"சைக்கிள் ஓட்டுவது ஆண்களின் விந்தணு எண்ணிக்கையை குறைக்குமா?" - அதிக நேரம் ஓட்டுபவர்களுக்கு மருத்துவர்கள் எச்சரிக்கை!

உடலை கட்டுக்கோப்பாக வைத்திருக்க சைக்கிள் ஓட்டுவது சிறந்த உடற்பயிற்சிகளில் ஒன்றாக கருதப்படுகிறது. இதய ஆரோக்கியத்தை மேம்படுத்துவது, உடல் எடையை கட்டுப்படுத்துவது, தசைகளின் வலிமையை அதிகரிப்பது என சைக்கிள் ஓட்டுவதால் பல நன்மைகள் உள்ளன. குறிப்பாக ஓட்டப்பயிற்சியைப் போல மூட்டுகளில் அதிக அழுத்தத்தை ஏற்படுத்தாததால், பல வயதினருக்கும் இது ஏற்ற உடற்பயிற்சியாக பார்க்கப்படுகிறது. ஆனால் தினமும் நீண்ட நேரம் அல்லது அதிக தீவிரத்துடன் சைக்கிள் ஓட்டும் ஆண்களுக்கு, அவர்களின் இனப்பெருக்க ஆரோக்கியம் தொடர்பாக ஒரு விஷயத்தை கவனத்தில் கொள்ள வேண்டியுள்ளது.

சைக்கிள் ஓட்டுவது நேரடியாக ஆண்களுக்கு மலட்டுத்தன்மையை ஏற்படுத்தும் என்று கூற முடியாது. அதேபோல், சைக்கிள் ஓட்டுபவர்கள் இந்த உடற்பயிற்சியை முழுமையாக நிறுத்த வேண்டும் என்றும் மருத்துவர்கள் கூறவில்லை. ஆனால் பல மணி நேரம் தொடர்ந்து சைக்கிள் ஓட்டுவது, குறிப்பாக வாரத்திற்கு அதிக நேரம் தீவிரமாக சைக்கிள் ஓட்டுவது, சில ஆண்களில் விந்தணுக்களின் எண்ணிக்கை மற்றும் தரத்தில் மாற்றத்தை ஏற்படுத்தக்கூடும் என்று ஆய்வுகள் தெரிவிக்கின்றன.

ஆண்களின் இனப்பெருக்க ஆரோக்கியம் குறித்து விளக்கிய ஆண்ட்ராலஜிஸ்ட் டாக்டர் சிராக் பண்டாரியின் கருத்துப்படி, நீண்ட நேரம் சைக்கிள் ஓட்டும்போது உடலின் முக்கியமான ஒரு பகுதியில் தொடர்ந்து அழுத்தம் ஏற்படுகிறது. சைக்கிள் இருக்கையில் நீண்ட நேரம் அமர்ந்திருப்பதால், கால்களுக்கு இடையில் உள்ள பகுதியில் அழுத்தம் அதிகரிக்கலாம். இதனால் அந்தப் பகுதியில் ரத்த ஓட்டம் தற்காலிகமாக பாதிக்கப்படுவதுடன், விரைகளின் சுற்றுப்பகுதியிலும் வெப்பம் அதிகரிக்க வாய்ப்புள்ளது.

விந்தணுக்கள் உருவாகும் செயல்முறைக்கு சரியான வெப்பநிலை மிகவும் முக்கியமானது. உடலின் மற்ற பகுதிகளைவிட விரைகள் சற்று குறைந்த வெப்பநிலையில் இருப்பதே விந்தணு உற்பத்திக்கு ஏற்றதாகும். ஆனால் நீண்ட நேரம் சைக்கிள் ஓட்டும்போது இருக்கையின் அழுத்தம், உடல் வெப்பம், இறுக்கமான உடைகள் மற்றும் தொடர்ந்து அமர்ந்திருப்பது ஆகியவை சேர்ந்து அந்தப் பகுதியில் அதிக வெப்பத்தை உருவாக்கலாம்.

இதனை மருத்துவ ரீதியில் ‘ஸ்க்ரோட்டல் ஹைப்பர்தெர்மியா’ என்று குறிப்பிடுகின்றனர். இதுதவிர, சரியான வடிவமைப்பு இல்லாத சைக்கிள் இருக்கை காரணமாக கால்களுக்கு இடையிலான பகுதியில் அதிக அழுத்தம் ஏற்படலாம். தொடர்ந்து உராய்வு ஏற்படுவதால் சிறிய அளவிலான காயம் அல்லது எரிச்சலும் உருவாகலாம். இவை அனைத்தும் நீண்ட காலம் தொடர்ந்து ஏற்பட்டால் விந்தணுக்களின் எண்ணிக்கை மட்டுமின்றி, அவற்றின் இயக்கம் மற்றும் வடிவத்தையும் பாதிக்கக்கூடும் என்று மருத்துவ நிபுணர்கள் கூறுகின்றனர்.

