.png)
ஐபிஎல் 2026 தொடரில் மும்பை இந்தியன்ஸ் அணிக்கும் அந்த அணியின் நட்சத்திர பந்துவீச்சாளர் ஜஸ்பிரித் பும்ராவிற்கும் இந்த சீசன் ஒரு மிகப்பெரிய சோதனையாக அமைந்துவிட்டது. இதுவரை விளையாடிய எட்டு போட்டிகளில், 180 பந்துகளை வீசியுள்ள பும்ரா வெறும் 2 விக்கெட்டுகளை மட்டுமே கைப்பற்றியுள்ளார். பல ஆண்டுகளாக துல்லியமான பந்துவீச்சுக்கு பெயர் போன பும்ரா, இந்த முறை திணறி வருவது கிரிக்கெட் வட்டாரத்தில் பெரும் விவாதத்தை ஏற்படுத்தியுள்ளது. குறிப்பாக, 2015-ஆம் ஆண்டிற்குப் பிறகு இப்போதுதான் அவரது எகனாமி ரேட் 8 ரன்களுக்கு மேல் சென்று 8.80 ஆக உயர்ந்துள்ளது. மற்ற பந்துவீச்சாளர்களுக்கு இது சாதாரணமாகத் தெரிந்தாலும், பும்ரா போன்ற ஒரு ஜாம்பவானுக்கு இது ஒரு சரிவாகவே பார்க்கப்படுகிறது.
சன்ரைசர்ஸ் ஹைதராபாத் அணிக்கு எதிரான சமீபத்திய போட்டியில் பும்ரா 54 ரன்களை வாரி வழங்கியதுடன், மும்பை அணி மீண்டும் ஒரு தோல்வியைத் தழுவியது. இந்தப் போட்டிக்கு பிறகு செய்தியாளர்களைச் சந்தித்த மும்பை இந்தியன்ஸ் அணியின் பேட்டிங் கோச் கீரன் பொல்லார்ட், பும்ராவின் ஃபார்ம் குறித்து வெளிப்படையாகப் பேசினார். பும்ரா இந்த முறை எதிர்பார்த்த அளவிற்குச் செயல்படவில்லை என்பதை ஒப்புக்கொண்ட பொல்லார்ட், ஒரு கிரிக்கெட் வீரர் சரியாக விளையாடாத போது அவர் ஏன் சறுக்குகிறார் என்பதைப் பல கோணங்களில் ஆராய்வது வழக்கம் என்றும், பும்ராவிற்கும் அதே நிலைதான் என்றும் தெரிவித்தார்.
மேலும் பேசிய பொல்லார்ட், பும்ரா பல ஆண்டுகளாக இந்தியா மற்றும் மும்பை அணிக்காகச் சிறப்பான பங்களிப்பை அளித்துள்ளார் என்பதை நாம் மறந்துவிடக் கூடாது என்று கேட்டுக்கொண்டார். ஒரு மனிதராக பும்ராவிற்கும் சில தவறுகள் நடக்க வாய்ப்புண்டு என்றும், ஒரு நாள் அல்லது ஒரு சீசன் மோசமாக அமைவது சகஜம்தான் என்றும் அவர் ஆதரவு தெரிவித்தார். தற்போது அவர் சரியான ஃபார்மில் இல்லை என்றாலும், அவர்தான் இன்னும் மும்பை இந்தியன்ஸ் அணியின் நம்பர் ஒன் பந்துவீச்சாளர் என்பதில் தங்களுக்கு எந்த சந்தேகமும் இல்லை என்று பொல்லார்ட் பும்ராவிற்குத் தனது ஆதரவை வழங்கினார்.
மும்பை இந்தியன்ஸ் அணி இதுவரை விளையாடிய 8 போட்டிகளில் 6 போட்டிகளில் தோல்வியைத் தழுவி புள்ளிப்பட்டியலில் பின்தங்கியுள்ளது. அணியின் தோல்விகள் குறித்துப் பேசிய பொல்லார்ட், ஒரு அணியாகத் தாங்கள் இன்னும் ஒரு முழுமையான ஆட்டத்தை வெளிப்படுத்தவில்லை என்று வேதனை தெரிவித்தார். முடிவுகள் தங்களுக்குச் சாதகமாக இல்லை என்பது கசப்பான உண்மை என்றாலும், டிரெஸ்ஸிங் ரூமில் இருக்கும் வீரர்கள் இன்னும் தங்கள் போராட்ட குணத்தை இழக்கவில்லை என்று அவர் குறிப்பிட்டார். மீதமுள்ள போட்டிகளில் சிறப்பாகச் செயல்பட்டு மீண்டும் வெற்றிப் பாதைக்குத் திரும்ப வீரர்கள் துடிப்போடு இருப்பதாகவும் அவர் கூறினார்.
மும்பை இந்தியன்ஸ் அணித் தொடரிலிருந்து வெளியேறிவிட்டதாக வரும் செய்திகளையும் பொல்லார்ட் மறுத்துள்ளார். கணக்குப்படி பார்த்தால் இன்னும் மும்பை அணிக்கு வாய்ப்பு இருப்பதாகக் கூறிய அவர், தாங்கள் தோல்விகளை ஏற்றுக்கொள்கிறோம் ஆனால் ஒருபோதும் தோல்வியை ஏற்றுக்கொள்ள மாட்டோம் என்று அதிரடியாகத் தெரிவித்தார். இன்னும் ஆறு போட்டிகள் மீதமுள்ள நிலையில், அடுத்தடுத்த போட்டிகளில் வெற்றி பெற்று 16 புள்ளிகளுடன் பிளே-ஆஃப் சுற்றுக்குச் செல்ல முடியும் என்று தாங்கள் நம்புவதாகவும், அதற்கான முயற்சிகளைத் தொடர்ந்து மேற்கொள்வோம் என்றும் அவர் நம்பிக்கையுடன் முடித்தார்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
