கர்நாடக அரசியலில் நீண்ட நாட்களாகப் பேசப்பட்டு வரும் ஆட்சி மாற்றம் குறித்த பேச்சுவார்த்தைகள் இப்போது இறுதிக்கட்டத்தை எட்டியுள்ளன. கடந்த வாரம் தனது பதவி உயர்வு குறித்த கேள்விக்கு, "நல்ல காலம் வரும்" என்று டி.கே. சிவகுமார் சூசகமாகப் பதில் அளித்திருந்தார். தற்போது காங்கிரஸ் கட்சியின் மேலிடம், துணை முதல்வராக இருக்கும் டி.கே. சிவகுமாரை கர்நாடகாவின் அடுத்த முதல்வராக நியமிக்கப் பச்சைக்கொடி காட்டிவிட்டதாகத் தகவல்கள் வெளியாகியுள்ளன. தற்போதைய முதல்வர் சித்தராமையாவை ராஜினாமா செய்ய வைத்து, அந்தப் பொறுப்பை டி.கே. சிவகுமாரிடம் ஒப்படைக்க காங்கிரஸ் மேலிடம் திட்டமிட்டுள்ளது.
டெல்லியில் செவ்வாய்க்கிழமை நடந்த மாரத்தான் ஆலோசனைக் கூட்டங்களில், சித்தராமையாவை சமாதானப்படுத்தி, பதவி விலகுமாறு காங்கிரஸ் மேலிடம் கேட்டுக்கொண்டதாகக் கூறப்படுகிறது. இந்த மாற்றத்தை சுமூகமாக முடிக்க, சித்தராமையாவிற்கு ராஜ்யசபா சீட் வழங்குவதாகவும், டெல்லி அரசியலில் அவருக்கு முக்கிய பங்கு தருவதாகவும், புதிய அமைச்சரவையில் அவரது ஆதரவாளர்களுக்குத் தகுந்த வாய்ப்பு வழங்குவதாகவும் கட்சி மேலிடம் வாக்குறுதி அளித்துள்ளது. இந்த முன்மொழிவுகளைப் பரிசீலிக்க சித்தராமையா அவகாசம் கேட்டுள்ளார்.
டி.கே. சிவகுமார் எப்போது பதவியேற்பார் என்பதற்கு இரண்டு வாய்ப்புகள் இருப்பதாகத் தெரிகிறது. முதலாவது, சித்தராமையா வியாழன் அல்லது வெள்ளிக்கிழமையே ராஜினாமா செய்து, இந்த வார இறுதியில் புதிய முதல்வர் பதவியேற்பு விழா நடைபெறுவது. இதற்கே அதிக வாய்ப்புகள் இருப்பதாகக் கருதப்படுகிறது. ஒருவேளை சித்தராமையா பதவி விலக காலதாமதம் செய்தால், ஜூன் 18-ஆம் தேதி நடைபெறவுள்ள ராஜ்யசபா தேர்தலுக்குப் பிறகுதான் இந்த மாற்றம் அமலுக்கு வரும் என்று கூறப்படுகிறது. கர்நாடகாவில் காலியாக உள்ள மூன்று ராஜ்யசபா இடங்களில், சித்தராமையா, மல்லிகார்ஜுன கார்கே மற்றும் டி.கே. சிவகுமாரின் சகோதரர் டி.கே. சுரேஷ் ஆகியோருக்கு வாய்ப்பளிக்க காங்கிரஸ் திட்டமிட்டுள்ளது.
இந்தத் தேர்தல்களுக்கு முன்னால் எந்தவிதமான உட்கட்சிப் பூசல்களும் வந்துவிடக்கூடாது என்பதில் காங்கிரஸ் மேலிடம் கவனமாக உள்ளது. பெங்களூரு திரும்பிய சித்தராமையா, டெல்லி சந்திப்பு குறித்து செய்தியாளர்களின் கேள்விகளுக்குப் பதில் அளிக்க மறுத்துவிட்டார். "நாளை பேசுகிறேன்" என்று மட்டும் கூறிவிட்டு அவர் அமைதி காத்து வருகிறார். அவரது தரப்பு, டி.கே. சிவகுமார் தலைமையில் பல துணை முதல்வர்களை நியமிக்க வேண்டும் என்றும், மாநில காங்கிரஸ் தலைவர் பதவியை தங்கள் ஆதரவாளரிடம் கொடுக்க வேண்டும் என்றும் பேரம் பேசி வருவதாகத் தகவல்கள் தெரிவிக்கின்றன. ஆனால், ஒரு துணை முதல்வர் பதவியை மட்டுமே தர சிவகுமார் தரப்பு சம்மதித்திருப்பதாகத் தெரிகிறது.
இந்த பரபரப்பான சூழலில், வியாழக்கிழமை காலை சித்தராமையாவும் டி.கே. சிவகுமாரும் காலை உணவின் போது சந்திக்க உள்ளனர். இந்த சந்திப்பில் சித்தராமையா பதவி விலகுவது குறித்த இறுதி முடிவை அறிவிப்பாரா அல்லது மீண்டும் ஒரு இழுபறி நீடிக்குமா என்பதுதான் கர்நாடக அரசியலின் இப்போதைய எதிர்பார்ப்பு. டி.கே. சிவகுமாரின் நீண்ட கால கனவு நனவாகுமா அல்லது சித்தராமையா மீண்டும் ஒரு தடங்கலை உருவாக்குவாரா என்பதைப் பொறுத்திருந்துதான் பார்க்க வேண்டும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.