்க முடியாது என்று தெரிவித்தார்.

தமிழகம் முழுவதும் இன்று மெகா தடுப்பூசி முகாம் நடைபெற்று வரும் நிலையில், சென்னை சென்ட்ரல் ரயில் நிலையம் முன்பு  அமைக்கப்பட்டுள்ள மையத்தினை இந்து சமயம் மற்றும் அறநிலையத்துறை அமைச்சர் சேகர்பாபு, சென்னை மாநகராட்சி ஆணையர் ககன்தீப் சிங் பேடி ஆய்வு செய்தனர். பின், செய்தியாளர்களை சந்தித்த அமைச்சர்  சேகர்பாபு,

தடுப்பூசி தான் கொரோனாவை வெல்லும் பேராயுதம். இதை பேரியக்கமாக நடத்த முதல்வர் எடுத்த சீரிய முடிவால் சென்னை இந்த முயற்சி வெற்றி நடை போடுகிறது. சென்னையில் கடந்த வாரம் நடைபெற்ற மெகா தடுப்பூசி மூலம் ஒரு லட்சத்து 88,000 பேருக்கு தடுப்பூசி செலுத்தப்பட்டுள்ளது. தற்போது, சென்னையில் 2லட்சத்து 37,000 தடுப்பூசி கையிருப்பில் உள்ளது. 4மாதங்களில் அதிகப்படியான தடுப்பூசி செலுத்தப்பட்டுள்ளது.  இந்தியாவிலேயே முன்மாதிரி மாவட்டமாக சென்னை விளங்கும் வகையில் செயல்பாடுகள் அமைந்துள்ளது என்றார்.

ஜமின் ஒழிப்பு சட்டத்தின் படி தாம்பரம் கிஸ்கிந்தா வசம் உள்ள 177 ஏக்கர் நிலம் வருவாய்த்துறை வசம் உள்ளது. ஆனால், பாப்பாசத்திரம் காசி விஸ்வனாதர் கோவிலுக்கு சொந்தமானது என இந்து சமயம் மற்றும் அறநிலைத்துறை சார்பாக பலமுறை மேல்முறையீடு செய்யப்பட்டுள்ளது. இது குறித்த விவரங்கள் முதலமைச்சரிடம் தெரிவித்து ஒரிரு நாளில் நடவடிக்கை எடுக்கப்படும் என்றும் அவர் தெரிவித்தார்.

நடிகர் விஜய் அரசியலுக்கு வர வேண்டுமென அவரது ரசிகர்கள் வலியுறுத்தி வந்த நிலையில், கடந்த ஆண்டு மத்தியில் அவர்களை நேரில் சந்தித்து விஜய் ஆலோசனை நடத்தினார். இதன்பின்னர் அகில இந்திய தளபதி விஜய் மக்கள் இயக்கம் என்ற பெயரில் கட்சியைப் பதிவு செய்ய அவரது தந்தையும், பிரபல இயக்குனருமான எஸ்.ஏ.சந்திரசேகர் நடவடிக்கைகளை மேற்கொண்டார். கட்சித் தலைவராக உறவினர் பத்மநாபன், பொதுச் செயலாளராக எஸ்.ஏ. சந்திரசேகர், பொருளாளராக தாயார் ஷோபா ஆகியோர் பெயர்கள் அறிவிக்கப்பட்டன.

கடந்த ஆண்டு நவம்பரில் இந்த செய்தி தீயாய் பரவிய நிலையில், கட்சியை பதிவு செய்த தகவல் தவறானது என விஜய் தரப்பில் விளக்கம் அளிக்கப்பட்டது. இந்நிலையில் தனது பெயரை பயன்படுத்தி கூட்டங்களை நடத்தவோ அல்லது வேறு செயல்களில் ஈடுபடவோ தந்தை எஸ்.ஏ.சந்திரசேகர், தாய் ஷோபா மற்றும் மக்கள் இயக்க நிர்வாகிகளுக்கு தடை விதிக்கக் கோரி சென்னை நகர 5வது உரிமையியல் நீதிமன்றத்தில் நடிகர் விஜய் கடந்த் ஏப்ரல் மாதம் வழக்கு தொடர்ந்தார்.

நடிகர் சி. ஜோசப் விஜய் என்ற பெயரில் தொடரப்பட்டுள்ள இந்த வழக்கில் சங்கங்களின் பதிவாளர், தூத்துக்குடி மாவட்ட விஜய் மக்கள் இயக்க தலைவர் எஸ்.ஜெ.ஜெகன், முன்னாள் மக்கள் தொடர்பாளர் பி.டி.செல்வகுமார், முத்து, விஜய் மக்கள் இயக்க மாவட்டத் தலைவர் கே.பாரதிதாசன், இன்பண்ட் யோகராஜ், எஸ்.ஏ.சந்திரசேகரின் உறவினரும், அகில இந்திய தளபதி விஜய் மக்கள் இயக்கத்தின் தலைவர் ஆர். பத்மனாபன், அகில இந்திய தளபதி விஜய் மக்கள் இயக்கம் பொதுச் செயலாளரன எஸ்.ஏ.சந்திரசேகர் (தந்தை), அகில இந்திய தளபதி விஜய் மக்கள் இயக்கத்தின் பொருளாளர் ஷோபா சேகர் (தாய்), தூத்துக்குடி மாவட்ட விஜய் மக்கள் இயக்க தலைவர் கே. ஜோஸ்பிரபு, மதுரை மாவட்ட இளைஞர் அணித் தலைவர் முனிச்சாலை ஆர்.மகேஸ்வரன் ஆகியோர் எதிர் மனுதாரர்களாக சேர்க்கப்பட்டிருந்தனர்.

