பெங்களூரு நகரில், ஒரு தந்தையின் கொடூரமான செயல், அவரது 12 வயது மகள் கண்முன்னே நடந்த கோரமான கொலைச் சம்பவமாக பதிவாகியுள்ளது. சன்டகட்டே பேருந்து நிறுத்தம் அருகே, கேப் ஓட்டுநரான லோஹிதாஷ்வா என்பவர், தனது மனைவி ரேகாவை பொதுமக்களின் முன்னிலையில் கத்தியால் சரமாரியாகக் குத்திக் கொன்ற சம்பவம் பெரும் அதிர்ச்சியையும் பரபரப்பையும் ஏற்படுத்தியுள்ளது.
நேற்று (செப்.22) திங்கள்கிழமை அன்று, தனது 12 வயது மூத்த மகளுடன் சாலையைக் கடக்கக் காத்திருந்தார் ரேகா. அப்போது திடீரென அங்கு வந்த லோஹிதாஷ்வா, தனது மனைவியுடன் வாக்குவாதத்தில் ஈடுபட்டார். இவர்களின் குடும்பத் தகராறு, கடுமையான வார்த்தைப் பரிமாற்றமாக மாறிய நிலையில், ஆத்திரமடைந்த லோஹிதாஷ்வா, தான் மறைத்து வைத்திருந்த கத்தியை எடுத்து ரேகாவை ஆவேசமாக குத்தத் தொடங்கினார். இந்த கொடூரக் காட்சியைப் பார்த்த மகள், அலறி துடித்தவாறு தனது தாயைக் காப்பாற்ற முயன்றார். ஆனால், லோஹிதாஷ்வாவின் வெறித்தனமான தாக்குதலில் இருந்து அவரால் தனது தாயைக் காப்பாற்ற முடியவில்லை.
சம்பவம் நடந்த சில நிமிடங்களில், ரத்த வெள்ளத்தில் கிடந்த ரேகா உடனடியாக அருகிலுள்ள தனியார் மருத்துவமனைக்கு கொண்டு செல்லப்பட்டார். ஆனால், அவரது உடலில் 11 கத்திக்குத்துக் காயங்கள் இருந்த நிலையில், அவர் சிகிச்சை பலனின்றி உயிரிழந்ததாக காவல்துறை தெரிவித்துள்ளது.
விசாரணையில், சன்னராயப்பட்டினாவைச் சேர்ந்த ரேகாவுக்கும், சிரா பகுதியைச் சேர்ந்த லோஹிதாஷ்வாவுக்கும் இது இரண்டாவது திருமணம் என்பது தெரியவந்துள்ளது. ரேகா தனது இளைய மகளை (9 வயது) தனது பெற்றோரிடம் விட்டுவிட்டு, மூத்த மகளுடன் பெங்களூருவில் வசித்து வந்தார். இருவரும் மாகடி சாலையில் உள்ள ஒரே கால் சென்டர் நிறுவனத்தில் பணிபுரிந்துள்ளனர். லோஹிதாஷ்வா அங்கு கேப் ஓட்டுநராக வேலைக்குச் சேர ரேகா தான் பரிந்துரைத்துள்ளார்.
காவல்துறையினர் நடத்திய முதற்கட்ட விசாரணையில், இருவருக்கும் இடையே அடிக்கடி குடும்பத் தகராறு ஏற்பட்டு வந்ததே இந்தக் கொலைக்கு காரணம் எனத் தெரியவந்துள்ளது. சம்பவம் நடந்த பிறகு தப்பி ஓடிய லோஹிதாஷ்வா, நேற்று இரவு காவல்துறையிடம் சரணடைந்தார். இந்தச் சம்பவத்தை நேரில் பார்த்த சிறுமி பெரும் அதிர்ச்சியில் இருப்பதால், அவருக்கு மனநல ஆலோசனை வழங்கப்பட்ட பின்னர், விரிவான வாக்குமூலம் பெறப்படும் என காவல்துறை தெரிவித்துள்ளது.
இந்தச் சம்பவம் குறித்து காமாக்ஷிபாளையா காவல் நிலையத்தில் கொலை வழக்கு பதிவு செய்யப்பட்டு, விசாரணை தொடர்கிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.