புளோரிடாவைச் சேர்ந்த பெண் ஒருவர், சூதாட்ட விடுதியில் சந்தித்த நபரிடமிருந்து கிட்டத்தட்ட $100,000 மதிப்புள்ள ரோலக்ஸ் கடிகாரத்தைத் திருடியுள்ளார். அந்த நபரை பேச்சால் மயக்கி, போதை மருந்து கொடுத்ததாகக் கூறப்படுகிறது. மேலும், இதுபோல பலருக்கு நடந்துள்ளதாக அதிர்ச்சி சம்பவம் வெளியாகியுள்ளது.
32 வயதான லிண்டா மே க்ரூஸ், வெளியே சந்திக்கும் பெரும் பணக்கார திருமணமாகாத ஆண்களை குறிவைத்து இந்த சம்பவத்தை அரங்கேற்றியுள்ளார். அந்த ஆண்களிடம் கவர்ச்சியாகப் பேசித் தன் வீட்டிற்கோ அல்லது ஹோட்டலுக்கோ அழைத்துச் செல்லும்படி அவர்களை சம்மதிக்க வைத்து, பின்னர் அவர்களுக்கு மயக்க மருந்து கொடுத்துள்ளார். பின்னர், அவர்கள் சுயநினைவுக்கு வருவதற்குள் அவர்களின் உயர் ரக கைக்கடிகாரங்களைத் திருடிச் சென்றதாக குற்றப்பத்திரிகை பதிவு செய்யப்பட்டுள்ளது.
கடந்த ஏப்ரல் 12 அன்று நள்ளிரவு சமயத்தில் ஹாலண்டேல் பீச்சில் உள்ள கரோசெல் கிளப்பில் சந்தித்த ஒரு நபரிடமிருந்து கைக்கடிகாரத்தைத் திருடிய குற்றத்திற்காக, அந்தப் பெண் கைது செய்யப்பட்டுள்ளார். நீதிமன்ற ஆவணங்களின்படி, கிளப்பில் இருந்து புறப்படுவதற்கு முன்பு இருவரும் தங்களது தொலைபேசி எண்களை பரிமாறிக்கொண்டனர். பின்னர் அந்த நபர் க்ரூஸைத் தனது இடத்திற்கு அழைத்து வர அவரது வீட்டிற்கு ஒரு ஊபர் வண்டியை அனுப்பியுள்ளார்.
பின்னர் இருவரும் மது அருந்த தொடங்கியுள்ளனர். ஆனால், அந்த நபர் தனது ஆடைகளை மாற்றுவதற்காக எழுந்து சென்றபோது, அவருக்கு வித்தியாசமான உணர்வு ஒன்று தோன்றியுள்ளது. மேலும், அவர் மிகவும் சோர்வாக உணரத் தொடங்கியுள்ளார்.
குற்றப்பத்திரத்தின்படி, பாதிக்கப்பட்டவர் மயக்கமடைவதற்கு முன்பு கடைசியாகக் கேட்டது, தனது வரவேற்பறையிலிருந்து வந்த கைதட்டல் சத்தமும், க்ரூஸ் அங்கிருந்து செல்வதற்காக அனுமதி கேட்டதும்தான் என்று தெரிவித்துள்ளார்.
பல மணிநேரங்களுக்குப் பிறகு சுயநினைவு திரும்பிய அந்த நபர், அந்தப் பெண் தனது ரோலக்ஸ் கடிகாரம் இருந்த பெட்டியை திறப்பதாகச் சந்தேகித்து, தனது கைக்கடிகாரத்தைச் சரிபார்க்க ஓடியுள்ளார். பின்னர், $98,4000 மதிப்புள்ள, வைரங்கள் பதிக்கப்பட்ட தனது ரோலக்ஸ் கைக்கடிகாரம் காணாமல் போனதை அவர் கண்டறிந்த பிறகு, அவர் காவல்நிலையத்தில் புகாரளித்துள்ளார்.
நீதிமன்ற ஆவணங்களின்படி, பாதிக்கப்பட்டவர், கூட்டாக சேர்ந்து எடுத்த புகைப்படம் ஒன்றில் க்ரூஸை அடையாளம் காட்டினார். வெளிப்படையாகவே ஆபத்தான பெண்ணாகக் கருதப்படும் இவருக்கு எதிராக, டேட் கவுண்டியில் மேலும் நான்கு வழக்குகள் நிலுவையில் உள்ளது குறிப்பிடத்தக்கது. அந்த வழக்குகளிலும் பாதிக்கப்பட்டவர்கள், க்ரூஸை வீட்டிற்கு அழைத்துச் சென்றுவிட்டு, மயக்க நிலையிலிருந்து விழித்தபோது தங்களின் விலையுயர்ந்த கைக்கடிகார நகைகள் காணாமல் போனதைப் போன்ற அதே அனுபவத்தையே பகிர்ந்துள்ளனர்.
ஒரு சம்பவத்தில், பாதிக்கப்பட்டவரின் மருத்துவ அறிக்கையில், அவருக்கு குறிப்பிட்ட வகை தூக்க மாத்திரை கொடுக்கப்பட்டிருந்தது தெரியவந்தது. இது குறிப்பாக மதுவுடன் சேர்த்து உட்கொள்ளும்போது, விரைவான மயக்கம், குழப்பம் மற்றும் நினைவாற்றல் குறைபாட்டை ஏற்படுத்தும் என கூறப்படுகிறது. இதனையடுத்து, குரூஸ் மீது திருட்டுக் குற்றம் சாட்டப்பட்டு, அவருக்கான ஜாமீன் தொகையாக 2,000 டாலராக நிர்ணயிக்கப்பட்டது, ஆனால் அதையும் அவர் செலுத்தினார் என்று பதிவுகள் சுட்டிக்காட்டுவதாக கூறப்படுகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்