திருவள்ளூர் மாவட்டம் திருத்தணி முருகப்பா தெருவை சேர்ந்தவர் 24 வயதுடைய பவானி. இவரது தந்தை அதே பகுதியில் பெயிண்டிங் காண்ட்ராக்டர் தொழில் செய்து வருகிறார். இந்நிலையில் தனது மகளுக்கு அவரது பெற்றோர் திருமண தகவல் மையம் மற்றும் ஆன்லைன் செயலிகள் மூலம் வரன் பார்த்து வந்தனர். அப்போது ஆன்லைன் திருமண செயலி மூலம் புரசைவாக்கம் பார்த்தசாரதி தெருவை சேர்ந்த 33 வயதுடைய அகஸ்டின் ஜோஷ்வா என்பவரது அறிமுகம் கிடைத்தது. ஜோஷ்வா அதே பகுதியில் சொந்தமாக பைனான்சியல் தொழில் செய்து வருகிறார். எனவே நல்ல மாப்பிள்ளை என நினைத்த பவானி குடும்பத்தினர் ஜோஷ்வா மற்றும் பவானிக்கு திருமணம் செய்து வைக்க முடிவு செய்திருக்கின்றன.
இதனை தொடர்ந்து இரு வீட்டார் சம்மதத்துடன் கடந்த (நவ 23) ஆம் தேதி அன்று இருவருக்கும் திருமணம் நடைபெற்றது. திருமணம் முடிந்து அந்த பெண் தனது கணவர் வீட்டிற்கு சென்ற நிலையில் அன்று இரவு இளம் தம்பதியினருக்கு பெற்றோர் மற்றும் உறவினர்கள் முதல் இரவு ஏற்பாடு செய்துகின்றனர். அப்போது பவானி தனது கணவர் ஜோஷ்வாவிடம் “நாம் முதலில் மனதளவில் புரிந்துகொள்வோம் பின்னர் தாம்பத்ய உறவில் ஈடுபடலாம்” என தெரிவித்திருக்கிறார். பின்னர் மறுநாளும் பவானி தாம்பத்ய உறவில் ஈடுபடாததால் ஆத்திரமடைந்த கணவர் அகஸ்டின் ஜோஷ்வா தனது மனைவியை வீட்டில் இருந்த சுத்தியலை எடுத்து கடுமையாக தாக்கி பின்னர் ஒரு அறையில் பூட்டி வைத்து சித்ரவதை செய்துள்ளதாக கூறப்படுகிறது.
இதனால் அதிர்ச்சியடைந்த புதுப்பெண் பயத்தில் தனது சகோதரியை செல்போனில் தொடர்பு கொண்டு நடந்தவற்றை கூறியிருக்கிறார். இதனை தொடர்ந்து மாப்பிள்ளை வீட்டிற்கு வந்த பவானி குடும்பத்தினர் புதுப்பெண்ணை மீட்டு சிகிச்சைக்காக ராஜீவ் அரசு மருத்துவமனையில் சேர்த்துள்ளார். ஜோஷ்வா தாக்கியதில் அவருக்கு கைகளில் ரத்த கட்டு, உள்ளங் கால்களில் ரத்தக்கட்டு முகத்தில் காயம் ஏற்பட்டுள்ளது. பின்னர் மருத்துவமனை நிர்வாகம் இது குறித்து போலீசாருக்கு தகவல் தெரிவித்ததன் பேரில் வேப்பேரி போலீசார் சம்பவ இடத்திற்கு சென்று புதுப் பெண்ணிடம் புகாரை பெற்று விசாரணை மேற்கொண்டு வருகின்றனர்.
மேலும் ஜோஷ்வாவை கைது செய்த போலீசார் அவரிடம் விசாரணை மேற்கொண்டதில் அவர் ஏற்கனவே இதே போல இரண்டு பெண்களுடன் லிவ்விங் வாழ்ந்து அவர்களையும் உடலுறவு வைக்க சொல்லி அடித்து துன்புறுத்தியது தெரியவந்துள்ளது. மேலும் பவானி உடலுறவு வைத்துக்கொள்ளாத கோபத்தில் அவரை அடித்து துன்புறுத்தியதாக வாக்குமூலம் அளித்துள்ளார். இதனை தொடர்ந்து போலீசார் ஜோஷ்வாவை நீதிமன்றத்தில் ஆஜர்படுத்தி சிறையில் அடைத்தனர். திருமணமான இரண்டு நாட்களில் புதுமணப்பெண் கணவனால் அடித்து துன்புறுத்தப்பட்ட சம்பவம் அப்பகுதி மக்களிடையே பரபரப்பை ஏற்படுத்தியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.