கடந்த ஏப்ரல் 30ஆம் தேதி தொடரப்பட்ட இந்த வழக்கு ஆகஸ்ட் 23ஆம் தேதி விசாரணைக்கு வந்தபோது, வழக்கில் எதிர் மனுதாரர்களில் 6 பேருக்கு நோட்டீஸ் சென்றடையவில்லை என தெரிவிக்கப்பட்டது. அப்போது எஸ்.ஏ.சந்திரசேகர், ஷோபா, முத்து ஆகியோர் தரப்பில் பதில் மனு தாக்கல் செய்யப்பட்டது. ஆனால் வழக்கு தொடர்ந்த நடிகர் விஜய் தரப்பில் வழக்கறிஞர் எவரும் ஆஜராகாதரால், அந்த பதில் மனுக்களை அவர்களிடமே திருப்பி அளித்த நீதிபதி, வழக்கின் விசாரணையை செப்டம்பர் 27ஆம் தேதிக்கு தள்ளிவைத்து, அன்றைய தினம் பதில் மனுவை தாக்கல் செய்யவும் உத்தரவிடப்பட்டுள்ளது.

அ.தி.மு.க.வைச் சேர்ந்த திருப்பத்தூர் மாவட்டச் செயலாளரும், முன்னாள் அமைச்சருமான கே.  சி.வீரமணி வீடு மற்றும் அவருக்கு நெருக்கமானவர்களுக்குச் சொந்தமான வீடுகள், அலுவலகங்கள், தொழில் நிறுவனங்கள் எனத் தமிழ்நாடு, கர்நாடகாவில் 35 இடங்களில் லஞ்ச ஒழிப்புத்துறையினர் செப்டம்பர் 16- ஆம் தேதி காலை முதல் மாலை 06.00 மணி வரை அதிரடி சோதனை நடத்தினர்.

இந்த சோதனை முடிவுக்கு வந்துள்ள நிலையில் அதில், இந்த சோதனையில் கணக்கில் வராத 36 லட்சத்து ஆயிரத்து 60 ரூபாயும், அமெரிக்க டாலர்கள் 1.80 லட்சம், ரோல்ஸ் ராய்ஸ் உட்பட 9 ஆடம்பர கார்களும், 4 கிலோ 987 கிராம் தங்கமும், 47 கிராம் வைரமும், 7.2 கிலோ வெள்ளி, சொத்து ஆவணங்கள் போன்றவற்றைக் கைப்பற்றப்பட்டது.

 கே.  சி.வீரமணி வருமானத்திற்கு அதிகமாகச் சொத்து சேர்த்ததாக வழக்கு பதிவு செய்யப்பட்டுள்ள நிலையில், ஜோலார்பேட்டையில் உள்ள கே.  சி.வீரமணியின் இல்லத்திற்குப் பின்புறம் காலி பகுதியில் சுமார் 275 யூனிட் மணல் கண்டெடுக்கப்பட்டுள்ளதாகவும் இதற்கான உரிய ஆவணங்கள் தற்போதைக்கு இல்லை என்றும் லஞ்ச ஒழிப்புத்துறை சார்பில் தெரிவிக்கப்பட்டுள்ளது.

இந்த 275  யூனிட் மணல் தொடர்பாக கனிமவளத்துத் துறைக்குத் தகவல் கொடுக்கப்பட்டு புகார் அளிக்கப்பட்டது. அந்த புகாரின் அடிப்படையில் நேற்று ஜோலார்பேட்டையில் உள்ள கே.  சி.வீரமணியின் வீட்டுக்குச் சென்ற வேலூர் மாவட்டத்தைச் சேர்ந்த கனிமவளத் துறை அதிகாரிகள், வீட்டின் பின்புறமாகக் குவிக்கப்பட்டிருந்த மணலை ஆய்வு செய்தனர்.

 ஆனால் அதில் லஞ்ச ஒழிப்புத்துறை குறிப்பிட்ட அளவைவிடக் கூடுதலாக மொத்தம் 550 ஒரு யூனிட் மணல் உள்ளது தெரியவந்தது. உயரமான அளவில் மணலை கொட்டாமல் தட்டையாகப் பரப்பி வைக்கப்பட்டுள்ளதும் தெரிய வந்துள்ளது. கே.  சி.வீரமணியின் வீட்டுப் பகுதியில் கொட்டி வைக்கப்பட்டுள்ள மணலின் சந்தை மதிப்பு 33 லட்சம் இருக்கும் என்றும் தெரிவிக்கப்பட்டுள்ளது. உரிய பில் இல்லாத பட்சத்தில் காவல்துறையில் புகார் அளிக்கப்பட்டு சட்டவிரோத மணல் பதுக்கல் பிரிவில் வழக்குப் பதிவு செய்ய வாய்ப்பு உள்ளதாகவும் தகவல்கள் வெளியாகியுள்ளது.