சூர்யகுமார் யாதவ், ஷுப்மன் கில் நீக்கம்! ஆசிய விளையாட்டுப் போட்டிக்கான இந்திய உத்தேச அணி பட்டியல் இதோ!

ஜப்பானில் நடைபெறவுள்ள 2026 ஆசிய விளையாட்டுப் போட்டிகளுக்கான இந்திய கிரிக்கெட் அணியின் உத்தேச வீரர்களின் பட்டியல் தற்போது வெளியாகியுள்ளது. இந்த அணியில் பெரிய மாற்றங்கள் செய்யப்பட்டுள்ளன. இந்திய டி20 அணியின் கேப்டன் சூர்யகுமார் யாதவ் மற்றும் டெஸ்ட், ஒருநாள் அணியின் கேப்டன் ஷுப்மன் கில் ஆகிய முன்னணி வீரர்கள் இந்த நீண்ட பட்டியலில் இடம்பெறவில்லை. அதே நேரத்தில், சமீபத்திய ஐபிஎல் தொடரில் தனது அதிரடி ஆட்டத்தால் அனைவரையும் கவர்ந்த 15 வயது இளம் வீரர் வைபவ் சூர்யவன்ஷி, பிசிசிஐ சமர்ப்பித்த 30 பேர் கொண்ட உத்தேச அணியில் இடம்பிடித்துள்ளது இந்திய கிரிக்கெட் வட்டாரத்தில் பெரும் உற்சாகத்தை ஏற்படுத்தியுள்ளது.

செப்டம்பர் 19 முதல் அக்டோபர் 4 வரை ஜப்பானின் ஐச்சி-நகாயா (Aichi-Nagoya) நகரில் ஆசிய விளையாட்டுப் போட்டிகள் நடைபெற உள்ளன. அதே காலகட்டத்தில் இந்திய அணி வெஸ்ட் இண்டீஸுடன் வெள்ளைப்பந்து கிரிக்கெட் தொடரில் (ஒருநாள் மற்றும் டி20) விளையாட உள்ளதால், இந்திய அணி நிர்வாகம் இரண்டு தனித்தனி அணிகளைத் தேர்வு செய்ய வேண்டிய கட்டாயத்தில் உள்ளது. ஒருநாள் தொடருக்கு ஷுப்மன் கில் தலைமை தாங்குவார் என்று எதிர்பார்க்கப்படுவதால், அவர் ஆசிய விளையாட்டுப் போட்டிக்கான அணியில் சேர்க்கப்படவில்லை. மேலும், எதிர்கால டி20 உலகக்கோப்பை மற்றும் ஒலிம்பிக் திட்டங்களில் சூர்யகுமார் யாதவ் தற்போது பரிசீலனையில் இல்லை என்பதும் இந்த நீக்கத்திற்கு ஒரு முக்கிய காரணமாகக் கூறப்படுகிறது.

இந்த ஆசிய விளையாட்டுப் போட்டிக்கான அணியை வழிநடத்த ஸ்ரேயஸ் ஐயர், சஞ்சு சாம்சன் மற்றும் திலக் வர்மா ஆகியோர் முதன்மையான கேப்டன்சி வேட்பாளர்களாக உள்ளனர். பந்துவீச்சாளர்களைப் பொறுத்தவரை, ஜஸ்பிரித் பும்ரா இந்தப் பட்டியலில் சேர்க்கப்பட்டுள்ளார். இருப்பினும், 2027 உலகக்கோப்பையைக் கருத்தில் கொண்டு அவர் ஒருநாள் போட்டிகளில் கவனம் செலுத்துவார் என்று எதிர்பார்க்கப்படுகிறது. காயத்திலிருந்து குணமடைந்து வரும் ஹர்ஷித் ராணா, பிரசித் கிருஷ்ணா மற்றும் அர்ஷ்தீப் சிங் ஆகியோரும் இந்தப் பட்டியலில் உள்ளனர். சுழற்பந்து வீச்சாளர்களில் குல்தீப் யாதவ், அக்சர் படேல், வாஷிங்டன் சுந்தர் மற்றும் ஹர்ஷ் துபே ஆகியோர் இடம்பிடித்துள்ளனர், இவர்களில் இருவர் மட்டுமே இறுதி அணியில் இடம்பெறுவார்கள்.

நடப்பு ஆசிய விளையாட்டுப் போட்டிகளுக்கான இந்த உத்தேச பட்டியலில் யஷஸ்வி ஜெய்ஸ்வால், அபிஷேக் சர்மா, வைபவ் சூர்யவன்ஷி, இஷான் கிஷன், சஞ்சு சாம்சன், ரிஷப் பண்ட், ஹர்திக் பாண்டியா, ரிங்கு சிங், திலக் வர்மா, ஜஸ்பிரித் பும்ரா, அக்சர் படேல், அர்ஷ்தீப் சிங், குல்தீப் யாதவ், நிதிஷ் குமார் ரெட்டி, பிரசித் கிருஷ்ணா, வருண் சக்ரவர்த்தி, அனுகுல் ராய், ஆயுஷ் பதோனி, ஹர்ஷ் துபே, துருவ் ஜூரல், கலீல் அகமது, ருதுராஜ் கெய்க்வாட், ரவி பிஷ்னோய், ஷாபாஸ் அகமது, சிவம் துபே, விப்ராஜ் நிகம், ஹர்ஷித் ராணா, யாஷ் தாக்கூர் மற்றும் வாஷிங்டன் சுந்தர் ஆகியோர் உள்ளனர்.

கடந்த ஹங்சூ ஆசிய விளையாட்டுப் போட்டியில் இந்திய அணிக்குத் தங்கப் பதக்கம் பெற்றுத் தந்த கேப்டன் ருதுராஜ் கெய்க்வாட், தற்போதைய ஃபார்ம் சிறப்பாக இல்லாவிட்டாலும் இந்தப் பட்டியலில் மீண்டும் சேர்க்கப்பட்டுள்ளது பலருக்கும் ஆச்சரியத்தை அளித்துள்ளது. இதிலிருந்து தேர்ந்தெடுக்கப்படும் 15 பேர் கொண்ட இறுதி அணி, ஆசிய மண்ணில் இந்திய கிரிக்கெட்டின் ஆதிக்கத்தைத் தொடர முயற்சிக்கும். இந்த இளம் மற்றும் அனுபவம் வாய்ந்த கலவை கொண்ட அணி, மீண்டும் ஒருமுறை தங்கப் பதக்கத்தை வெல்லுமா என்பதைப் பொறுத்திருந்து பார்ப்போம். புதிய வீரர்களுக்கான இந்த மிகப்பெரிய வாய்ப்பு, இந்திய கிரிக்கெட்டின் அடுத்த கட்ட நகர்வாகப் பார்க்கப்படுகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.