இதுதொடர்பாக வெளியான ஒரு ஆய்வில், வாரத்திற்கு ஐந்து மணி நேரம் அல்லது அதற்கு மேல் சைக்கிள் ஓட்டிய ஆண்களுக்கு, குறைந்த விந்தணு செறிவு மற்றும் குறைந்த அளவிலான நகரும் விந்தணுக்கள் இருப்பதற்கான வாய்ப்பு அதிகமாக இருந்ததாக குறிப்பிடப்பட்டுள்ளது. மற்றொரு ஆய்விலும் அதிக அளவில் சைக்கிள் ஓட்டுபவர்களிடம் உடலில் ஏற்படும் ஆக்ஸிடேட்டிவ் ஸ்ட்ரெஸ் மற்றும் அழற்சி மாற்றங்கள் அதிகரித்ததுடன், விந்தணுக்களின் இயக்கம், வடிவம் மற்றும் எண்ணிக்கையில் குறைவு காணப்பட்டதாக தெரிவிக்கப்பட்டுள்ளது.

அதே நேரத்தில், இதை அனைத்து சைக்கிள் ஓட்டுபவர்களுக்கும் பொருந்தும் என்று எடுத்துக்கொள்ளக்கூடாது. பொழுதுபோக்கிற்காக தினமும் 20 முதல் 30 நிமிடங்கள் சைக்கிள் ஓட்டுவது பொதுவாக பாதுகாப்பான உடற்பயிற்சியாகவே பார்க்கப்படுகிறது. உடல் இயக்கம் குறைவாக இருப்பதைவிட மிதமான உடற்பயிற்சி ஒட்டுமொத்த உடல் ஆரோக்கியத்துக்கும், பாலியல் ஆரோக்கியத்துக்கும் பயனுள்ளதாக இருக்கலாம்.

அப்படியானால் அதிக நேரம் சைக்கிள் ஓட்டுபவர்கள் என்ன செய்ய வேண்டும் என்ற கேள்வி எழுகிறது. முதலில், தொடர்ந்து பல மணி நேரம் இடைவெளியில்லாமல் சைக்கிள் ஓட்டுவதை தவிர்க்க வேண்டும். அவ்வப்போது எழுந்து நிற்பது அல்லது ஓய்வு எடுப்பது கால்களுக்கு இடையிலான அழுத்தத்தை குறைக்க உதவும். சைக்கிளின் இருக்கையை சரியான அளவில் தேர்வு செய்வதும் முக்கியம். உடலுக்கு ஏற்ற வகையில் இருக்கும், கால்களுக்கு இடையில் அதிக அழுத்தம் கொடுக்காத இருக்கையை பயன்படுத்துவது நல்லது. நடுப்பகுதியில் சிறிய இடைவெளி அல்லது வெட்டுப்பகுதி கொண்ட சில இருக்கைகள் அழுத்தத்தை குறைக்க உதவக்கூடும்.

மேலும், இறுக்கமான உடைகளை நீண்ட நேரம் அணிந்து சைக்கிள் ஓட்டுவதை தவிர்ப்பதும் முக்கியம். அதிக வெப்பம் உருவாகாமல் பார்த்துக்கொள்வது, போதுமான ஓய்வு எடுப்பது போன்ற எளிய பழக்கங்களும் உதவலாம். முக்கியமாக, சைக்கிள் ஓட்டுவதையே முழுமையாக தவிர்க்க வேண்டிய அவசியம் இல்லை. விந்தணுக்கள் உருவாகி முழுமையாக வளர்ச்சி அடைய சுமார் இரண்டரை முதல் மூன்று மாதங்கள் வரை ஆகும். எனவே வாழ்க்கைமுறையில் ஏற்படும் மாற்றங்களின் தாக்கம் உடனடியாக தெரியாது. சில நாட்கள் சைக்கிள் ஓட்டியதால் அல்லது சில நாட்கள் ஓய்வு எடுத்ததால் விந்தணு தரத்தில் உடனடி மாற்றம் ஏற்படும் என்று எதிர்பார்க்க முடியாது.

ஆண்களின் இனப்பெருக்க ஆரோக்கியத்துக்கு உடற்பயிற்சி முக்கியமானது என்றாலும், அளவுக்கு அதிகமான பயிற்சியை தவிர்ப்பதே நல்லது. வாரத்திற்கு சுமார் 150 முதல் 180 நிமிடங்கள் மிதமான தீவிரத்தில் உடற்பயிற்சி செய்வது பொதுவாக உடல் மற்றும் இனப்பெருக்க ஆரோக்கியத்துக்கு ஏற்ற அணுகுமுறையாக பார்க்கப்படுகிறது. சைக்கிள் ஓட்டுதல், நடைப்பயிற்சி, நீச்சல் போன்றவற்றை சமநிலையுடன் மேற்கொள்வது நல்லது. சைக்கிள் ஓட்டுவது ஆண்களின் கருவுறுதலை நேரடியாக பாதிக்கும் என்று கூறுவதற்கு பதிலாக,அதிக நேரம் மற்றும் அதிக தீவிரத்தில் தொடர்ந்து சைக்கிள் ஓட்டுவது சில ஆண்களில் விந்தணு தரத்தை பாதிக்கக்கூடும் என்பதே முக்கியமான தகவல். எனவே சைக்கிளை முழுமையாக கைவிட வேண்டிய அவசியமில்லை. சரியான இருக்கை, இடைவெளி, மிதமான பயிற்சி மற்றும் போதுமான ஓய்வு ஆகியவற்றுடன் சைக்கிள் ஓட்டுவது பாதுகாப்பானதாக இருக்கலாம். ஏற்கெனவே கருத்தரிப்பதில் சிக்கல் அல்லது விந்தணு தொடர்பான பிரச்சினைகள் இருப்பதாக சந்தேகம் இருந்தால், சுயமாக முடிவெடுப்பதைவிட மருத்துவரின் ஆலோசனையை பெறுவது சிறந்தது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்