உணவுப் பழக்கம் ஆபத்தானதா? ஃபுட் பாய்சனிங் பாதிப்பிலிருந்து தப்பிப்பது எப்படி?

நாம் தினமும் சாப்பிடும் உணவு நமக்குத் தேவையான ஆற்றலைத் தருகிறது. ஆனால், அதே உணவு சுகாதாரமற்றதாக இருந்தால், அதுவே நமக்கு ஆபத்தான 'உணவு நச்சு பாதிப்பு' அல்லது 'ஃபுட் பாய்சனிங்' (Food Poisoning) பாதிப்பை உண்டாக்கிவிடும். பாக்டீரியா, வைரஸ் அல்லது ஒட்டுண்ணிகள் நிறைந்த கெட்டுப்போன உணவைச் சாப்பிடும்போது இந்த பாதிப்பு ஏற்படுகிறது. உணவைச் சரியாகச் சமைக்காமல் இருப்பது, சமைத்த உணவை நீண்ட நேரம் வெளியில் வைப்பது, கைகளைச் சுத்தமாக வைக்காமல் சாப்பிடுவது ஆகியவை ஃபுட் பாய்சனிங்கிற்கு மிக முக்கிய காரணங்கள். உணவைச் சாப்பிட்ட சில மணி நேரங்களிலேயே இதன் அறிகுறிகள் வெளிப்படத் தொடங்கும்.

முக்கிய அறிகுறிகளாக கடுமையான வயிற்று வலி, குமட்டல், வாந்தி மற்றும் தொடர்ச்சியான பேதி போன்றவை இருக்கும். உடலில் நீரிழப்பு (Dehydration) ஏற்படும்போது தலைச்சுற்றல், அதீத சோர்வு மற்றும் வாய் உலர்ந்து போதல் போன்றவை ஏற்படும். காய்ச்சல் கூட லேசாக வரலாம். பெரும்பாலான சந்தர்ப்பங்களில், இந்த அறிகுறிகள் தானாகவே 24 முதல் 48 மணி நேரத்தில் சரியாகிவிடும். ஆனால், குழந்தைகள், கர்ப்பிணிப் பெண்கள் மற்றும் முதியவர்கள் மத்தியில் இந்த பாதிப்பு கடுமையான உடல்நலக் கோளாறுகளை ஏற்படுத்தும். அவர்கள் உடனடியாக மருத்துவமனையில் சேர்க்கப்பட வேண்டும்.

ஃபுட் பாய்சனிங் பாதிப்பு ஏற்பட்டால், மிக முக்கியமானது உடலில் நீர்ச்சத்தை இழக்காமல் பார்த்துக்கொள்வது. ஓ.ஆர்.எஸ் (ORS) எனப்படும் உப்பு-சர்க்கரை கரைசல், இளநீர் அல்லது பழச்சாறுகளை அடிக்கடி பருக வேண்டும். கடினமான உணவுகளைத் தவிர்த்துவிட்டு, எளிதில் செரிமானமாகும் கஞ்சி, தயிர் சாதம் போன்றவற்றைச் சாப்பிடலாம். டீ, காபி அல்லது ஆல்கஹால் பருகக்கூடாது. பாதிப்பு கடுமையாக இருந்து, தொடர்ச்சியான வாந்தி, மலம் அல்லது சிறுநீரில் ரத்தம் வெளியேறுதல் மற்றும் காய்ச்சல் 102 டிகிரிக்கு மேல் இருந்தால், தாமதிக்காமல் மருத்துவரை அணுகி சிகிச்சை பெற வேண்டும்.

இதைத் தவிர்ப்பதற்கு, உணவுச் சுகாதாரமே மிக முக்கியம். உணவைச் சமைக்கும் முன்பு காய்கறிகளை, இறைச்சியைச் சுத்தமாகக் கழுவுங்கள். உணவை நன்கு வேகவைத்துச் சாப்பிடுங்கள். மீதமான உணவுகளைத் ஃப்ரிட்ஜில் வைத்துச் சேமிப்பதே நல்லது. வெளியில் பயணம் செய்யும்போது சுகாதாரமான உணவகங்களைத் தேர்ந்தெடுங்கள். சாப்பிடுவதற்கு முன்னால் கைகளைச் சோப்பு போட்டு கழுவுவதை வழக்கமாக்குங்கள். எளிமையான இந்த முறைகள், உங்கள் குடும்பத்தை உணவு நச்சு பாதிப்பிலிருந்து பாதுகாக்கும். ஆரோக்கியமான உணவுப் பழக்கம் என்பது நீங்கள் என்ன சாப்பிடுகிறீர்கள் என்பதில் மட்டுமல்ல, அது எவ்வளவு பாதுகாப்பாக இருக்கிறது என்பதிலும் அடங்கியுள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.