தெலங்கானாவைச் சேர்ந்த மென்பொருள் பொறியாளர் ஒருவர், வாஷிங்டனின் பெல்லிவியூவில் உள்ள தங்களது அடுக்குமாடி குடியிருப்பில் மனைவியைக் கழுத்தை நெரித்துக் கொலை செய்துவிட்டு சில மணி நேரங்களுக்குப் பிறகு, அவரது இறந்த மனைவியின் உடலைப் புகைப்படம் எடுத்து, இந்தியாவில் தன்னுடன் உறவில் இருந்த மற்றொரு பெண்ணுக்கு அனுப்பிய சம்பவம் பரபரப்பை ஏற்படுத்தியுள்ளது.
திருமணம் ஆகி நான்கு மாதங்கள் கூட ஆகாத நிலையில், தனது மனைவி ராஜிதா சபினேனி (27) என்பவரைக் கொலை செய்ததற்காக 30 வயதான அவினாஷ் நார்னே கைது செய்யப்பட்டுள்ளார். ஆரம்பத்தில் 'திடீர் மரணம்' என்று கூறப்பட்ட இந்தச் சம்பவம், கழுத்தை நெரித்ததால் ஏற்பட்ட மூச்சுத்திணறலால்தான் ராஜிதா இறந்ததாக பிரேதப் பரிசோதனையில் கண்டறியப்பட்டுள்ளது. இதனையடுத்து, இது ஒரு கொலை விசாரணையாக மாறியது. அவினாஷ் வேலை விஷயமாக வெளியே சென்றிருந்தபோது, ராஜிதா தவறுதலாகக் குளியலறையில் தன்னைப் பூட்டிக்கொண்டதாகவும், அதனால் அவர் சுயநினைவின்றி வீடு திரும்பியதாகவும் கூறி முதலில் 911-க்கு அழைத்துள்ளார்.
காவல்துறையினர் கதவை உடைத்துக்கொண்டு உள்ளே சென்று முதலுதவி செய்ய முயன்றனர். பின்னர், அக்டோபர் 27, 2025 அன்று அவர் இறந்துவிட்டதாக அறிவிக்கப்பட்டது. அவினாஷ், இந்தியாவில் தனக்குத் தொடர்பு இருந்ததாகக் கூறப்படும் ஒரு பெண்ணுக்கு அன்று குறைந்தது நான்கு முறை தொலைபேசியில் அழைத்ததாக துப்பறிவாளர்கள் குற்றம் சாட்டியுள்ளனர். பின்னர் அவர் குளியலறைக்குள் நுழைய முயன்றதாகக் கூறிய நேரத்திலும் இந்த அழைப்புகள் செய்யப்பட்டுள்ளது என்பது குறிப்பிடத்தக்கது. பின்னர் தொடர்பில் இருந்த அந்த பெண்ணுடன் பரிமாறிக்கொண்ட செய்திகள் குறித்துக் கேட்டபோது, ராஜிதாவின் இறந்த உடலின் புகைப்படத்தை அவருக்கு அனுப்பியதை அவர் ஒப்புக்கொண்டதாகக் கூறப்படுகிறது.
2025 ஜூன் 5 அன்று நடந்த தம்பதியரின் திருமணத்திலும் அந்தப் பெண் கலந்துகொண்டதாக புலனாய்வாளர்கள் கூறுகின்றனர். திருமணத்திற்குப் பிறகு, அவினாஷுடன் வாழ்வதற்காக ராஜிதா டெக்சாஸிலிருந்து சியாட்டில் பகுதிக்குக் குடிபெயர்ந்துள்ளார். ஆதாரத் தடத்தை மேலும் வலுப்படுத்தும் விதமாக, ராஜிதா இறப்பதற்கு சில நாட்களுக்கு முன்பு அவருக்கும் அவரது தோழிக்கும் இடையே பரிமாறப்பட்ட செய்திகளில், அவரது கணவர் அவருக்காகத் தயாரித்துக் கொடுத்த ஸ்மூத்தி 'கசப்பாக' இருந்ததாகக் கூறப்பட்டிருக்கிறது.
அவர் இறந்த அன்று, அவினாஷுக்கே அனுப்பிய செய்தியில், அந்த ஸ்மூத்தி 'இருமல் மருந்து போல' கசப்பாக இருந்ததாகக் குறிப்பிட்டுள்ளார். ராஜிதாவின் இறுதிச் சடங்கிற்கு ஏற்பாடு செய்ய உதவிய தெலுங்கு சமூகத்தைச் சேர்ந்தவர்கள் செய்திநிறுவனத்திடம் கூறியது, நெருங்கிய உறவினர் என்ற முறையில் அவினாஷ், தான் ஒரு சந்தேக நபர் என்பதற்கான எந்த அறிகுறியையும் காட்டாமல், சடங்குகளைத் தானே கையாண்டதாகத் தெரிவித்துள்ளனர். "நாங்கள் அவரிடம் பேசியபோது, இது ஒரு கொலை வழக்கு என்பதற்கான எந்த அறிகுறியும் இல்லை. பின்னர் காவல்துறை சுமத்திய குற்றச்சாட்டை அறிந்தபோது நாங்கள் அதிர்ச்சியடைந்தோம்," என்று கூறப்பட்டுள்ளது. அதனைத் தொடர்ந்து வாஷிங்டனில் அவரது இறுதிச் சடங்குகள் நடைபெற்றுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்