விமானப் பயணம் செய்யத் திட்டமிடுபவர்களுக்கு கூடுதல் செலவு காத்திருக்கிறது. விமான எரிபொருளான ஏடிஎஃப் (Aviation Turbine Fuel) விலை மற்றும் இயக்கச் செலவுகள் தொடர்ந்து அதிகரித்து வரும் நிலையில், நாட்டின் முன்னணி விமான நிறுவனங்கள் எரிபொருள் கூடுதல் கட்டணத்தை உயர்த்தத் தொடங்கியுள்ளன. ஏர் இந்தியா, ஏர் இந்தியா எக்ஸ்பிரஸ் ஆகிய நிறுவனங்கள் உள்நாட்டு மற்றும் சர்வதேச விமானங்களுக்கான இந்தக் கட்டணத்தை அதிகரித்துள்ளன. இதே நேரத்தில், ஆகாசா ஏர் நிறுவனமும் உள்நாட்டு விமானங்களில் மீண்டும் எரிபொருள் கட்டணத்தை அறிமுகப்படுத்த முடிவு செய்துள்ளது.
ஏர் இந்தியா மற்றும் ஏர் இந்தியா எக்ஸ்பிரஸ் நிறுவனங்களின் புதிய கட்டணம் பயணிக்கும் வழித்தடத்தைப் பொறுத்து மாறுபடும். உள்நாட்டு ஒரு வழிப் பயணத்திற்கு ரூ.400 முதல் ரூ.1,200 வரை கூடுதல் எரிபொருள் கட்டணம் வசூலிக்கப்படும். சர்வதேச விமானங்களில் இந்தக் கட்டணம் ரூ.55 முதல் 215 அமெரிக்க டாலர் வரை இருக்கும். எந்த நாட்டுக்கு அல்லது எந்த தூரத்திற்கு விமானம் இயக்கப்படுகிறது என்பதன் அடிப்படையில் கட்டணத்தில் வேறுபாடு இருக்கும்.
இந்த புதிய கட்டணம் உடனடியாக அனைத்து முன்பதிவுகளுக்கும் பொருந்தாது. ஏர் இந்தியா எக்ஸ்பிரஸ் நிறுவனத்தில் அக்டோபர் 9-ம் தேதி அதிகாலை 12 மணி முதல் செய்யப்படும் புதிய முன்பதிவுகளுக்கு மாற்றியமைக்கப்பட்ட கட்டணம் பொருந்தும். ஏர் இந்தியாவில் அதே நாளில் காலை 11 மணி முதல் செய்யப்படும் புதிய முன்பதிவுகளில் இந்தக் கட்டணம் சேர்க்கப்படும் என தெரிவிக்கப்பட்டுள்ளது. ஏற்கனவே டிக்கெட் முன்பதிவு செய்துள்ள பயணிகளுக்கு இதனால் நேரடியாக கூடுதல் கட்டணம் ஏற்படுமா என்பது அவர்களின் டிக்கெட் விதிமுறைகளைப் பொறுத்தது.
இதற்கிடையில் ஆகாசா ஏரும் எரிபொருள் கூடுதல் கட்டணத்தை மீண்டும் கொண்டுவருகிறது. உள்நாட்டு விமானங்களில் பயணிக்கும் தூரத்தைப் பொறுத்து ரூ.375 முதல் ரூ.1,150 வரை கட்டணம் வசூலிக்கப்படும். சர்வதேச விமானங்களுக்கு ரூ.2,500 என்ற கட்டணம் நிர்ணயிக்கப்பட்டுள்ளது. இதற்கு முன்பு மார்ச் மாதத்தில் ஆகாசா ஏர் எரிபொருள் கட்டணத்தை அறிமுகப்படுத்தியிருந்தது. பின்னர் உள்நாட்டு சேவைகளில் அந்தக் கட்டணம் நீக்கப்பட்டது. தற்போது எரிபொருள் விலை தொடர்ந்து உயர்ந்திருப்பதால் மீண்டும் கட்டணம் கொண்டு வரப்படுகிறது.
விமான நிறுவனங்களின் இந்த நடவடிக்கைக்கு முக்கிய காரணமாக சர்வதேச அளவில் நிலவும் எண்ணெய் விலை மாற்றங்கள் மற்றும் புவிசார் அரசியல் பதற்றங்கள் கூறப்படுகின்றன. குறிப்பாக மத்திய கிழக்கு பகுதியில் ஏற்பட்டுள்ள பதற்றம் உலகளாவிய எரிசக்தி சந்தையில் அழுத்தத்தை ஏற்படுத்தியுள்ளது. இதன் தாக்கம் விமான எரிபொருள் விலையிலும் தெரிகிறது. விமான நிறுவனங்களின் மொத்த இயக்கச் செலவில் எரிபொருள் மிக முக்கியமான பங்கை வகிப்பதால், அதன் விலை உயரும்போது நிறுவனங்களின் செலவும் கணிசமாக அதிகரிக்கிறது.
இந்தச் செலவு அதிகரிப்பை முழுமையாக விமான நிறுவனங்களே ஏற்றுக்கொள்வது சிரமமாக இருப்பதால், அதன் ஒரு பகுதியை பயணிகளிடம் கூடுதல் கட்டணமாக வசூலிக்கும் நிலை உருவாகியுள்ளது. ஏற்கனவே இண்டிகோ உள்ளிட்ட சில விமான நிறுவனங்களும் எரிபொருள் கூடுதல் கட்டணம் தொடர்பாக நடவடிக்கை எடுத்துள்ள நிலையில், தற்போது ஏர் இந்தியா குழுமம் மற்றும் ஆகாசா ஏர் நிறுவனங்களும் அதில் இணைந்துள்ளன.
இதன் தாக்கம் குறிப்பாக நீண்ட தூர விமானப் பயணங்களில் அதிகமாக இருக்கலாம். சர்வதேச பயணங்களில் கூடுதல் கட்டணம் அதிகமாக இருப்பதால், வெளிநாடு செல்லத் திட்டமிடுபவர்கள் டிக்கெட் விலையுடன் சேர்த்து இந்தக் கட்டணத்தையும் கவனத்தில் கொள்ள வேண்டிய நிலை ஏற்பட்டுள்ளது. பண்டிகை காலங்களில் விமானப் பயணத்திற்கான தேவை அதிகரிக்கும் நிலையில், எரிபொருள் கட்டண உயர்வு பயணிகளின் மொத்த பயணச் செலவை மேலும் உயர்த்தக்கூடும்.
எரிபொருள் விலை நிலவரம் எதிர்காலத்தில் எப்படி மாறுகிறது என்பதுதான் அடுத்த கட்டத்தை தீர்மானிக்கும். சர்வதேச எண்ணெய் சந்தையில் விலை குறைந்து, விமான நிறுவனங்களின் இயக்கச் செலவு கட்டுக்குள் வந்தால் கூடுதல் கட்டணங்கள் மீண்டும் மாற்றப்பட வாய்ப்பு உள்ளது. ஆனால் தற்போதைய சூழலில், விமான டிக்கெட் முன்பதிவு செய்யும் பயணிகள் அடிப்படை கட்டணத்தை மட்டும் பார்த்து முடிவு செய்வதைவிட, அதனுடன் சேர்க்கப்படும் எரிபொருள் கூடுதல் கட்டணம் உள்ளிட்ட அனைத்து செலவுகளையும் கணக்கிட்டு பயணத் திட்டத்தை அமைப்பது அவசியமாகியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்