டி20 உலகக் கோப்பையில் நடந்த டாப் சேஸிங் எது? முழு லிஸ்ட் இங்கே

கொல்கத்தாவின் வரலாற்றுச் சிறப்புமிக்க ஈடன் கார்டன் மைதானத்தில் ஞாயிற்றுக்கிழமை நடைபெற்ற டி20 உலகக்கோப்பை 2026 சூப்பர் 8 ஆட்டத்தில், வெஸ்ட் இண்டீஸ் அணிக்கு எதிராக இந்தியா ஒரு வரலாற்று வெற்றியைப் பதிவு செய்துள்ளது. 196 ரன்கள் என்ற கடினமான இலக்கை விரட்டிய இந்திய அணி, சஞ்சு சாம்சனின் மின்னல் வேக 97 ரன்களின் உதவியுடன் இலக்கை எட்டிப் பிடித்தது. இந்த வெற்றியின் மூலம் டி20 உலகக்கோப்பை வரலாற்றில் தனது அதிகபட்ச 'ரன் சேஸிங்' சாதனையை இந்தியா முறியடித்துள்ளது. சூப்பர் 8 பிரிவில் தென்னாப்பிரிக்காவிற்கு அடுத்தபடியாக இரண்டாம் இடம் பிடித்து இந்தியா அரையிறுதிக்குத் தகுதி பெற்றுள்ளது.

டி20 உலகக்கோப்பை வரலாற்றில் இதுவரை நிகழ்த்தப்பட்ட மிகப்பெரிய ரன் சேஸிங் சாதனைகளின் பட்டியல் இதோ:

இங்கிலாந்து (230 ரன்கள் - 2016): டி20 உலகக்கோப்பை வரலாற்றில் முதலிடத்தில் இருப்பது இங்கிலாந்து அணிதான். 2016-ஆம் ஆண்டு மும்பை வான்கடே மைதானத்தில் நடைபெற்ற போட்டியில், தென்னாப்பிரிக்கா நிர்ணயித்த 230 ரன்கள் என்ற இமாலய இலக்கை இங்கிலாந்து வெற்றிகரமாக எட்டிப் பிடித்தது.

தென்னாப்பிரிக்கா (208 ரன்கள் - 2007): இந்தப் பட்டியலில் இரண்டாம் இடத்தில் தென்னாப்பிரிக்கா உள்ளது. 2007-ஆம் ஆண்டு நடைபெற்ற முதலாவது உலகக்கோப்பையில், ஜோகன்னஸ்பர்க் மைதானத்தில் வெஸ்ட் இண்டீஸுக்கு எதிராக 206 ரன்கள் என்ற இலக்கை விரட்டி 208 ரன்கள் குவித்து தென்னாப்பிரிக்கா வெற்றி பெற்றது.

இந்தியா (199 ரன்கள் - 2026): தற்போது இந்தியா இந்தப் பட்டியலில் மூன்றாம் இடத்தைப் பிடித்துள்ளது. நேற்று கொல்கத்தாவில் நடைபெற்ற போட்டியில் 196 ரன்கள் என்ற இலக்கை விரட்டி 199 ரன்கள் குவித்து இந்தியா புதிய சாதனை படைத்தது. இதற்கு முன் 2014-இல் தென்னாப்பிரிக்காவிற்கு எதிராக 173 ரன்களைத் துரத்தியதே இந்தியாவின் அதிகபட்சமாக இருந்தது.

அமெரிக்கா (197 ரன்கள் - 2024): 2024-ஆம் ஆண்டு டல்லாஸில் நடைபெற்ற போட்டியில் கனடா நிர்ணயித்த 195 ரன்கள் என்ற இலக்கை 197 ரன்கள் எடுத்து அமெரிக்கா கடந்தது.

வெஸ்ட் இண்டீஸ் (196 ரன்கள் - 2016): 2016 உலகக்கோப்பையில் மும்பை வான்கடே மைதானத்தில் இந்தியா நிர்ணயித்த 193 ரன்கள் என்ற இலக்கை விரட்டி வெஸ்ட் இண்டீஸ் வெற்றி பெற்றது.

ஆஸ்திரேலியா (197 ரன்கள் - 2010): 2010-ஆம் ஆண்டு பாகிஸ்தானுக்கு எதிராக 192 ரன்கள் என்ற இலக்கை ஆஸ்திரேலியா வெற்றிகரமாக எட்டிப் பிடித்தது.

நெதர்லாந்து மற்றும் இங்கிலாந்து (190+ ரன்கள் - 2014): 2014-ஆம் ஆண்டு நெதர்லாந்து அணி அயர்லாந்துக்கு எதிராகவும், இங்கிலாந்து அணி இலங்கைக்கும் எதிராகவும் 190 ரன்கள் என்ற இலக்கை எட்டிப் பிடித்தன.

நியூசிலாந்து (183 ரன்கள் - 2026): நடப்பு உலகக்கோப்பையில் சென்னையில் நடைபெற்ற ஆட்டத்தில் ஆப்கானிஸ்தானுக்கு எதிராக 183 ரன்கள் எடுத்து நியூசிலாந்து வெற்றி பெற்றது.

இலங்கை (184 ரன்கள் - 2026): இந்த ஆண்டும் பல்லகலேயில் நடைபெற்ற போட்டியில் ஆஸ்திரேலியாவுக்கு எதிராக இலங்கை 182 ரன்கள் என்ற இலக்கைக் கடந்து சாதனை படைத்தது.

ஜிம்பாப்வே (182 ரன்கள் - 2026): கொழும்பு மைதானத்தில் இலங்கைக்கு எதிராக 179 ரன்கள் என்ற இலக்கை ஜிம்பாப்வே வெற்றிகரமாகத் துரத்தியது.

அயர்லாந்து (180 ரன்கள் - 2022): 2022-இல் ஹோபர்ட் மைதானத்தில் ஸ்காட்லாந்து நிர்ணயித்த 177 ரன்கள் என்ற இலக்கை அயர்லாந்து எட்டியது.

இந்த வெற்றியின் மூலம் இந்தியா 6-வது முறையாக டி20 உலகக்கோப்பை அரையிறுதிக்கு முன்னேறியுள்ளது. மும்பையில் நடைபெறவுள்ள இரண்டாவது அரையிறுதியில் இந்தியா பலமிக்க இங்கிலாந்துடன் மோதவுள்ளது. முதலாவது அரையிறுதியில் தென்னாப்பிரிக்கா மற்றும் நியூசிலாந்து அணிகள் மோதவுள்ளன.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.