நெல்லை மாவட்டம், மூலைக்கரைப்பட்டி, எடுப்பல் கிராமத்தைச் சேர்ந்தவர் 43 வயதுடைய ரெஜினா. இவருக்கும் அதே பகுதியை சேர்ந்த பாண்டி என்பவருக்கும் கடந்த 30 ஆண்டுகளுக்கு முன்பு திருமணம் நடைபெற்று இரண்டு மகன்கள் உள்ளனர். உடல் நல குறைவால் சில ஆண்டுகளுக்கு முன்பு பாண்டி உயிரிழந்துள்ளார். எனவே ரெஜினா தனது இரண்டு மகன்களுடன் தனியாக வசித்து வந்துள்ளார். இந்நிலையில், பக்கத்து வீட்டைச் சேர்ந்த மாசானமுத்து என்பவருடன் ரெஜினாவுக்கு பழக்கம் ஏற்பட்டுள்ளது.
இந்த பழக்கம் நாளடைவில் திருமணத்திற்கு மீறிய உறவாக மாறியுள்ளது. ரெஜினாவின் மூத்த மகனான கொம்பையா வேலைக்கு செல்லும் நிலையில் இளைய மகன் கல்லூரிக்கு சென்றுள்ளார். எனவே இந்த நேரத்தை பயன்படுத்தி கொண்ட ரெஜினா மற்றும் மாசானமுத்து அடிக்கடி தனிமையில் இருந்து வந்துள்ளனர். மேலும் இருவரும் சேர்ந்து தங்களது குடும்பத்திற்கு தெரியாமல் அவ்வப்போது வெளியில் சென்று வந்ததாக சொல்லப்படுகிறது.
வழக்கம் போல் நேற்று நள்ளிரவு, ரெஜினாவின் வீட்டில் அவரும் மாசானமுத்துவும் தனிமையில் இருந்ததாகக் கூறப்படுகிறது. அப்போது, வேலை முடித்து வீட்டிற்கு வந்த ரெஜினாவின் மூத்த மகனான கொம்பையா தனது தாய் மாசானமுத்துவுடன் தனிமையில் இருப்பதைப் பார்த்து அதிர்ச்சியும் ஆத்திரமும் அடைந்தார். தன் கண்முன்னே தாய் தவறான பழக்கத்தில் ஈடுபட்டதைக் கண்டு கோபத்தின் உச்சத்திற்கு சென்ற கொம்பையா, அங்கிருந்த சைக்கிளுக்கு காற்றடிக்கும் பம்ப் எடுத்து ரெஜினாவின் தலையில் ஓங்கி அடித்துள்ளார். இதில் பலத்த காயமடைந்த ரெஜினா, சம்பவ இடத்திலேயே ரத்த வெள்ளத்தில் உயிரிழந்தார்.
இதைப் பார்த்து அதிர்ச்சியடைந்த மாசானமுத்து, அங்கிருந்து தப்பி ஓடிவிட்டார். ரெஜினாவின் சத்தம் கேட்டு வந்த அக்கம் பக்கத்தினர் உயிரிழந்து கிடந்த ரெஜினாவை பார்த்து அதிர்ச்சியடைந்து போலீசாருக்கு தகவல் தெரிவித்துள்ளனர். தகவல் அறிந்து சம்பவ இடத்திற்கு வந்த மூலக்கரைப்பட்டி காவல்துறையினர், ரெஜினாவின் உடலைக் கைப்பற்றி பிரேத பரிசோதனைக்காக நெல்லை அரசு மருத்துவமனைக்கு அனுப்பி வைத்தனர். மேலும், இச்சம்பவம் தொடர்பாக வழக்குப்பதிவு செய்து, தலைமறைவாக இருந்த கொம்பையாவை பிடித்து தீவிர விசாரணை மேற்கொண்டு வருகின்றனர்.
கணவனை இழந்த நிலையில், தனது தாயின் தவறான பழக்கத்தால் ஆத்திரமடைந்த மகனே அவரைக் கொலை செய்த இந்த சம்பவம், மூலக்கரைப்பட்டி மற்றும் அதன் சுற்றுவட்டாரப் பகுதிகளில் பெரும் பரபரப்பையும் சோகத்தையும் ஏற்படுத்தியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.